[好煩呀]新年流流長,拜年親戚硬係好鍾意嘅9問

文:
2015.02.10

文: C

好快就到農曆新年喇。新年就梗係要拜年,拜年就梗係要逗利是啦,唔逗唔好意頭丫嘛。不過真係唔明,點解年年一去到三姑屋企,你都未打招呼,佢就已經羊上身咁,係咁「咩咩咩」,真係好咩煩。

1. 你記唔記得我/佢啊?

標準答案:哈哈哈... 

心諗:啲遠房移民咗去西雅圖同瓦努阿圖,返黎香港拜年最鍾意玩認人,仲要撻你十年前用開個朵問你記唔記得佢,仲要問記唔記得佢個仔「阿駿」。「你哋以前細個玩得好埋架,難道沒練習太耐,感覺都追不回來?」鬼記得咩,駿? 邊度駿呀? 

 

2. (讀完書) 點啊,搵到工未啊?

標準答案:搵緊架喇...

心諗:我老豆都未問我,你邊位啊? 拜年仲煩過見工!

 

3. (打緊工) 做嘢做成點啊? 搵幾錢人工啊?

標準答案:幾好啦,夠洗啦。

心諗:我搵幾多都唔關你事啦,你都係想TAG你個仔每個月搵夠十萬九千七啫,叻喇叻喇知你個仔最叻交稅喇放過我啦畀我抖吓啦好唔好。 

4. (未拍拖) 點啊,拍拖未啊?

標準答案:快架喇快架喇...

心諗:我拍唔拍拖關你東事咩!

 

5.  (拍緊拖) 點啊,結婚未啊?

標準答案:嘩講呢啲,哈哈哈...

心諗:我結婚未關你南事咩!你顧掂你自己/你個仔/你個女先啦!

 

6. (結咗婚) 買樓未啊?

標準答案:睇定啲先啦。

心諗:我買唔買樓關你... 妖,慳返啖氣逗利是好過。

 

 

7. (結咗婚) 幾時生小朋友啊?

標準答案:快架喇快架喇...

心諗:你好鍾意小朋友咩? 你唔好自己去生?

 

8. (生咗仔) 幾時生第二胎啊?

標準答案:抖陣先啦~

心諗:同上。

  

9. (生咗仔) 小朋友讀書讀成點啊?

標準答案:不過不失啦,求學不是求分數嘅。

心諗:你幾廿年嚟搞我都算,你今日嚟問候我個仔??

 

有時你會問,點解班煩親戚硬係鍾意呢9問,其實佢哋當咗你係黃大仙,封利是畀你,求其問幾條問題,但求心安理得,有幾多答案係真心想知,大家明啦哈哈哈。

不過講真,如果你嘅人生答得齊以上9問,其實都係一種福氣,就當佢哋係想提醒你,你已經順利經過好多人生階段,你成長了。

 

如果我有幸畀人逗,學人派利是,我真係唔想問咁多嘢,我無興趣知人哋個仔過成點,反正睇佢面書,自然心照。我會講:「你,最近還好嗎?呢度利利是是唔好阻住uncle打牌bye。」

 

祝大家新年口齒伶俐、百無禁忌、和氣生財、有求必應。

 

 

相關連結

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【限時搶⚡】健之堂袪濕茯苓艾草足貼!↓

↓ 含三大中草本配方!/ 有效祛濕毒袪水腫!↓

↓ 含三大中草本配方!/ 有效祛濕毒袪水腫!↓

↓【免費送🎁】SPY x Family藍牙音箱!↓

↓仲有兩款模型~ FANS必收藏😍↓

↓仲有兩款模型~ FANS必收藏😍↓