八達通推新服務　P2P「O! ePay 好易畀」

八達通即日起推出「O! ePay 好易畀」流動支付服務，即P2P（個人對個人）轉賬服務。用戶需預先下載應用程式，就可以嘟手機或平板電腦進行小額轉賬。大家如想使用流動支付服務，就要做足以下這些步驟。

1. 下載手機應用程式

無論你是android（版本4.0或以上）或ios用戶（版本7或以上），都可於Google Play Store或Apple App Store，下載「八達通好易畀」應用程式。

透過「O! ePay 好易畀」，可選擇P2P過數，一班朋友出外消費，想夾錢就方便得多；或增值八達通。值得一提，android手機本就備有NFC功能，而專為ios而設的八達通流動讀寫器，將於2016年稍後推出。

2. 登記成為用戶

下載程式後，大家須登記成為「O!ePay 好易畀」的用戶。申請者須年滿18歲及持有個人八達通；或擁有八達通自動增值；或渣打網上理財服務。

在渣打流動理財程式Breeze，已見「八達通好易畀」這項新功能。持有渣打銀行存款戶口之用戶，可以透過網上或流動理財轉賬至「八達通好易畀」賬戶。

然後再按照指示，輸入個人資料、拍攝香港身份證及地址證明。申請者會於3個工作天內收到電郵通知。只要輸入申請編號及香港身份證號碼首4個數字，便能啟動賑戶。

提提大家，每位香港身份證持有人只可申請一個帳戶。 

3. 啟動賬戶後登入

登入賬戶，便可匯出、匯入八達通內存款。服務加入社交元素。在使用支付、轉賬服務之前，用戶之間必須先確認其「朋友」關係。當雙方成為「朋友」後，賬戶持有人可於24小時後，向名單內的朋友支付或收取款項。

「好易畀」內設多種收費模式及計數機，方便大家分賬。

每個賬戶可以連結最多10張八達通卡，最多可連接至2部裝置。大家亦可以查閱賬戶情況、交易記錄及月結單。所有支付交易的金額上限為兩日內累計不多於$3000，而最高儲值額同為$3000。