>> 第二輪開鑼！青衣一棚兩誕：「天后誕」 2016

青衣戲棚是一年二度的大型傳統節慶活動，於每年農曆三、四月舉行。由於青衣戲棚是根據農曆而定，所以每年舉辦日期都有所不同。一如以往，本年度青衣戲棚分為「真君誕」及「天后誕」。

大家除了睇到傳統的粵曲表演，當然唔少得狂掃戲棚旁邊的小食檔，而今年仍有數十個小食檔攤，由傳統零食、街頭小食，到東南亞美食，甚至新潮甜品都有，價錢平至$10有交易，小編率先於戲棚開始首日走到現場為大家直擊現場實況，以及精選部份特色美食！

抵食之選：場內大大話話有起碼十個串燒檔攤，不乏基本的雞、鴨、牛、豬，或者魷魚之類的海鮮，小編行勻全場，搵到這檔售賣阿拉伯串燒，推出限時優惠價$10！以鴨肉為主，可選辣和唔辣，唔辣的串燒亦有滿滿的孜然香，相當惹味！

飽肚之選：如果無食晚飯直接去掃小食檔的話都唔使擔心食唔飽，大家除了吃炒粉麵，亦可一試這款燒烤墨魚包糯米飯（$30），糯米飯將墨魚塞到漲卜卜，然後原隻放到烤爐燒，魷魚燒得香脆，但裡面的糯米就保持濕潤，配上濃郁的燒烤汁，實在令人食得滿足！

甜品精選：場內有大概七成檔攤都售賣鹹點，不過食完一輪鹹點都想吃些甜品中和一下，現場有一個燒烤檔兼售一款名為「發花燒」（$12）的甜食，做法有點似大家平日去燒嘢食燒綿花糖，將綿花糖放在方包上再放入焗爐，焗至麵包和綿花糖表面呈金黃色，上面再淋上朱古力或士多啤梨醬，一口咬落去，綿花糖有入口即溶的感覺，更會微微牽絲，甜食控可以一試。

食完熱的甜品，小編亦試了一款凍的甜品，全場唯一一檔涉出「仙氣」的攤位是出售一款韓式甜品，將乾冰倒進粟米條中，再淋上朱古力醬或焦糖，大家「趁凍食」，就可體驗鼻孔和口腔冒煙，玩味十足，是打卡呃like之選，不過一小杯的售價$33，抵唔抵就見人見智。

解渴之選：如果想買飲品，現場都有不少選擇，好似往年都曾經擺檔的即開冰凍小西瓜，今年繼續encore，另外亦有不少檔攤售賣椰青，同樣夠解渴。此外，小編發現一檔專售特色飲品的攤位，一律價$20，當中有黑牛、白牛、什果賓治等，亦有含酒精的長島特飲、cocktail等，選擇算多而且夠特別。 

最後溫馨提示：為了保持戲棚清潔衛生，請大家不要亂扔垃圾。 

更多小食推介：

>>《【必吃】青衣戲棚真君誕2016 ｜ 夜市小食特色小食搶先看～》

>>《先睹為快 青衣戲棚2016》 

下頁: 另一重要節慶！長洲太平清醮