香港都有得食！旺角出現降溫必備「冰碗冷麵」

留意開日本美食的你應該知道，京都月前一間懷石料理店人氣急升，事緣是有人於網上分享了餐廳的一款日式創意料理—「冰碗冷麵」。

香港都有類似食品！旺角一間人氣Cafe Coffee Jobs 將由6月18日起，推出一系列全新美食和特飲，當中最矚目的，一定是望見都透心涼的「海膽三文魚子冰碗冷麵（$168）」！

大廚預早一日冷凍碗狀冰塊，在製冰時加入花瓣，賣相更討好，繽紛的顏色亦會令食慾增加。

不似一般日式冷麵，廚師希望加入一點西式食品的元素，選用了同樣幼身彈牙的天使麵代替蕎麥麵。

以麻醬、青瓜絲、紅蘿蔔絲拌勻天使麵，再於麵上鋪滿各款刺身，包括日本海膽、帶子、三文魚子及熟蝦，最後灑上蔥粒和紫菜，味道清爽醒神，冰鎮效果一流，不過香港的天氣始終較熱，上枱後最好於30分鐘之內食完，避免變成水浸冷麵。

冷麵限量供應，每日下午4時開始有售，數量有限，賣完即止。怕撲空的話，最好在到訪前先致電餐廳問問供應量。

冰碗冷麵以外，份量十足的「鵝肝菠蘿漢堡包（$178）」、最近網路上爆紅的「曲奇杯子（$48）」和新出的「雙色榛子朱古力（$66）」亦值得一試，特別是那杯以Nutella 榛子醬製成的特飲。

飲品層次分明，奶泡上再有一層雙色cream，以蝶豆花天然色素製素的粉藍色忌廉很夢幻呢！

同樣是新推出的白朱古力士多啤梨沙冰（$58）味道則較一般，雖然冰粒打得夠幼細，但士多啤梨味就不太天然。