$148任食小籠包、糕點甜品！灣仔周末上海菜放題　

【更新@8月21日】

由於訂位眾多，餐廳已將任食時段分為兩輪，每輪兩小時，book位的話就記得留意一下！ 

-------------

周末不少家庭都會有聚會，去酒樓飲啖茶食個包，不過飲茶來來去去都是蝦餃、燒賣，有時都會覺得有點乏味！ 

想要點新意思，可以一試周末限定的「上海菜放題」，不只後生仔，連家中老一輩都啱食！

位於灣仔杜老誌道的上海佬菜館，由即日起逢星期六、日及公眾假期都供應任食套餐，每位只需$148，即可於11:30am-3pm期間慢慢歎盡超過40款食品。（*更新：任食時間為兩小時）

由涼拌前菜、上菜點心、小炒，至湯羹、甜品都有供應，任食食品的份量較單點時少，讓食客可以一次過試勻各款。

前菜都有8款，小編個人最喜歡雞絲粉皮和麻辣豬耳，涼拌小碟很醒胃。

點心方面，當然要點食上海菜必備的小籠包！小籠包即叫即蒸，每人每次有一件，輕輕一咬湯汁就湧出來，記得一定要趁熱食！

菜肉餛飩也是個不錯的選擇，皮薄餡多，上湯也十分鮮甜。

比較起來，生煎鍋貼就較遜色了！皮較厚和韌，而且外層煎得不夠香脆，肉汁亦欠奉。

至於小菜方面，師傅推介的「川椒子雞」果然無介紹錯！小菜炒得夠乾身，雞件與香辣味道融和，先辣後麻，層次豐富，可拌以簡單的炒飯和上海粗炒一起進食。

食完主菜就要食甜品，一共有6款，包括擂沙湯圓、酒釀丸子、西米糕及薑茶湯圓等，質素甚高。其中西米糕尤其足料，啖啖都有相當之多西米，味道清甜，值得encore。

唯一美中不足的，是任食套餐不包飲品，茶芥另計，豆漿、花茶等需另外收費。不過勝在食品款式多，上菜的速度亦幾快，觀察過旁邊幾枱的食客都食得滿意，未見有放題最怕的「漏單」情況，周末可以帶家人去一戰！