8檔長龍小食店抵港！台南美食節預告

不用花錢、花時間飛到台灣，留港一樣食得到地道的台式小食！ 

台南美食節將再次登陸鑽石山荷里活廣場，由4月15日至17日一連舉行3日，跟上年一樣，大會邀請了8檔台灣長龍食檔來港。

率先睇睇有咩食！

1. 招牌茶葉蛋豆干堡

講到台灣古早小食，又怎少得豆干呢？滷水豆干一開二，中間夾住酸菜和以10多種中藥材滷製的藥膳茶葉蛋，拎上手暖笠笠。豆干選用非基因改造的大黑豆製成，豆香味濃郁，茶葉蛋則滲住中藥材的甘甜，好味！

2. 麻油米糕

這檔流動攤販「糯夫米糕」於台灣極受歡迎，90後年輕男生老闆每日都會踩著單車遊走不同地方，售賣由「阿嬤味道」的糯米飯，米糕中充滿肥豬肉的油香，古早味十足。 

3. 酥炸思慕魚柳

台南不但出名古早食品，融合新式製法的小食也很受台南人歡迎。這檔「等天光三文治」以製作日式炸物的方法，酥炸「台灣名物」虱目魚柳，配搭沙律醬香口惹味。（記得趁熱食！） 

4. 香煎虱目魚菲力（Fillet）

台南人時時都會食到虱目魚，煮法繁多，這檔「長盈海味屋」就選擇了香煎的方法製作油脂最豐富的背鰭肉部份。運用了冷風乾燥法，魚肉Juicy之餘又有彈性，不用刻意落調味料都好食。 

其他即將抵港的小食包括手工蛋餅、招牌碗粿、刈包和狀元粿。各檔小食由1pm開始擺檔，只要捐出$20予港澳台灣慈善基金會，即可換領一款小食。每日數量有限，換完即止。