旅遊記者辭工搞市集　集雜貨+分享會+二手旅遊書交換

香港人終於去旅行係人都知，但復活節就唔係個個人都有機會去到旅行啦。未去到唔緊要，去旅人市集一樣買到異國好東西！「旅人市集」由一位前旅遊記者與近30位喜歡旅行的人士合辦，為更多旅行愛好者提供一個分享、交流的好地方。

市集將會係嚐品慕茶舉行，麻雀雖小但五臟俱全，有唔少靚靚文青野買！唔少人鍾意去日本、泰國買古著，市集亦有幾檔古著店，啱哂古著控。

日本神山之一的富士山未必個個都可以有緣見到佢嘅全貌，Chobakery就研製咗一個黑白兩色嘅富士山蛋糕，買一個當自己去咗喇！

除咗充滿異國特色既小攤檔外，市集仲有一個占卜攤位，提供占星測字、剖析驛馬運，挑選開運遠行方位等服務，幫大家旅遊前轉轉運。

而除咗買野食野外，旅行市集當然不少得有旅遊達人的分享會及二手旅遊書交換/漂書活動，準備去旅行的朋友仔可以睇睇有無心水，walk-in即可參加！ 

分享會時間表:

4月15日

2-3pm 航拍 · 看見台灣 by 台灣係咁玩

3-4pm 蒙古有機耕作義遊體驗 by VolTra義遊

4-5pm 240天歐澳紐「以畫換宿」 by 周圍行 Circle Walker

4月16日

2-2:30pm 南法薰衣草小旅行 by Zenobeebee à Paris

3-4pm 徒步旅行4256公里：穿越美國西部狂野行 by 重行人生 Walk Thru The Planet

4:30-5pm 法式香氣見學 by 聞香記  

另外，更搵來印章達人Jason 為市集雕了具旅遊特色的印章，如富士山、櫻花、俄羅斯等，屆時大家記得拎埋自己嘅手帳、日記簿去印啊！

以上圖片來源：fb@旅人市集