鬥智鬥力週末親子活動推介

週末想同仔女有多啲互動，但又未諗到有咩活動同佢地玩？不如參加基督教家庭服務中心舉辦嘅「急急跑全城」環保城市定向比賽。

11月天氣開始轉涼，一家幾口去參加戶外比賽就最啱啦！今次城市定向活動，父母唔單止可以藉此鼓勵小朋友要有合作精神，仲可以透過完成任務獲取環保知識，咁就可以邊玩邊學嘢啦！ 

比賽會以奪分制定向形式進行，喺限時內到達唔同嘅checkpoint，完成所需任務，每個checkpoint嘅分數會因著不同距離、任務難度等而有所分別。是次城市定向起點係九龍灣嘅「綠在觀塘」，終點則是啟德跑道公園。喺今次活動，家長可以同小朋友合作設計出比賽路線，唔洗去晒所有checkpoint，亦唔洗依次序走，一家人想點玩都得！

比賽最終會以積分最高者為優勝，如有同分情況就會以時間最短者取得勝利。取得最高分並最快返到終點嘅隊伍為之勝出。如果超過咗比賽時限，而參加隊伍仍然未能回到終點，就唔可以獲得任何名次。

一家人完成比賽後，仲可以喺比賽終點啟德跑道公園嘅大草地上享受日光浴，休息一番，過個舒適的週末，釋放返工返學嘅壓力。 

今次嘅活動目的，主要係為基督教家庭服務中心今年新成立嘅緊急援助基金籌款。緊急援助基金為遭逢不幸事故、意外或災難等突發事件，而出現經濟困難的家庭或個人，提供適時適切的過渡性經濟援助，協助他們盡快解決燃眉之急。主辦單位亦希望透過活動加強社區伙伴合作及推動環保。

今次活動仲有一班明星支持，你地仲唔快啲報名，11月6日截止喇！ 

活動詳細資料：http://www.cfsc.org.hk/tc/whatsNew/detail/1383 

資料來源：基督教家庭服務中心