「哈囉威香港」萬聖節好去處！6大打卡熱點兼玩Trick or Treat！

鬼馬南瓜+霓虹蜘蛛 遊遍6大景點

「哈囉威香港」派出笑瞇瞇南瓜、鬼馬幽靈和糖果小食呢班可愛嘩鬼，以繽紛搶眼霓虹燈飾、主題貼紙及藝術裝置造型同大家見面！想一睹佢哋真身的話好簡單，只要嚟到尖沙咀柏麗購物大道、星光大道、海港城、灣仔利東街、中環半山扶手電梯以及銅鑼灣祟光百貨呢啲旅遊熱點，就可以搵到佢哋踪影！有佢哋做背景，打卡絕對夠氣氛！

星光大道及海港城係唔少港人和旅客消遣勝地，今次有埋呢班嘩鬼出沒，氣氛當堂好熱鬧！

柏麗購物大道、銅鑼灣祟光百貨平日人潮躋湧，喺一片繽紛光影下更顯精彩！去蘭桂坊歡渡萬聖節的話，記得去埋鄰近嘅中環半山扶手電梯，睇吓捉到幾多隻小幽靈！

水陸兩路開展尋鬼之旅 再幫你量身plan路線

除咗喺人氣旅遊景點打卡，呢班嘩鬼更進駐咗各個交通工具！旅發局特選10個港鐵站作為據點，喺唔同位置上加入咗共10款具各區地道特色或地標元素設計嘅超萌可愛小幽靈。而中環站、金鐘站、灣仔站、銅鑼灣站及尖沙咀站，就以南瓜做主角，佈置成主題車站，與大家一齊chill一下，想打卡影靚相話咁易！

要搵齊10款超萌可愛小幽靈，就要到中環站、金鐘站、海洋公園站、銅鑼灣站、灣仔站、尖沙咀站、尖東站、深水埗站、欣澳站及東涌站探佢哋喇！

只要踏入中環站、金鐘站、灣仔站、銅鑼灣站及尖沙咀站，就會發現原來大堂、月台地面、樓梯、扶手電梯、牆壁、出入口等位置，已經被一班嘩鬼佔據！

原來今次活動唔只覆蓋陸路，就連海路都搵到佢哋！旅發局更特別設計咗巨型笑瞇瞇南瓜，置身中環碼碼同大家見面；而天星小輪及鴨靈號，無論外觀或內部佈置，都加入咗萬聖節元素！連開篷觀光巴士都一齊參與，喺夜間遊走港島區時好搶眼呀！

想再投入多啲？就要去埋香港國際機場、高鐵西九龍站及尖沙咀天星碼頭嘅旅客諮詢中心，大玩Trick or Treat同享受甜蜜糖果外，仲有專人為你量身訂制個人化嘅萬聖節行程！

今個萬聖節準備好造型就即刻Let’s go啦~

今次萬聖節活動覆蓋範圍廣泛，就好似將港九區變成大型派對場地一樣，令港人與旅客一同感受歡樂氣氛。

詳情：https://www.discoverhongkong.com/hktc/explore/culture/halloween.html

資料由客戶提供