市區村屋係咪又平又大又方便？ 網民熱議：市區村屋有咩優點同缺點？

市區村屋除咗驚盜竊之外冇咩缺點？
樓主表示位於荃灣、將軍澳、沙田等等比較近市區嘅村屋可以車泊門前，樓下就有大排檔，而且15分鐘就可到達港鐵站，非常方便，另外村屋亦有天台，雜物更可以放喺屋企門口，所以就認為除了天線問題同打風會比較麻煩外，唔知住市區村屋仲會有咩唔好。有網民就認同樓主嘅睇法，認為除咗有盜竊問題以及窗戶細小外，市區村屋冇咩缺點：「除咗驚盜竊之外都真係冇乜」、「除咗唔夠大窗透光，村屋其實唔錯，市區村屋網速唔慢，行4-8分鐘有公共交通或商場，有花園/天台，靜就要睇你喜好決定優缺點，有賊爆格村屋私樓都遇過，不是(過)相對村屋難防啲」

村屋樓又平車位又平仲可以慳埋管理費？
亦有網民認為住村屋地方又大又平，使費亦較少：「村屋平好多，我依家住緊嗰度唔計花園天台，2000尺(呎)，千四萬買到，仲泊到兩架車」、「d(啲)車位好平，幾百蚊就搞掂」、「如果唔係屋苑，仲唔洗(使)比(畀)管理費」，更有網民認為住村屋對於養狗人士較為方便：「住村其中一個好處就係可以養大狗，帶佢哋散步屙屎屙尿又方便，放假又可以揸車同狗狗出去玩」

有網民認為市區村屋交通便利及鄰近商場，更有花園以及天台，除了有盜竊問題外並沒甚麼缺點。

亦有網民認為村屋車位平以及樓價平，若非屋苑式的村屋更可節省管理費。

冇明火煮食上網費又貴？化糞池有機會喺屋企廚房？
不過亦有網民問到：「明火煮野(嘢)食要石油氣同上網慢算唔算缺點？仲有地下果(嗰)層每年要吸糞？」，有網民就指有啲村屋連明火煮食都冇：「而家啲新村屋好多好似新樓咁連明火都冇，得電磁爐」，而上網方面，有網民就指不少村屋都可以安裝光纖，不過收費昂貴：「而家好多村都有光纖入村架(㗎)喇，不過月費唔平同埋好多都係獨市得一間揀咁解」、「我見人哋200落樓，我要200up，仲要安裝費，仲要成棟一齊裝上網公司先同你拉線」、「村屋光纖真係好那貴」，有網民更指有部份村屋嘅化糞池位於廚房，感受噁心：「之前睇過村屋注意嘅片，個化糞池係(喺)廚房位，諗起一打開果(嗰)陣味，仲有條啡色嘅吸糞喉經過間屋入廚房」

隔音差到連樓上行房聲都聽到？車到門前一係貴一係冇？
有網民就指村屋隔音差，始終難以避免會有噪音問題：「隔音好差」、「嘈真係要考慮，唔係個環境嘈，而係因為住得矮，尤其夜晚，樓下街有人行過，街外打個乞嚏，你都覺得好似係(喺)你耳邊咁近，以前住開大廈完全冇諗過呢個問題」、「以前住中間，成日聽到樓上幾時痾尿，如果有人嚟gathering實好嘈，嘈到凌晨，跟住又成日聽到佢哋扑嘢，第朝見到仲要扮冇嘢打招呼勁尷尬，最後就係好多人閂門都好大力，砰一聲成棟樓都震晒，呢啲真係要住過村屋先會知」

更有網民對樓主話住市區村屋可以車到門前呢個講法抱有質疑：「市區村屋唔好諗車到門前，一係貴，一係冇，如果租嘅，門口唔會有咁嘅空間，因為都拎嚟起同埋做路出入，同埋村長又點會畀你咁玩，你交埋租車位咪當路費囉，唔通畀你免費行咩，交通方便又係村屋係佢哋賣點嚟，點會又畀你揸埋車咁爽皮」，有網民亦指住村屋喺購物送貨方面可能會有麻煩：「仲有如果車唔到門口，買大件嘢送貨要俾推路費，唔係地下就逐層計搬樓梯費，而且多數要你出村帶佢入嚟，唔似大廈咁可以安坐家中等送貨」

有網民指部份村屋欠缺明火煮食而且光纖上網費昂貴，而化糞池更有機會位於廚房當中。

有網民認為村屋隔音差，很容易聽到樓上樓下單位所發出的聲音。

有網民指市區村屋未必能夠做到車到門前，而另外於購物送貨時亦可能需額外收費。

text/Jonathan
photo/HKET圖片庫

============
同場加映：
【蝸居睇樓團】又一村750呎單位 原則超唔好用？ 打卡圓鏡梳妝枱 弧形櫃用料2大Tips