港島東區私人屋苑比較 網民熱議:太古城定嘉亨灣好住啲?

2022.11.08

港島東區有唔少質素高嘅私人屋苑,位於太古嘅太古城以及西灣河嘅嘉亨灣亦係其中之一,而呢兩個私人屋苑又究竟邊一個會好住啲?最近就有網民喺連登討論區上發文,比較太古城同嘉亨灣呢兩個港島東區嘅私人屋苑,因而就引起一眾網民熱烈討論呢兩個私人屋苑到底邊一個較為優勝!

嘉亨灣海景一流又有會所?
樓主表示太古城同嘉亨灣嘅呎價相近,附近配套亦都差唔多,但太古城嘅居住人口年齡都比較大,所以就問到一眾網民嘉亨灣算唔算完勝太古城。有網民就認同樓主嘅睇法,認為嘉亨灣與太古城相較下,擁無敵海景同會所嘅嘉亨灣更勝一籌:「預算夠而想買靚野(嘢),一定係嘉亨,嘉亨三房套全海樓王睇過好難返到轉頭,不過3千(萬)都無的話諗都唔洗(使)諗」、「嘉亨灣個海境(景)好好J嫁(㗎),係遠少少咪行多5分鐘到,但靜d(啲)喎」、「尺(呎)價已經反映哂 差幾千蚊一尺(呎)點比較,嘉亨灣個位臨海同得10幾年樓又有會所,太古城舊咁多,環配套好我不如買康山」、「嘉亨灣有會所,太古城冇」

 

有網民認為嘉亨灣有一流海景、樓齡較新以及擁有會所等優勢。

 

嘉亨灣開則唔實用?單位好食風好嘈?
不過亦有網民認為嘉亨灣嘅單位開則細以及唔實用:「嘉亨灣稹(則)差,冷氣台係(喺)室內太壓迫」、「嘉亨細積(則)係劣到頂唔順,係得D(啲)大單位嘅積(則)叫做好小(少)小(少)」、「嘉亨灣岩(啱)岩(啱)落成個(嗰)陣有親戚由和富搬過去,最終覺得個積(則)太唔實用,幾年後搬番(返)和富」,更有網民指嘉亨灣嘅單位又嘈又食風,打風落雨會比較麻煩:「嘉亨灣冇咁舊,不過落雨打風麻煩啲」、「嘉亨灣食風都食飽」、「嘉亨灣向海單位好嘈」、「好食風,加上佢個位係西灣河嗰區嘅渠喺佢嗰度排出海,臭x到x街」

 

亦有網民認為嘉亨灣有不少的缺點,當中包括有開則不實用、當打風落雨時亦較麻煩。

 

太古城開則較實用?生活配套又完善?
亦有唔少嘅網民持相反意見,認為單位實用率高嘅太古城較為優勝:「太古城實用率高啲,近地鐵啲」、「太古城靚積(則)」、「太古城係勝在個屋無乜主力牆,成間可以任砌,就算鑽石廳都好多野(嘢)可以玩」、「我去睇海景花園,間間都改曬(晒)積(則),每次都好有新鮮感」,亦有網民指出太古城生活配套齊全:「唔嫌樓齡高啲,投資回報麻麻,太古城係好好住,交通生活配套全部有齊,居住環境又幾企理」、「積(則)靚實用率高,同埋生活配套齊」、「太古城有商場買嘢方便-品牌齊全」,更有網民指出太古城嘅海天花園位置一流以及具有升值潛力:「海天位置無得輸,樓齡又相對上無咁舊」、「如果太古城講投資,真係得返佢仲有D(啲)買入潛力,其他日後想出貨嘅都唔係咁易」

 

有網民認為太古城單位較實用,交通以及生活配套完善。

 

太古城空氣質素差?又舊又多問題?
不過有網民亦指出太古城樓底矮同樓齡舊,將會有愈多問題出現:「太古城真係太舊啦」、「太古城出名咩?出名樓底矮,出名舊」、「太古城舊,怪人多」、「屋企人住太古城,經常無廁所水,始終樓齡有返咁上下,會愈黎(嚟)愈多問題」,亦有網民認為太古城又嘈空氣又差仲要附近冇公園:「太古城對住條高速(公路)好多塵」、「真心唔明太古城有乜好,又嘈空氣又差冇乜公園」,不過就有網民隨即反駁太古城鄰近冇公園嘅說法:「太古城冇公園?住宅樓下已經N個花園仔+遊樂場,商場仲要直通鰂魚涌公園」、「太古城個公園行到去北角同筲箕灣」

 

亦有網民指太古城樓齡太舊,經常會有暫停供應廁所水的情況發生,以及因鄰近高速公路導致空氣質素差。

 

text/Jonathan
photo/HKET圖片庫

 

============

同場加映:

【家居達人】跟家居維修義工隊上門!搶救廁所外牆滲水+更換霉爛電掣面板

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【限時搶】西班牙Valor無添加糖85%黑朱古力!↓

↓ Bean to Bar生產 / 不含麩質!準時入App換領! ↓

 ↓ Bean to Bar生產 / 不含麩質!準時入App換領! ↓

↓【U Jetso】便利妥®「噴鼻妥」!↓

↓ 立即入App睇換領詳情 ↓

↓ 立即入App睇換領詳情 ↓

評語

相關文章