住公屋網民求救：阿媽覺得屋企有鬼！ 想分戶申請另一間公屋，而家可以點算？
好多人都覺得喺香港輪候到公屋，已經算係人生勝利組，點知有網民喺連登討論區求救，話自己一家四口，好唔容易先輪到間4人公屋單位，點知樓主阿媽喺屋企跌親之後，話瞓覺嘅時候有鬼搞佢個頭同腳，仲話間房有燒焦味，全家為呢件事嗌晒交，阿媽仲想直接分戶拉埋樓主個妹去申請一間公屋……大家覺得樓主可以點解決呢？
阿媽瞓覺有鬼搞 間房仲有燒焦味
樓主話阿媽一向好迷信，搬入單位前都問過房署，間屋之前有無人喺度死過！而房署回覆係「無印象」，所以樓主假設間屋「乾淨」，但阿媽就唔知喺邊度收到風，話上一手有個婆婆心臟病發死咗，所以阿媽「係搬入黎之前已經搵過人整過間屋」。
但自從樓主阿媽有一次喺屋企跌親之後，問題就開始：「自從我媽係屋企跌親，佢就開始話有鬼搞佢，話要搬。成日話瞓唔好、瞓的時候個鬼搞佢隻腳/頭、間房有燒焦味/撈麵味/香味/臭味，我媽就是強調呢d係提醒你唔可以住人的，要搬。咁我就覺得係樓上樓下的食物味傳過黎（嚟），香臭味可能係間房的香薰影響，但無論我地（哋）點解釋都冇用，我媽都係堅信間屋有問題。」，樓主同父親都唔迷信，而且其他家人都「無事」，無奈阿媽真係迷信人：「佢平時又好鍾意聽d『師傅』講故事、解答疑問個d，唔知係咪聽得多，搞到越黎（嚟）越迷信。咁我同我老豆都係唔信呢d嘢，就算有，我覺得一家四口，唔會淨係搞佢掛？我地幾個又咩事都冇？」
樓主話阿媽自從一次跌親之後，就覺得屋企有鬼搞佢，同時間房成日有怪味。
樓主阿媽收到風，話單位上一手住客係心臟病發死，因而覺得單位「唔乾淨」。
阿媽想分戶 同妹妹另行申請公屋
自此樓主一家經常為呢件事而炒鬧，而且全家都好遷就阿媽：「佢話張床的位置唔啱，我地移下（吓）床；間房的燈唔可以係圓形，我地換；瞓果間房有問題，貼咩放咩係間房度、搬去隔離房瞓（三個人逼係一間房），甚至佢自己係廳的梳化瞓，諸如此類。」，但係阿媽講到要搬屋，樓主都覺得真係好難遷就：「因為真係等左好耐好耐先等到4人單位」。但無論樓主同家人點解釋，阿媽依然覺得間屋「有嘢」，想直接分戶拉埋樓主妹妹去申請另一間公屋，而妹妹又「竟然」聽阿媽話……而家樓主打算過幾日去房屋署查詢究竟個單位有無死過人，但樓主心諗無論個回覆係「有」定「無」，阿媽應該都唔會理，心煩之下惟有問網民意見。
樓主話全家都好遷就阿媽，包括移床，搬房瞓等，全家人仲成日為屋企有鬼呢件事嗌交。
樓主媽媽堅決想搬走，仲諗住分戶拉埋妹妹去申請另一間公屋，而妹妹又「竟然」聽阿媽話……
迷信嘅人都係求個安心 搵師傅做場大法事
網民見樓主母親如此迷信，都傾向叫樓主以迷信方式，令阿媽心安：「搵人做吓法事囉！可能搬第二度隻鬼又跟住你阿媽，迷信嘅人其實都係求個安心」、「咁信d 師傅咪岩（啱）囉！請個師傅，係咁易， 上黎（嚟）畫下（吓）符、灑下（吓）水，話俾佢聽趕走左（咗）隻野，貼左（咗）符，就無事」，但樓主無奈回應：「試過搞法事（唔係好大型個d），我媽話請左（咗）佢出去，隻鬼又翻左（咗）入黎（嚟），搞佢隻腳/有燒焦味etc」，網民質疑：「做完法事係牆上畫符，仲點入來？」，但有網民覺得應該做得更徹底：「大陣仗啲，一日中式，一日西式，一日泰式，然後屋企放到滿天神佛，我覺得有啲鎮宅嘢例如十字架，佛像係有必要，因為可以令令堂覺得有啲嘢壓場！」、「洗（使）少少錢搵個演員扮師傅棍佢，搞一輪嘢話已經超強渡咗隻鬼咪得！但要畀到心理暗示你阿媽，等佢信嗰個所謂嘅師傅先得」、「對付迷信嘅人，只可以迷信過佢，當你仲癲過佢，佢就唔敢再癲」。
好多網民覺得樓主媽媽咁迷信，似乎應該搵師傅做場大法事，先至可以令阿媽安心。
網民覺得樓主阿媽嘅「凶宅論」，其實唔成立：「似老母疑神疑鬼多過真喺有嘢，就算上手有個阿婆死，又點會喺凶宅？阿婆又唔喺自殺，如果自殺死亡都計凶宅，全港大撚把凶宅」、「自然死唔會變兇（凶）宅，通常都唔會講，除非個客問點解上手搬走，度度都死過人㗎喇，一年幾十單係公屋既（嘅）空中飛人」。網民甚至懷疑樓主母親，可能係精神有問題：「喺自己屋企病死又唔算兇宅嘅，房署當然唔會同你講。如果真係打咗齋你老母都唔信，咁送佢入青山算啦！」、「係搬左（咗）黎（嚟）新屋先係咁? 似係唔搬就會日日疑神疑鬼，可能有精神病！」、「建議睇精神科」、「送你老母去青山」，但有網民回應：「青山都有鬼！」
樓主阿媽心理上覺得上一手業主喺單位過身，單位係凶宅，但網民都覺得自然死唔算凶宅，反而懷疑樓主阿媽精神有問題，不如去睇醫生。
有網民抱住「陰謀論」咁諗樓主阿媽：「調返轉諗，你媽係唔係想借機會分户？1間變2間，所以一個人做大龍鳳呃哂你地全部人？咁到時社工同房署上嚟家訪就似層層」，有網民想法比較實際，建議樓主自己搬出去：「點解唔出面租樓住？」，但樓主無奈回應：「貴，我地窮！」，但網民話：「依家樓爆，租樓好平」，亦有網民提議：「用綠表買居屋」。
有網民提出「實際」建議，勸樓主不如趁租金平，搬走另行租屋住。
text/Joyce
photo/HKET圖片庫
============
同場加映：
【家居達人】跟家居維修義工隊上門！搶救廁所外牆滲水+更換霉爛電掣面板
港生活人氣本地熱話
↓【限時搶⚡】森源安睡足艾貼↓
↓吸走體內毒素｜改善血液循環 ↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
