網民求救：鄰居晚晚唱幾個鐘頭K 連阿媽都想買機唱埋一份！可以點做？

樓主話自從某日見到鄰居屋企門口放個集運袋，有個勁大盒類似partyroom用嘅唱K機後，翌日返到屋企，已經聽到鄰居「開演唱會」：「佢已經唱足一個禮拜，由初初每日唱一個鐘，變到而家每日7點準時開波，唱到10點半先肯收咪」。不過更令樓主意外嘅係，阿媽竟然聽到心郁郁，都想唱埋一份！「最慘唔係佢每日唱歌，而係佢搞到我阿媽都話想買呢部嘢返嚟唱要同隔籬battle！好想問鄰居可唔可以借我阿媽玩吓就算，再唔係買多枝咪每晚過去同佢一齊唱得唔得！最衰都係我鄰居，做咩買呢啲嘢返嚟呀！」

樓主話鄰居晚晚唱K約3至4小時，儼如開個人演唱會一樣，更搞到阿媽心思思，都想買套卡啦OK裝置返屋企唱K。

不如同阿媽一齊過去唱，打好鄰里關係！
雖然樓主好似好愁，但網民都安慰樓主，其實鄰居已經算好識做：「你鄰居己經算好好！十點半收咪，以前我同層有個唱到夜晚成點鐘都重係度唱，佢樓下上嚟拍佢度門，佢哋重死撐自已冇錯！」、「唱到10點半算好好，起碼都知道夜已深，係時候靜啦！」，樓主無奈回應：「雖然佢較細聲咗，但係我間房仲好清晰聽到佢唱咩歌，有時仲可以玩估歌仔！」。對於樓主阿媽都想唱埋一份，網民都覺不如乘機搞好鄰里關係一齊Jam歌：「你可以同你阿媽一齊過去唱打好鄰里關係」、「獨樂樂，與人樂樂，孰樂？一場鄰居，叫你啊媽同佢合唱嘛！」

好多網民都話其實樓主鄰居唱到約10:30pm就收咪，已經係好識做，更有人話試過有鄰居唱到半夜，搞到樓下住戶前往拍門制止。

網民話樓主不妨同阿媽過去同鄰居一齊唱K，乘機促進鄰里關係。

text/Joyce
photo/HKET圖片庫

============

同場加映：

【家居達人】跟家居維修義工隊上門！搶救廁所外牆滲水+更換霉爛電掣面板