坐月禁忌多,唔出得街、要用薑水抹身洗手 網民熱議:孕婦產後要坐月嘅諗法 其實係咪不合時宜?

2022.11.16

當家中有新生命誕生顧然係一件喜訊,但坐月對於剛成為媽媽嘅女士嚟講又係咪必需呢?最近就有網民喺連登討論區上發文,指女士產後要坐月係非常白痴嘅行為,認為應要淘汰產後要坐月嘅思想,結果就引起一眾網民熱烈討論坐月到底重唔重要?

坐月毫無根據?無厘頭禁忌多多?
樓主表示坐月毫無根據,認為只有中國人要坐月嘅現象十分荒謬:「香港人咁憎中國,呢d(啲)傳統既(嘅)思想又信到十足十,仲冇根據過中醫,全世界得中國人體質特別唔同,生完要坐月,諗下(吓)都知白痴喇,香港d(啲)女人真係特別onX」,有網民就認同樓主,認為坐月期間有太多令人不解的禁忌:「戇xx文化」、「傳統d(啲)坐月呢樣唔得果(嗰)樣唔得真係好x onX」、「唔掂得水、唔飲得水、唔吹得風、只可以用薑水抹身、飲炒米茶呢d(啲),仲有大把onX野(嘢)」、「最唔明點解唔可以掂生水,連洗手都要用薑水,日日煲薑水煲到懷疑人生」,亦有網民認為坐月係一種迷信:「我覺得係一種令人唔敢唔信嘅迷信,你唔坐好個月老左(咗)就知味道,就好似做壞事落地獄咁上下」

有網民認為坐月時有非常多令人不解的禁忌,禁忌毫無根據,是一種迷信。

坐月好重要?情況似做完手術後?
不過亦有網民認為坐月相當重要,等同於手術後獲充分休息:「果(嗰)啲話唔洗(使)坐月嘅人係咪onX,生過仔再講啦」、「其實坐月真心唔onX,講真生仔同做完個大手術無咩分別,做完手術醫生都會比(畀)個病人抖下,更何況生完仔之後返屋企係要面對多個B」、「生完就好似人地做完手術咁,充分休息下(吓),維持均衡飲食,食少啲難消化/煎炸既(嘅)野,等身體回復,請陪月就當係搵人幫手睇下(吓)細路,同埋教下(吓)我地點做埋身護理」、「其實所謂坐月,係講緊生完果(嗰)個月抖下休養,唔係講緊要點樣補糖水/食療,陪月係指係幫輕個媽媽湊小朋友,等佢可以好好抖返一個月,無咁易產後抑鬱姐(啫),有啲人會請陪月,有啲人係屋企人包辦,其實外國都一樣有產假」

亦有網民認為坐月相當重要,等於做手術後需要充分休息一樣。

 

過時嘅習俗要捨棄?坐月坐得唔好會多病痛?
而有網民就指出坐月對於產後婦女是必需,但對於坐月當中某些過於守舊嘅禁忌就應該要捨棄:「坐月其實只係產後調理,不能否認傳統坐月有好多不合時宜嘅陋習,但根據情況去取捨就得,女人產後要休息其實係公認嘅,如果唔係點解會有產假,唔同國家都有坐月嘅習慣,只係冇中國傳統坐月咁多禁忌,所以坐月唔onX,只係中國傳統坐月有捨棄舊元素嘅必要,但休息係絕對需要」、「其實坐月係好事黎(嚟),留係(喺)屋企休息一個月,但咩唔比(畀)洗頭果(嗰)d(啲)習俗真係弱x智」、「又唔洗(使)咁非黑即白講到坐月一定要跟足/完全冇用咁嘅,有d(啲)不合時宜其實唔洗(使)跟,唔比(畀)沖涼洗頭掂水一個月真係痴(黐)線,要長時間休息、湊b 、調理下(吓)身體係真」

不過亦有網民分享指自己當年並冇好好坐月,身體的確出現唔少嘅毛病:「我都唔信,無坐到月,日日掂生水凍水洗野(嘢)洗奶樽,洗咗一個星期啲手指關節痛到郁唔到」、「用生水洗手又真係手啲骨會痛,我從來無骨痛問題」、「我都無跟足,涼照油(沖),頭照洗,咩補嘢都無食,但每次沖完涼都用薑水淋身,但第二星期開始無啦啦成身起風癩,加夜晚半夜起身餵奶沾寒沾凍」、「當年坐月坐得唔好,過左(咗)半年之後就仆x啦,條腰骨係痛到起唔到床,行唔到路,嗰段時間要一直要去睇中醫同針灸」

有網民認為坐月中有部份過時守舊的做法應該要捨棄。

請陪月員好貴?可幫輕新手媽媽?
有網民亦討論到請陪月員嘅費用非常昂貴,相當之唔合理:「陪月收3、4萬一個月先顛(癲),我懷疑有陪月集團背後吹風話坐月好緊要」、「真,越收越貴,根本就係一啲老人家都噏得出嘅知識,唔明點解要咁多錢去請人,返去問父母長輩實教到你」、「啲阿姐又唔係個個經驗足,錢就收硬你,同做裝修個啲咪一樣,食硬你啊」,不過亦有網民指出陪月員嘅工作煩忙,而且要有相關經驗及知識先能夠勝任,其實收費亦算合理:「其實陪月都好多野(嘢)做既(嘅),都唔易做,又幫你湊b,教你點湊,又煮埋飯,有啲仲會幫你催乳可以餵到人奶,其實真係幫輕媽咪,無咁吃力」、「有幾貴,返足24小時,夜晚小朋友2個鐘起身一次喎,煮飯煲呢樣嗰樣先得4皮」

有網民認為陪月員收費相當高昂,但亦有網民表示收費合理,因陪月員需處理多項事情以及有專業知識。

text/Jonathan
photo/HKET圖片庫

============

同場加映:

【家居達人】選購風扇燈6大貼士樓底幾高先裝到?邊款最涼最光?

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【U Lifestyle App聖誕周年慶】DayDay送大禮!↓

↓勁送機票/電話/遊戲機等巨獎!↓

↓勁送機票/電話/遊戲機等巨獎!↓

↓【聖誕送禮】送Soul Emotion Pro / Emotion Max耳機!↓

↓立即參加贏走!↓

↓立即參加贏走!↓

評語