網民熱議：新居屋揀樓，值唔值得用公屋換兩房安秀苑？ 定應該等綠置居？樓市跌緊係咪應該買居屋？
「居屋2022」的申請人將於11月15日開始揀樓，一眾有得揀樓人士，當然已經做定功課，但買樓真係人生大事，好多嘢要考慮。有住緊公屋嘅網民就喺連登討論區發帖，問喺而家呢個樓價持續跌勢嘅環境下，值唔值得用一層公屋換一個大啲嘅居屋單位？大家點睇呢？
樓主本身住緊秀茂坪嘅公屋，綠表一般家庭排到大概第1700位左右揀樓，亦並非家有長者計劃，「但黎（嚟）緊居屋2022應該有機會揀到安秀苑大單位（其他熱門嘅應該冇機會），但如果揀咗就冇得抽綠置居，係呢個樓價又跌緊嘅大環境，大家覺得好唔好用一層公屋換一個居屋大單位？」，
樓主用綠表抽新居屋，即將到揀樓期，諗緊係咪值得用現住嘅公屋單位換到安秀苑大單位。
新居屋唔實用 住和諧式公屋唔值得樓換樓？
有網民就覺得樓主不妨等埋綠置居嘅結果再決定：「如果你住緊和諧式，除非係細屋搬大屋，否則我覺得繼續住仲好，新居屋冇咁實用，但住緊井字型就可以諗諗，不過你個號碼咁後，應該可以睇埋今期綠置居攪珠結果再決定」，點知正正講中咗樓主心聲：「我正正係咁諗！但15號已經開始揀，陣間佢要我決定要唔要，我等唔到綠置居就頭痕…… Ching知唔知個流程係點樣？，利申係住緊和諧型，個則靚仔既（嘅），但想要更大」，有網民就話雖然樓主有機會等到綠置居，但未必有機會有兩房單位：「居屋長者隊揀樓都要成個月先到家庭隊，綠置居又第四季攪珠，你好大機會等到結果喎！不過綠置居都係得7百幾個兩房，長者隊都1,400個配額，就算你家庭隊排得前都係得一房，咁安秀兩房又似乎更好」。
有網民覺得樓主揀樓號碼偏後，有機會等到綠置居，不過未必有機會可以有兩房單位。
長者揀完樓先到核心家庭 得長者得天下
樓主追問：「其實係咪即係就算個No.幾靚，都係要等長者隊揀完先有份？」，網民回應：「揀樓次序：1. 受房委會已公布石籬中轉房屋第 10 及第 11 座清拆計劃影響的合資格家庭申請者；2. 長者隊：1400個單位；3. 家庭隊。即係長者隊買完1,400個單位之後，先到家庭隊排第一嗰個去揀，所以得長者得天下」、「一定要2,800個長者家庭揀完樓，先至到綠核白核，估計得返好少兩房」，所以有網民鼓勵樓主：「如果今次有兩房，座向唔差就直接搞掂啦，唔駛煩，反正綠表可以收樓先搬，早d有定局方便人生規劃」，樓主都覺得：「係啊， 我都係咁諗，下期綠置居根本冇機會要到大單位，所以今期有就去馬」。
其實核心家庭資格人士嘅揀樓次序，喺「家有長者優先選樓計劃」之後，所以屆時有機會已經無心儀嘅單位選擇。
對於近期樓價持續跌勢，係咪應該喺呢個時候買居屋，有網民就覺得居屋都算無得輸：「居屋其實唔會點輸。有政府幫你頂左（咗）3成。如果一間300萬既（嘅）居屋，跌到落200萬。政府本身幫你90萬而家變左（咗）60萬。咁你係咪可以買埋政府個份？係既（嘅）話其實進可攻退可守。」
由於居屋買家可以獲得政府擔保保，所以網民認為即使樓價持續跌勢，買居屋都仲係無得輸嘅。
text/Joyce
photo/HKET圖片庫
============
同場加映：
【蝸居睇樓團】大角咀粉紅日系新婚愛巢 房中房和紙趟門夠慳位、中島開放式廚房
港生活人氣本地熱話
【送禮🎁】送Esther Bunny春日好物🐰！
↓ 登記免費帶走可愛折疊傘 x 保溫杯 ↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
