假設閣下而家手上嘅買樓預算有約1,000萬，咁你會揀大型屋苑？定係會買村屋呢？有網民喺連登討論區發帖，話覺得住村屋養寵物無王管，又容易搵車位等，比起住如日出康城呢啲大型屋苑，樣樣都有住客公契話唔畀做，又要日日逼電梯之類嘅生活，如果有1,000萬買樓，寧願買村屋都唔揀日出康城，結果引嚟網民熱烈討論，由上網網速到泊車，村屋嘅維修費以至「唔識熟人唔好買」等，原來箇中真係好有學問。
住村屋其實係買生活態度 住大型屋苑係奴隸社會象徵？！
樓主嘅睇法，係覺得住村屋「村屋=生活態度，養寵物養狗冇人管，喺露台天台周圍晾衫整乾把遮冇人管，出門口唔洗（使）迫lift，車位易搵，揸部車唔洗（使）迫公共交通工具，以上幾點已經贏晒！」，至於住大型屋苑嘅生活，就係「康城（同大型屋苑）=奴隸社會象徵，棟棟40層以上幾萬人迫埋商場上蓋，樣樣有公契呢樣唔比（畀）做嗰樣唔比（畀），試下露台晾衫都比（畀）其他人投訴話影響屋苑形象，迫完lift迫完商場再迫完車先到自己想去嘅地方……見到康城呢啲環境真心想笑，種feel似全日7x24做緊奴隸，一至五office hour就公司奴隸，夜晚同星期六日就黨鐵奴隸+迫入狗竇，村屋唔同，可以玩free style到極致」，所以樓主話如果有1,000萬，「寧願揀村屋都好過康城呢啲大型屋苑」。
樓主認為住大型屋苑，住客公契好多樣嘢都唔畀住客做，有種做社會奴隸嘅感覺。
康城9按揭首期100萬，村屋只得6按首期要400萬
有網民贊同樓主嘅諗法：「真，村屋揸車可能仲方便過康城」，亦有網民覺得唔使變強制檢疫大廈亦係住村屋優點：「淨係一世免疫大廈強制核酸檢測呢樣野，村屋已經贏左九條街」，甚至有網民幻想：「1,000萬分分鐘買到3層連花園，有自己車位加埋差電，得閒又叫埋d朋友嚟bbq」，不過有網民指單喺按揭方面，完全無得比：「按揭成數都唔同，康城9按100萬首期，村屋6按400萬首期」。
但點知網民隨即數出大量住住屋嘅缺點：「你唔怕有人入屋偷野咪OK囉！」、「村屋好臭」、「隔離鄰舍太嘈或者太X街都係無人管」、「讀書時期住村屋，一翻（返）市區住嗰年開心到X街，淨係出夜街唔洗（使）就住已經覺得好爽」，有人問：「會唔會有好多蚊？」，隨即有人回應：「係好撚多，黃昏拎電蚊拍出花園好好玩」。有網民話住村屋，保養維修都比較花錢：「維修保養你就知出事！間屋可能70年左右打柴，要住耐啲又要洗（使）大錢維修保養，呢次無人同你除開，唔係1千幾百搞得掂」，但即刻有網民反駁：「屋企兩棟村屋住左（嚟）幾十年，最近大裝修用黎（嚟）出租，結構得少少石屎剝落問題，用多咗我一皮，想問下（吓）有咩大錢？！」、「你住過未？村屋先易，結構好簡單，衰d講，起過先兩三球」。
有網民覺得1,000萬可以買到一棟層高村屋，又可以叫朋友嚟BBQ，覺得村屋買得過。
亦有網民提出，村屋同康城嘅首期分別好大，康城9按100萬首期，至於村屋就係6成按揭，首期要400萬。
網民指出住村屋有好多缺點，除咗容易有人入屋偷嘢，去夜街唔方便外，維修都要使一大筆錢。
有網民講笑話住村屋就唔使擔心所住大廈要強制檢測。
今時今日大部份村屋都有 1000M 光纖入屋，你仲同人講得8mb上網？！
有網民分享住村屋嘅苦：「你住完村屋就唔會咁諗。買車平（幾皮都好靚㗎啦），但養車好X貴，揸車出街剩係停車場，你都已經唔想揸出去。擺5個鐘朗豪坊夠我坐的士九龍返新界呀大佬！仲可以飲兩杯。市區落樓就有野食。新界你買多啲杯麵擺屋企咩，有買燒賣擺雪櫃，但有時累根本唔會蒸。仲有村屋上網慢，人地玩緊1000寛頻，呢邊8mb，朋友入黎（嚟），無野（嘢）做播片，佢問做咩你睇片咁矇嘅。手機平時用5g，無留意電腦播片用寛頻8mb」，點知講到上網速度問題，立刻引來大量村屋網民反駁：「當今時今日大部份村屋都有 1000m 光纖入屋，你仲依然同人講得8mb 上網，係你追唔上時都代步伐，定剛剛出冊？」、「用緊hkbn 1000mb覆你」。
過往好多人都詬病村屋嘅上網速度慢，但有村屋居民指而家好多村屋已經有1000m 光纖入屋，已經唔係住村屋嘅缺點。
村屋易泊車真係得啖笑，以為仲周圍都吉地俾你擺？
而對於住村屋泊車易搵位，亦有網民指係「錯覺」：「村屋易泊位真係得啖笑，以為仲十幾廿年前周圍都吉地俾你擺/有得租？大把村本身都無位擺車，有得泊仲要擔心有無瓦遮頭，我而家泊個度有得遮見到其他車主夏天要著車行煲冷氣/ 開門散完熱先出得車都覺得辛苦！同埋村啲渠好多都好垃圾，好多都明渠/直出大渠」、「一陣封左（咗）條私家路，睇你點揸車」，講到泊車，網民都好感慨：「住康城而家咪一樣要擺爛地」、「冇車位，要泊露天其實就算屋苑都會有呢個問題，單棟樓嘅話仲麻煩，座樓冇車場嘅話要周圍搵車位」。
不少人都以為住村屋容易有泊車位，但有網民表示而家住村屋，好多村都未必有空地泊車。
村屋嘅土地業權複雜，仲要同原居民打好關係
有網民提出：「村屋只可以租，唔可以買」，有網民回應話係可以嘅：「是可以的，只是銀行唔會按咁多，同文件較多」，甚至有網民話：「村屋買完隨時會無X咗」即刻有網民回應：「點會，你簽哂文件架嘛，香港係法治城市」。但其他網民接力討論，話村屋當然法律上係可以買賣，但村屋買唔過，係因為有好多問題，例如「轉手難」：「村屋租咪得，點解要買？！唔係好多人願意接手村屋」。
另一個重要關鍵，原來係「地方勢力」：「唔係講緊按揭，係講緊地方勢力，簡稱鄉黑。你買咗，就會發現樣樣都係問題，想賣又賣唔翻（返）出去」、「租而不買係因為有咩事，唔租搵第二度，村屋要放難，買錯住錯村霸路霸就一世」、「係條村入面你冇熟人就最好唔買」、「半個原居民，無丁權。但一出世就住緊村屋，老豆老母買左。到我自己出頭，我會買一個市區盤放租，再自己租村屋。同埋租買村屋，真係要小心搵，地區勢力同關係，係麻煩」、「仲有最重要嘅，梗係……原居民。我呢邊住得耐啲，都無咩野，講緊幾十年。但唔係同一個姓，總係會有啲隔膜咁。我聽過新住客搬入某條村，佢同原居民傾計。言語之間提到自己好有錢。之後……成日有人上門借錢，你有錢喺呢邊買屋喎……」、「村屋嘅土地業權複雜，有機會出入都要用人地私家路比（畀）人收路費（你冇權睇人地張契有冇right of way），泊車要比（畀）錢祖堂，仲有要同村民keep到關係，唔係話村屋唔好，只係你要睇清楚先好買。」
有網民指出買村屋，並非只係樓宇買賣咁簡單，業權問題，村內嘅原居民勢力，以及入住後點樣同村民打好關係，先係重點。
text/Joyce
photo/HKET圖片庫
============
同場加映：
【蝸居睇樓團】灣仔650呎雙房單位變身屋中屋 打卡圓拱窗台
」，
App內睇文同睇片可隨時捕捉U Fun彩蛋，
換領現金券及禮品！
↓【聖誕送您🎅】 Gourami 時尚運動套裝連HKD 100 現金券↓
↓新一季主打簡約精緻設計短款背心🧘時尚又實用 ↓
【免費送💝】ghd限量冰藍美髮造型夾✨
↓一機兩用 雙效熱風造型！↓
