網民熱議:諗住生小朋友,買樓真係唔好諗買大西北? 大西北嘅優勢就快畀北區取代?

2022.12.01

香港嘅家長,都好注重小朋友嘅教育問題,有啲甚至喺小朋友剛出世,就諗緊將來要幫仔女報讀邊間學校,仲要為咗靚校網而要搬屋!有網民喺連登討論區發帖,話如果諗住生小朋友嘅話,真係唔好買新界大西北(屯門、元朗、天水圍)嘅樓!大西北區嘅環境,究竟有乜嘢對小朋友成長咁不利?

樓主嘅諗法係咁:「依家唔同以前,個個都想讀直資私立學校,大西北又少呢D學校,你又唔係有錢到讀哈羅嘅話,跟住小朋友就要坐校巴去九龍塘番(返)學放學,校巴周圍上客落客,大人都仲可以用下( 吓)電話,你叫小朋友係車上面做咩9? 校巴又唔係平,2,3千蚊一個月,又浪費時間係車上面,買咩YOHO,瓏門夠你買四小龍,直資私小入唔到,住4小抽籤入好學校既(嘅)機會都大D,係元朗讀,識埋D刀手第二代點算?」

雖然著名嘅哈羅國際學校位於屯門,但樓主認為如果唔係有錢到讀哈羅,大西北直資私立學校選擇少,小朋友就要每日長途跋涉去市區返學。

搭校車車程可以抄功課   仲可以思考人生?!
樓主嘅主張,好快得到網民認同:「孟母都要三遷,唔係點解校網都會影響嗰區樓價,淨係搭車來來回回消耗幾多時間精力……到宜家都唔明呢個道理,但係又要生又要養仔女,又希望仔女成材嘅父母,我真係祝佢地仔女好運,喺大西北搵到好學校唔洗(使)日日騰黎騰去」,亦有曾住大西北地區喺港島區返學嘅網民分享心路歷程:「住大西北返港島讀中學簡直係人生最痛苦嗰6年,朝朝6點起身小巴轉地鐵,返到學校已經攰到扒喺度……為左(咗)小朋友讀好學校,真係咪撚住新界」,不過對於返學車程長,有網民好幽默咁回應:「小朋友可以喺車上思考人生」、「小朋友玩手指都玩一日,洗(使)你驚無野(嘢)做」、「唔明點解咁多負評,係真嚟架喎!細個覺得喺校車最開心,越耐越好,要抄功課仲正」。

住大西北而要喺九龍或港島返學嘅話,小朋友每日花喺交通上嘅時間好多,有過來人話相當痛苦。

大西北發展會愈來愈慢,重心去咗北部都會區
網民跟住討論如果有仔女,最適宜買邊個區嘅樓?其實答案都係傳統名校區:「買紅磡/何文田/九龍塘」、「有錢邊個唔想中西區」,不過亦有網民為大西北辯護:「屯門有哈羅,唔住屯門住係邊?!」、「有小朋友又唔好諗,冇小朋友又唔好諗,如果咁差,50萬屯門人係點出現?」跟住網友又將話題,轉到大西北嘅樓市,有網民話近期樓市跌,反而大西北仲有輕微抗跌力:「政府諗緊計將成個重心向大西北方向移,你地班留港連登仔仲吹奏市區……今時今日邊個先係正確有眼你見啦!永遠買連登仔對家真係無死錯人」,跟住有網民回應:「呢個真,早兩三年前,買咗大西北樓,依家度度都跌,我果邊仲升咗兩成,套現咗,已落袋」。不過亦有網民覺得大西北嘅地位,將會被北部都會區取代:「大西北發展只會越嚟越慢,重心去咗北部都會區,如果肯放棄市區優點去追樓價升幅,買北區好過大西北」、「新一代貪新樓買大西北,要生先換出市區。早兩年食正大西北升市條水,大西北升得快,輕鬆換出市區樓,之後應該冇呢支歌仔唱」。

網民心目中最理想嘅名校區,仍然係傳統嘅何文田、九龍塘同中西區等。

由於政府將會大力發展北部都會區,網民認為大西北嘅發展將會放緩,之前多新樓或者樓價尚有升勢嘅優勢將會消失。

text/Joyce
photo/HKET圖片庫

 

============

同場加映:

【蝸居睇樓團】灣仔650呎雙房單位變身屋中屋 打卡圓拱窗台

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓ 【送禮】《社群》派利是!↓

↓ 立即入APP參加!↓

↓ 立即入APP參加!↓

↓必收藏!香港咖啡地圖2023!↓

↓精選50間咖啡店(附評分)!即睇詳細介紹↓

↓精選50間咖啡店(附評分)!即睇詳細介紹↓

評語

相關文章