網民求救：樓下成日話漏水要求入屋檢查，可以點搞？ 應該搵水務署定食環署？

樓主嘅情形係咁樣：「樓下話我屋企滴水落佢個窗再彈入屋，應該唔關冷氣事，懷疑係水管，前前後後上左三次（一個月內），分別係兩個師傅上黎（嚟），三次都話『應該』唔關我事，黎（嚟）緊又話要再上黎（嚟）（第四次，第三個師傅），點部署？搞到我都真係懷疑係自己滴水……」

對於開門畀師傅入屋檢查，有網民質疑：「有無warren 呀？」，樓主回應：「咩都無，淨係同管理處講要求我開門俾師傅睇」，唔少網民亦覺得樓下屢次要求入屋檢查，做法太過分：「唔需要理佢！同佢講如果有滴水，叫佢自己搵證據，頭1-2 次 配合佢，第3次，你就唔洗（使）理佢」、「搵師傅把X，3頭唔埋兩個月又搞吓你，叫佢搵公正行試色水啦，咁得明（閒）應酬佢！」、「叫佢打1823 call食環/屋宇署。佢叫自己啲濕X師傅話要整10萬蚊，你負全責，你俾唔俾？」

樓主樓下單位業主經常話漏水，三番四次派師傅到樓主家檢查，但有網民認為做法唔合理。

你無義務開門畀佢！仲要小心唔好放太多貴重嘅嘢喺屋企！
有網民好認真咁分析：「你冇開門俾佢既（嘅）義務！標準做法，叫佢搵水務署叫人黎（嚟）睇佢地睇到既野（嘅嘢），當有水務署既（嘅）職員一齊，你再開俾佢睇一次，然後如果水務署話唔關佢地事， 者（即）係食水冇漏， 就交番（返）俾佢地自己，1823 搵食環處（署），pass單野（嘢）搵聯合辦事處， 所有野（嘢）都會再有專員黎（嚟）同你約時間」，樓主回應：「佢地（哋）講到好好聽，話未必關我事架，只係睇下（吓），對上幾層都會睇埋，上幾次都心軟俾佢地（哋）入」，但有網民提醒樓主小心，樓下業主另有目的：「分分鐘唔係睇漏水！呢排小心啲啦，唔好擺太貴重既野（嘅嘢）係屋企啦！」

樓下單位業主只係通知管理處就多次帶師傅上門，有心水清網民提醒樓主小心有人以檢查漏水為名，小心家中財物。

室內滲水可以搵食環署   食水廁水就搵水務署
有類似經驗嘅網民分享經驗：「外牆係成棟大廈嘅事，我嗰度外牆滲水入屋，同法團溝通完我自己搵人整再claim返錢，亦可以法團直接搵人整，外牆水管係公家嘢，唔會入個別單位數，更加唔會係佢求其搵個師傅睇完話係就係，叫你畀錢就畀錢……佢話你屋內滲漏，就叫佢搵食環水務試色水；佢話外牆水管，就叫佢搵法團/管理處，佢而家就一路試緊，到底邊個師傅話入你數，然後就會叫你畀錢。你確認你冷氣機底盤無事就得！」，樓主就表示應該唔關自己部冷氣機事：「果個方位部冷氣壞左（咗）無開好耐啦，所以絕對唔關冷氣事！外牆水管，如果係去水位呢？排水嘅水管，總知係戶外就係公家嘅事？」。

大部分網民總結，都覺得樓主樓下業主，應該對呢件事交畀政府機構處理，先可以令事件解決：「室內滲水有食環署跟；室外冷氣機，都係食環跟；食水廁水就水務署，你剩係同佢地交手就得」、「主喉呀公，分支喉業主。你唔好理關唔關自己事，你只要知道，你唔好再配合佢 check 黎（嚟）check 去，等佢搵水務署、食環署、到時呢兩個部門黎（嚟）到，你先配合佢做野（嘢）就得，咁你就煩少好多野（嘢）」、「樓下嘅訴求好簡單，就係要解決佢嘅問題，然後搵人埋單；即使你自己俾錢搵師傅檢查，證明唔關你事，佢都唔會信；同樣佢個師傅話100%你責任，你亦唔會信；管理處亦唔會處理，反正最好你地盡快攪掂唔再煩佢；棲（樓）上再黎（嚟）叫佢打1823（或者直接打999），等佢同政府各部門慢慢週（周）旋。等政府出維修令先做野（嘢）。（最後有可能係大廈公家地方要法團埋單，你心軟其他業主都唔會多謝你）」。

網民指大廈外牆嘅主喉屬大廈管理，若屬漏水問題源頭嘅話，應該係大廈法團負責，只係分支喉管問題屬單位業主負責。

網民都建議樓主叫樓下業主打1823搵政府部門處理，純粹搵師傳檢查，問題只會沒完沒了。

text/Joyce
photo/HKET圖片庫

============

同場加映：

【家居達人】日本認證收納師教你！ 整理廁所鏡櫃、鋅盆櫃小貼士！