新界樓平但唔方便？交通要用多兩倍時間？ 網民熱議：買樓係咪唔好貪平而買山旮旯地方？

以前住開市區會好唔習慣？返工每日都要用兩個鐘？
樓主表示自己本來居住於油尖旺區，生活非常方便，買嘢食嘢都唔使搭車，深夜時亦有唔少宵夜可以買到，但幾年前家人就買咗位於元朗嘅新樓，住落就發覺位置真係非常之偏遠，就算揸車出市區亦都要起碼半個鐘，所以就認為買樓千祈唔好因為平就揀山旮旯嘅地方：「雖然屯天元地方買樓可以係市區一半，但係真係好x唔方便」。有網民就指若住開市區的話，搬到入新界嘅偏遠地區住肯定會唔習慣，交通上所花費嘅時間起碼多兩倍：「住九龍大搬入去大西北肯定唔慣，交通時間要用多兩倍時間」、「以前住九龍東，去灣仔都係半個鐘以內，結左(咗)婚搬左(咗)入大埔，好唔慣，好x7遠，成9日塞車」，亦有網民指要返工的話就唔應該住大西北：「打分(份)牛工，就咪入大西北。一日時間就得24hr，下(吓)下(吓)要洗(使)2粒鐘出入時間真係好XonX」。

有網民認為從市區搬到新界偏遠地區居住肯定會不習慣，於交通上亦需花費多兩倍時間。

唔係個個都要跨區工作？新界樓應買Yoho、瓏門？
不過有網民就認為今時今日住於較偏遠嘅地方並無太大問題，並非每個人都需要跨區工作：「咩年代呀？仲講市區、新界，又唔係個個要誇(跨)地區返工，分分鐘落樓下對面街嘅學校教書，過對面醫院返工嘅醫生護士添(㖭)呀」，亦有網民指現時愈來愈人多人可在家工作，所以買樓選擇以不太完善嘅地點以換取較大嘅空間亦非不可：「交通方便/空間/景觀/裝修質素/會所，個價錢就係呢五樣野(嘢)度拉bar，而地點永遠係佔最貴，其實而家好多人wfh+有車，會將地點呢舊(嚿)錢轉左(咗)去家內生活空間度」。

而有網民則認為就算買大西北樓都要買鄰近該區市中心嘅樓，如位於元朗市中心的Yoho及位於屯門市中心的瓏門等：「大西北要買只會揀Yoho或瓏門」、「無人叫你買元朗山卡啦(山旮旯)，又無錢買yoho，咁梗係唔方便啦」、「我都未聽過人講住yoho係山卡啦(山旮旯)唔方便」。

有網民認為現時香港並沒有跨區工作的必要，有不少人都會在居住地區附近上班。

亦有網民認為若在新界地區買樓應要選購如Yoho及瓏門等鄰近市中心的屋苑。

日後大西北先係市區？預算有限自然要取捨？
另外有網民就指政府早前計劃大力推動發展新界北部地區，以打造「北部都會區」，所以認為新界北部其後將會成為另一個市區：「無聽過北部都會區？以後大西北先係市區」，但有網民就對此計劃抱有質疑，認為計劃需時甚久：「x吹個都會區出嚟氹啲傻仔買樓，佔地面積咁大，超多地仲要未收，未規劃，你個孫大學畢業都未起好啦」、「無聽過九龍東CBD？啟德10年前夠係「起動九龍東」，而家呢？」、「二十年後起好先係」。

而有網民就指其實當買樓嘅預算有限時，好自然就需要作出取捨：「無錢就要睇住邊啦，我夠想住港島半山啦」、「咁係你唔清楚自己想要乜，係人都想買又新又大又方便，唔夠錢就要取捨」、「咪係，比(畀)得起錢就買九龍站上蓋啦，比(畀)唔起自然要取捨」。

有網民認為新界北部地區日後將能發展為「北部都會區」，可成為香港的另一個市區。

亦有網民認為若買樓預算有限，自然需要在地點方面作取捨。

text/Jonathan
photo/HKET圖片庫

============

同場加映：

【蝸居睇樓團】100萬做船主！2,000呎打卡靚船屋 三層5房2廁 啡色ｘ菱格豪華復古風