網民求救：父母無物業又無公屋 唔通要供養佢哋過世？ 將來仲邊有錢結婚生仔？！
近期樓價下挫，有意買樓上車嘅人，都認為係入市好時機，好多年輕人都會喺父母支助首期之下置業；亦有人覺得如果住公屋，就唔使為住屋問題煩惱，某程度上都算係贏家；當然如果父母一早已經有樓揸手，家庭亦唔使為住屋問題而苦惱……但有網民喺連登討論區發帖，話父母入息過咗公屋住客要求，但又唔買私樓，成世都係租樓住，而且亦儲唔到錢，不禁擔心自己下半世要供養父母，隨時無能力結婚生仔……究竟你會建議樓主點樣處理住屋問題呢？
樓主首先慨歎父母一直以來都唔識理財，成世都租樓唔識買樓，亦儲唔錢：「屋企人做左（咗）成世租租，過左（咗）入息好多絕對租唔到公屋，明明 8、 90年代機會處處，點解唔買樓？幾十歲人仲兩公婆夾埋一球野（嘢）儲蓄都冇，唔買樓之餘又大駛（使）唔儲多啲錢，退休之後唔係諗住我一個養3個掛（啩）？！諗起自己要為理財失敗嘅父母負責佢地嘅退休人生就慘！我唔駛（使）娶老婆生仔了！」，諗到結婚，樓主真係好悲觀：「婚都結唔到了！女朋友唔肯同我屋企人住，點租兩個單位？儲到首期又點，供一間租一間會儲唔到錢，儲唔到錢冇得投資，冇得投資又係下一代辛苦又要我個仔養我？X你我唔X結婚算！」，樓主仲疑似哀求現時女友唔好因為財政困難而分手：「如果你見到個post，對唔住我養唔起bb，第時結婚供樓仲要你夾一份，兩老果方面我自己會搞掂，唔好同我分手！」
樓主父母無物業，擔心要供養父母過世，而女朋友又唔肯同父母同住，樓主擔心將來婚都結唔成。
諗到將來父母退休後要一個養兩個，就覺得人生好多嘢做唔到……
有網民表示同樓主面對同一處境：「同你差唔多，屋企03年比人收樓+破產，我係香港應該冇得玩落去，準備移民好過」、「同你一樣……不過係我爸好多年冇做嘢，所以儲唔到錢，我自己覺得反而好危險係：我爸基本上淨all in投資，咁多年貌似都係蝕，都唔知到我媽退休之後有幾多資產！佢哋成日話有能力買一層先，再按揭買多層，到時租比佢哋會照俾返租！諗到一個養兩個，就覺得人生好多嘢做唔到……而佢哋又對你有好多期望同judgement！」
樓主對未來感到悲觀之餘，亦質疑父母幾十年嚟嘅理財方法：「租左（咗）幾廿年樓夠full pay層樓有凸啦！幾十年前啲樓仲咁平……又唔係高收入，夾心階層入息買唔到居屋，但又追求生活質素咪儲唔到錢！去旅行，買top model電視手機手電，租樓租間舊啲儲多啲錢又唔肯，又鐘（鍾）意買下（吓）手袋化妝品咁，youtube見到人食和牛又想去間餐廳食……佢地嘆好野（嘢）老左（咗）我要埋單果下大獲（鑊）！」
有網民表示一諗到日後要供養無物業嘅退休父母，就覺得人生無希望。
樓主表示不滿父母昔日唔買樓，反而花錢去食喝購物玩樂，搞到將來退休後，要自己供養。
兩老應該有留錢畀自己退休用 60歲申請公屋好快上樓
但網民又覺得樓主父母賺到錢享樂一下，其實都好合理：「及時行樂又唔可以話佢地錯，你去到50,60歲咪又係儲錢>打工>返工loop，然後一世人無嘆過好野（嘢）」、「我都係咁諗！賺左（咗）錢後生唔用留黎（嚟）做咩 ？又帶唔到落棺材」，不過網民就覺得如果理財及生活態度係咁，就唔應該生下一代：「有你e種諗法就唔好生生，咁就無問題，問題係自己想享受又唔儲錢，生個仔黎（嚟）幫自己後生時既（嘅）玩樂埋單就仆街啦！」、「無錯呀！ 錯左（咗）生左（咗）個仔，咁既（嘅）收入支出，鐘意月月清，享受生活，就咪生仔呀嘛！」，不過亦有網民好抵死咁講出樓主父母最大嘅投資「錯誤」：「因為佢哋投資晒落你身上，點知會咁嘅啫！」、「因為生左（咗）你呢舊叉燒囉！一日三餐供書教學」。
有網民覺得如果身為父母，但唔識投資理財為下一代打算，鍾意享受生活同消費嘅話，倒不如唔好生小朋友。
亦有網民覺得樓主唔使咁悲觀，父母可能早有退休嘅理財計劃：「你要問下（吓）樓主老母係咪真係冇儲錢先知，就咁睇似係樓主自己覺得佢地老左（咗）等人養，我就覺得佢兩老有留錢俾自己退休用，只係冇剩錢俾佢啫」、「你老豆老母點用自己啲錢關你鬼事，衰啲講句佢退休用啲錢完成夢想都無可厚非，佢唔問你攞額外錢，淨係要正常一份家用咪由佢。」，而用老人資格申請公屋，似乎係最有建設式嘅解決方法：「退休之後排公屋咪得囉！老人隊上樓快好多」、「2老60洗哂申請公屋好快上樓，你結婚唔生仔就得」、「唔好理你老豆老母，佢地去到無錢租樓自自然然會去番（返）工，無錢學咩人退休？！到真係又無錢又做唔到野（嘢），就可以搵社工申請公屋，老人家排好快上樓，唔好話住慣私樓住唔到公屋，無錢無選擇，呢個係你老豆老母幾十年做左（咗）錯誤選擇嘅代價」。
亦有網民認為樓主父母應該有預留作退休嘅生活費，只係無同樓主交代，叫樓主唔使咁擔心。
網民普遍認為比較實用嘅解決方法，係叫樓主父母60歲後申請老人公屋。
text/Joyce
photo/HKET圖片庫
========
同場加映：
【家居達人】10個快速乾衣貼士 提高抽濕機效能、晾衫小妙招
港生活人氣本地熱話
【🎁免費送】HIZERO 輕量級F300潔地機！
↓簡單兩步登記贏清潔神隊友！↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
