網民熱議：奧運站上蓋邊個屋苑最值得買？ 一號銀海有奇異惡臭？

君匯港同浪澄灣距離奧運站遠  拎住重嘢行會幾吃力
有意買奧運站一帶單位嘅樓主做完research之後，發現：「見啲人多數講維港灣同浪澄灣，君滙港又點睇？」，立即有網民回應：「君匯港3房一厠幾抵買，1,000萬左右，劈到去9球就正喇！」，點知網民覺得君匯港樓價低處未算低：「睇個勢應該七球都有！」，但亦有網民覺得「諗多咗」：「兩房都未見過七球，三房想見識下（吓），點劈到七球？兇宅果啲唔計」，不過網民似乎唔太推介君匯港：「君匯d 房真係太細，好唔實用」、「1，2座果啲好大，不過貴」、「7 球買3 房翻（返）來做士多房真係差d」。

網民認為君匯港單位嘅房間太細，並唔好用。

對於考慮買君匯港同浪澄灣嘅人，由於呢兩個屋苑距離奧運站較遠，有網民建議要去實地考察，：「浪澄灣，君滙港，建議你實地考察，試下（吓）行去奧運站個距離是否接受到，輕鬆咁行無問題，如果拎住重嘢、推BB車會比較吃力」。對於浪澄灣嘅樓價，網民就覺得可以等爆：「十月0 成交，140個放盤，等爆」、「無成交就無新成交價，即係當無爆」、「係囉，d 業主好團結，為啖氣啫，早d 放套現好過啦！」、「住得浪澄，以我所見大部份都係揸車/ 的士出入多。好多都係番（返）中環or ICC」。

網民指君匯港同浪澄灣距離奧運站嘅步程遠，叫對呢兩個屋苑有意思嘅人士要實地視察一下。

南昌站黃昏傳來惡臭  柏景灣管理費抵
有網民推介一號銀海：「一號銀海，個view冇得輸」，但網民隨即數出一號銀海嘅大缺點：「臭到pk，你去行翻（返）轉就明」，不過亦有網民指出問題其實唔大：「其實係浪澄灣後排去到凱帆軒先臭，一號銀海完全冇影響」、「其實入左（咗）屋企，凱帆軒、浪澄灣、一號銀海係完全聞唔到臭味喎，係樓下海濱夏天會有時臭」，而最臭嘅位置，其實係南昌站：「南昌站果邊臭好多㗎！」、「睇下（吓）幾點，通常6，7點都勁d，純粹由南昌站出口經驗」。

好多網民都認為一號銀海嘅景觀一流。

網民話一號銀海、浪澄灣及凱帆軒都有惡臭，但有人心水清地分析出真正臭嘅地方，其實係黃昏時份嘅南昌站出口。

綜合意見，似乎柏景灣嘅口碑最好：「琴日去睇過，好似柏景灣個位置最好！」、「首選一定係柏景」、「住過奧海城3期、帝峰同2期柏景，屋企人住1期維港……最方便一定係柏景灣！平台大，成日同個仔落平台跑步、踢波，會所大，又近旺角，樓下大商場，乜都有，最重要係柏景灣管理費唔貴！」

喺奧運站咁多個屋苑中，網民最推介柏景灣，原因係位置好，加上會所設施好而管理費又唔算貴。

text/Joyce
photo/HKET圖片庫

============

同場加映：

【家居達人】日本認證收納師教你！ 整理廁所鏡櫃、鋅盆櫃小貼士！