家居孖寶挑戰DIY聖誕裝飾品 最平$12！摺紙聖誕樹、夢幻水晶球、薑餅聖誕小鎮

1/薑餅小鎮王國
我同Yuen決定要先建立我哋嘅薑餅小鎮王國，一打開就已經係香噴噴嘅薑餅，就算失敗都可以就咁食，好開心啊！

要建立我哋嘅王國，呢個功臣功不可沒。佢個名叫「食用糖膠」，可以幫黏合薑餅、鞏固城牆。

step 1: 撕開盒內會發現說明書，步驟清晰，跟住佢哋一步一步咁起屋，過程超有趣！

step 2: 當然唔少得我哋小鎮入面嘅市民，用「食用糖膠」幫佢哋加上裝飾。

「Serena and Yuen聖誕薑餅小鎮」登場！

2/聖誕水晶球
我哋於12蚊店關注組入面見到有人分享佢哋嘅成品，因為太夢幻，所以我哋都試下落手整。

step 1: 將公仔黏實喺樽蓋上，記得要確保要完全黏實。

step 2: 喺等待期間，可以將膠水及水倒入透明玻璃樽，大概6-7成滿即可，因為要預留冚蓋後公仔嘅空間。我哋份量完全隨心，然後加入各式各樣嘅閃粉、玻璃紙等再混和，超級夢幻。

step 3: 最後冚蓋、扭實就完成喇！

3/摺紙聖誕樹
摺紙聖誕樹只需12蚊就整到，太抵喇！

step 2: 喺兩條最長嘅邊上塗上漿糊並黏實，直角三角形出現喇。

step 3: 梅花間竹咁疊好9個直角三角形，再將三角形嘅底塗上漿糊並黏實。最後將頭尾嘅三角形黏實，加以調整下聖誕樹外型。

step 4: 最尾加上裝飾，一棵靚靚聖誕樹完成喇！

4/可愛雪人燈

step 1: 先將2張白紙(12.5cm X 17cm)、2張白紙(12.5cm X 13cm)摺成6條長條，上下兩邊貼上雙面膠紙就可以剪出嚟，最後總共會有4張紙條。

step 2: 長啲嘅紙條用嚟整雪人身體，而短啲嘅紙條會用嚟整雪人嘅頭。雪人身體嘅部分就係將12條嘅紙條嘅頭尾黏上膠杯口及杯底，慢慢你會見到出現一個球狀。

step 3: 剪短另一個膠杯去製作雪人頭。將短啲嘅紙條頭尾黏上膠杯口及杯底，即重覆上一個步驟。

step 4: 將燈放入身體嘅膠杯中，隨則就可以將雪人嘅頭同身體合體，加上裝飾同帽就搞掂喇！

我哋嘅聖誕小鎮有齊雪人、薑餅屋、聖誕樹同水晶球，滿滿聖誕氣氛，快啲跟住我哋整啦！

【INFO】
VINTERSAGA 聖誕薑餅屋
購買點：全香港IKEA門市
價錢：39港元

聖誕薑餅
購買點：全香港IKEA門市
價錢：29港元

聖誕心形薑餅
購買點：全香港IKEA門市
價錢：13港元

水晶球
所需材料：玻璃樽、閃粉(幾款)、公仔裝飾、膠水、水
購買點：全香港DAISO門市

摺紙聖誕樹
所需材料：9張紙、漿糊筆、裝飾用蝴蝶結
購買點：全香港DAISO門市

DIY雪人燈
所需材料：白紙(12.5cm X 17cm)2張、白紙(12.5cm X 13cm)2張、膠杯(215ml) 2個、黑色紙、燈、廁紙筒、彩帶、雙面膠紙
購買點：全香港DAISO門市

text/serena
photo/chow

============

同場加映：

【蝸居睇樓團】元朗60年村屋變童話式退休Dream House！特大玻璃趟門廚房連飯廳+二樓溫馨小偏廳