540呎單位裝修全爆30萬得唔得？ 網民熱議：單位裝修使費應該要點預算？

30萬做唔到全爆加訂造傢俬？隨時更可能會爛尾？

樓主表示想將540呎嘅單位裝修，暫時預算30萬，並列出將要對單位裝修嘅多個項目，再問到網民究竟30萬做唔做到所有需裝修嘅項目：「全屋全爆重做水電，廁所同客房拆牆重造，廚房加玻璃趟門，兩房一廳要換鋁窗，客房做暗趟門，訂造電視櫃連吊櫃，C字櫃，主人房床同衣櫃，牆身油(髹)普通白色，舖木紋磗，換鐵閘」，有不少民就認為30萬並冇可能做齊以上所有嘅裝修項目，若只有30萬預計就要預裝修工程會爛尾：「一係你就加預算，一係取捨有咩唔做，30萬想做咁多嘢一係爛尾一係俾人打死狗講價」、「50萬都可能啱啱夠，30萬你預爛尾都得」、「30萬實得，你預爛硬尾，我自己做比(畀)客就算做套餐，500呎2房唔包廳房櫃都要28(萬)，30(萬)可以做曬(哂)，你估搞手但求打個和咩？」

有網民指樓主所列出的多項裝修工程，根本無辦法只用30萬就可完成，若堅持只用30萬則需承擔裝修爛尾的風險。

500幾呎單位需用50萬至80萬裝修？成本價都要40幾萬？
而有網民就分享同樣500多呎嘅單位要做全屋裝修大概需要用幾多錢：「同你一樣全爆裝修500尺(呎)，剩(淨)係整洗手間、廚房櫃，其他傢俬Ikea，買哂全屋電器，都用左(咗)差唔多$1,000/尺(呎)」、「我大你少少，590呎全爆、水電、拆牆，剩(淨)裝潢，未計造櫃同家具都45萬，最後造哂櫃連所有野(嘢)80(萬)左右，30萬真係唔夠」、「你500幾尺(呎)全屋冇50(萬)-80(萬)都咪搞，唔好貪平，30(萬)真係比人笑x你」，更有網民指出500多呎嘅單位進行全爆工程加上換窗嘅成本價亦都已經要40多萬：「朋友做裝修設計，自己屋企560呎，全爆，換埋窗，佢話成本都4x萬，已經係成本價，仲未計出面每個位賺你一筆」。

有網民分享自己裝修500多呎單位時所花費的金額，大概要用50萬至80萬，而成本價都已經要40多萬。

1000元1呎係正路？單位長住裝修應留更多預算？
亦有網民認為單位裝修預算應以呎價計大概1呎1,000元則比較合理：「要預就預約1,000蚊一尺(呎)啦」、「一呎一千就正路既(嘅)，你想30萬搞好，就預得30萬既(嘅)質素、材料、手工」、「簡單裝修都1K/呎，你30萬整500幾呎，怕你幾年後後悔，又要洗(使)過筆」，而有網民就建議樓主若該單位作長住的話應為裝修費用作更多嘅預算：「師兄我同你一樣打算全爆兩房換埋鋁窗同閘換埋全屋家電，不過就先得400幾呎，都打算預50-60萬喎，會住成十幾廿年不如俾多少少靚裝」、「預長住就梗係俾多啲整到最好啦」。

有網民認為裝修使費應按單位的大小去計算，大概1,000元1呎則為合理價錢。

唔訂造傢俬以節省使費？唔用設計公司又可以慳一筆？
更有網民分享若裝修預算有限的話，可以從不訂造傢俬以節省裝修使費：「如果你budget有限，不過(如)唔訂造傢私，果(嗰)度都少返12-13萬」、「如要慳就唔好訂傢俬，用住現成先，遲啲換都得，再唔係去屋邨啲鋪頭仔訂，會平啲」、「唔做定具，個(嗰)到(度)起碼慳十幾萬，買住d(啲)現盛(成)家具，日後有(需要)時先搵人度呎裝櫃吧啦」，亦有網民建議可以從地板以及唔搵設計公司方面著手：「你個地現時咩情況？如果唔係爛晒，考慮鋪石塑板上去啦，慳番(返)唔洗(使)燙(盪)地台，平好多」、「搵師父(傅)唔用設計公司平3分1已經，不過30萬應該只夠你岩(啱)岩(啱)純裝，唔可能包埋傢俬」。

有網民認為可從購買現成傢俬、鋪用石塑地板以及不經設計公司作裝修提案等方式以節省裝修成本。

text/Jonathan
photo/HKET圖片庫

============

同場加映：

【蝸居睇樓團】元朗60年村屋變童話式退休Dream House！特大玻璃趟門廚房連飯廳+二樓溫馨小偏廳