網民求教：第一次睇樓有咩要注意？ 經紀催簽約可以點應付？
樓價下挫，同時亦係好多有意上車人士嘅入市好時機，但究竟去睇樓有乜嘢要注意呢？有網民就喺連登討論區發帖求網民意見，網民由點樣應付地產經紀嘅催逼，到入到單位要點樣check屋都有講，至於凶宅，又可以點避呢？
凶宅網只講業主死亡 其他住客及租客死係查唔到
估唔到樓主率先最關心嘅問題，係個單位係咪凶宅：「睇呢咁…… 凶宅點分？」，網民分享：「冇得分，上網搵、問agents、check估價，但都冇得寫包單」，好多人都話想知個單位係咪凶宅，係可以上網查，不過當中其實有盲點：「樓上/樓下係凶宅都唔會定義你嗰間係，有啲跳樓，就算啲血/内臟彈入間屋，都唔算係凶宅。好似有凶宅網可以check，好似land search都搵到係咪凶宅，不過通常俾咗細訂嗰陣先會check land search」、「凶宅網唔齊，血內/內臟嗰啲就算啦，唔會有。Land search只會個業主死咗先會登記，租戶/其他住客死都搵唔搵到，好靠agent honesty，驚就臨約寫明，冇已知喺屋內死亡情況！估價就睇返上下層價位有冇凸（特）別低，不過而家係咁劈價都難作準，另外有部份知名兇宅，估價網會叫你聯終（絡）銀行職員」，亦有網民「好風趣」咁提議：「帶個唔足三個月的BB去，如果入屋佢喊，千祈唔好買！如果佢開口同你對話，貴一貴都要買！」
想知心儀單位係咪凶宅，可以上網翻查，不過網民提醒，凶宅網提到嘅單位應該只係講業主死於非命，租客或者其他住客死於意外係唔會提到。
有網友半講笑話去睇樓，不妨帶唔夠三個月大嘅BB去，睇吓佢有無喊。
你要有唐三藏嘅定力，先可以抵抗AA 引誘你簽約
其次網民就話睇樓時，地產經紀會不斷催你簽約落訂，一定要夠定力：「你要有唐三藏嘅定力，因為啲 AA 會好似蜘蛛精咁引誘你快啲簽約」、「唔好信AA/業主話好多人爭住出價，聽日唔決定就無之類既野（嘅嘢），真係咁受歡迎一早賣左啦，睇多幾間再按自己能力同市場價還價」，樓主講笑話：「淨係帶八達通去睇咪得！」，網民仲好純熟咁模擬地產經紀嘅對白：「「全香港得返哩（呢）間岩（啱）你要求， 你唔買冇架（㗎）喇！」 、「中午先有個客睇完話準備落訂，係有緣先比（畀）你睇埋」、「等陣聽個電話先，喂！係…… 係…… 哩（呢）個客唔買就留比（畀）你啦！」，樓主就問若果遇到呢啲「對白」就點應對，網民提議：「等陣我都聽個電話先！喂！ 係……係…… 我見埋而家個agent，即刻仆過來你呢邊，開定門等我帶票上來」，網民話總之要理智，千萬唔可以畀經紀講多幾句就心軟：「轉身就走！唔到心目中接受到既（嘅）價唔買！」
網民話要有唐三藏嘅定力，先至可以抵抗到好似蜘蛛精咁引誘你快啲簽約嘅地產經紀。
網民話千萬唔可以畀經紀講多幾句就心軟，若果價錢唔啱心水絕對唔可以買！
記住借埋廁所試吓、睇吓廚廁天花同牆有冇不尋常水漬
有網民好有創意咁提議，要首先睇咗唔係太鍾意嘅屋苑，點解呢？「睇左（咗）啲唔啱心水嘅屋苑先，之後先再搵自己心儀嘅屋苑，因為你未睇過樓，如果真係屎窟撞棍第一野（嘢）就睇啱你自己認為好嘅絕世好野（嘢），好易買錯野（嘢）」，有網民就話一定要試水：「記住借埋廁所試下（吓）」、「睇下（吓）廚廁天花同牆有冇不尋常水積（漬），因為樓上或外牆漏水就煩9死」。
有網民好細心咁列點指出睇樓要有乜嘢準備：「睇樓前：1. Set個樓價budget比（畀）自己；2. 睇下（吓）自己想要住大d但遠d/細d近d/新舊etc………3. 因應自己裝修budget係（喺）睇樓時決定有咩可以keep得靚唔洗（使）執。睇樓時：1. 下載定個Apps睇下（吓）間屋係咩方位，如果露台近馬路留意噪音大唔大；2. 留意近窗台/露台/廁所附近牆身有無發黃發霉；3. 如果可以禮貌問聲可唔可以試下（吓）開/關窗；4. 留意盤底有無漏水。睇樓後：1. 如果有興趣，查返係咪兇（凶）宅；2. 睇返最近同座向同則既（嘅）成交價再出價；3. 唔洗（使）信AA幾多人出左（咗）票同你爭， 睇返最近成交再開價去傾；4. 樓齡大既（嘅）查下（吓）做左（咗）驗窗同維修未」。
網民話為免一開始就遇到好似合心水嘅單位而太大意作出決定，不妨先搵一啲唔係太啱心水嘅屋苑睇吓樓先。
網民建睇樓不妨借用廁所，睇吓沖廁等係咪正常。
睇樓一定要睇清楚廚廁天花及牆身有無不尋常水漬。
text/Joyce
photo/HKET圖片庫
========
同場加映：
【蝸居睇樓團】大埔800呎新樓全拆 變侘寂風和屋 IG-able仿日本木屋+禪味水泥閣樓、玻璃主人房
港生活人氣本地熱話
↓【限時搶⚡】原箱高鈣梳打餅↓
↓黑芝麻 / 芥末味｜口感香脆、高鈣健康↓
【社群送禮🌸】送您麒麟一番搾啤酒及「和風櫻花禮品套裝」！
↓簡單一步登記贏禮物！↓
