網民熱議：奧運站私樓係咪唔值咁貴？ 冇升值潛力？又近舊區？啟德更加好？

升值潛力啟德勝？啟德兩房單位更大？
樓主表示鄰近奧運站嘅私樓太貴，冇升值潛力之餘，又近屬舊區嘅大角嘴，並認為位於啟德嘅私樓更加好：「啟德區新好多，潛力大好多。奧運價位又貴，又無潛力升，大角嘴又舊」。對於樓主指啟德嘅私樓更好更值，有網民就認為論升值潛力啟德會比奧運更好，而且啟德嘅兩房單位會比奧運站嘅更大：「升值潛力一定係啟德好過奧運好多。新社區，發展機會大，又多新樓。奧運個價都穩定無咩空間啦，又舊」、「啟德只係吾(唔)可以直接去中環， 但係新加20％，有露台，有sogo，而且兩房五百幾呎，奧運得四百呎」。

有網民認為啟德的私人屋苑比起奧運有更大的升值潛力，而兩房單位更比奧運大不少。

啟德私樓問題多？交通好唔方便？
不過有網民就認為奧運站會比啟德好，並指出啟德嘅私樓單位問題多多，而且交便非常不便：「奧運點都好過啟德啦！配套成熟中產區」、「新有鬼用，劏房則，電爐開放廚房，黑廁，僵屍露台，玻璃牆冬冷夏熱。地產商算得太盡，新樓不宜居，15年之內的樓也是這樣。光鮮亮麗是暫時的，不宜居直到永遠」、「人地行去地鐵站，你行多一倍路，跑道區重(仲)白痴，坐小巴去地鐵站」、「啟德仍然需要發展，相比奧運站行去旺角超級近」。

有網民指啟德的私樓單位有開則差、黑廁、冬冷夏熱等的問題，認為配套成熟的奧運會比啟德好。

亦有網民認為啟德現時的交通非常不便，仍有待發展。

奧運站交便四通八達？買嘢食嘢又平又方便？
而有網民就認為奧運站嘅私樓值得咁貴，並大讚奧運站無論於交通、買嘢、食嘢等方面都非常便利：「奧運值呀，根本平左(咗)，呢排跌得太多，仲平過荃(灣)西」、「奧運好處好多。1. 樓下就係大型商場，絶大多數品牌都有。2. 係名校區。3. 2個站到中環，1個站到高鐵。4. 行路直達MK」、「奧運站食野(嘢)買嘢平又方便，交通四通百(八)達，人工島通埋重(仲)正，國安處總部又近！」、「大角嘴舊區先多野(嘢)買」

有網民認為奧運站的配套完善，於交通、購物、用餐等方面都非常方便。

奧運站私樓已經開始舊？鄰近公屋影響景觀？
不過有網民就指奧運站大多嘅私人屋苑已開始老化，日後更可能要進行大維修：「奧運曾經係十分無敵，有海景，有配套，近中環，但現在，奧運已開始老化，都已是20年以上」、「奧運d(啲)樓好似差唔多要維修」、「維港灣都快23年，如果七年內唔賣，可以準備多筆維修費」，更有網民指奧運站嘅柏景灣及帝柏海灣鄰近公屋，相當影響景觀：「唔值既(嘅)係柏景灣、帝柏海灣呢堆公屋景真係買嗰個都傻，落樓成堆公屋人，仲話奧運龍頭，窗景對面金毛仔日日同你say hello」。

有網民認為奧運站有不少私人屋苑都有20年以上的樓齡，有開始老化的跡象，於不久後更可能需要大維修。

亦有網民指奧運站如柏景灣及帝柏海灣等的私人屋苑鄰近公屋，會對景觀造成不少影響。

text/Jonathan
photo/HKET圖片庫

=======
同場加映：
【蝸居睇樓團】龍師傅話你知！2023兔年家居風水佈局！旺桃花、財運擺啲乜 ?