網民熱討：住緊嘅舊樓就嚟要大維修，應唔應該快啲賣樓？ 點樣可以減輕每戶裝修費？

買家唔係傻㗎，肯定會計埋裝修費入個樓價度！
呢個問題引起好奇網友立刻追問：「究竟夾幾多錢嚇到樓主要跳船？」，但大部分網民都認為樓主如果係為咗唔想孭大維修條數而賣樓，未必有着數：「邊個傻9會買你間買完要夾錢既（嘅）屋？！」、「你放心，買嗰條友肯定會計埋入條總數砍落你到（度）， 所以無分別」、「On9賣過樓未？你試下（吓）用正常市價賣睇下（吓）有冇人show你」、「查冊會睇到架（㗎），唔好當人傻啦！」、「交收前都係入你數。買家都唔係傻，去睇舊樓會留意大廈通告」，但樓主回應原來個賣樓最大考慮唔係錢：「唔係錢嘅問題，係驚大維修嘈」。有網民亦理解呢個樓主考慮：「有朋友係唔想忍受維修期間沙塵滾滾，等夾錢個數出咗先賣，由佢負責比（畀）維修費，買家唔係急住搬入去，慢慢裝修間屋，等大維修」、「一來要夾錢，二來大維修嗰陣連窗都唔開得，甚至連冷氣都要拆，冬天還好，夏天就……」。

網民認為如果樓主以為快啲賣咗層樓，就可以避過要畀大廈維修費，係太傻嘅做法，因為醒目少少嘅買家，都一定會查出大廈會大維修嘅資訊，跟住會同樓主討價還價。

原來樓主想盡快賣樓嘅最大原因，係驚大維修時會有好大噪音影響生活。

大維修正常唔係夾好多錢，畀人圍埋標都係講緊夾2-3萬？！
跟住網民嘅討論重點，轉咗去大廈維修究竟要夾幾多錢：「X，大維修正常唔係夾好多錢，比（畀）人圍埋標都係講緊夾2-3萬，成班傻X比（畀）連登講到危樓咁」、「咁又未必，睇整咩啦！少戶數又可能要夾多d，10幾萬up都有嫁（㗎）」、「一梯一伙果啲可能要十幾，正常60伙除開十萬內」、「通常都係幾皮野（嘢），依家政府好多資助，又有招標妥，唔知點解大部分連登仔啲思維仲維持緊十幾廿年前，可能大部分人睇得1兩單新聞就當全部係圍標咁」，網民話如果用市建局嘅招標妥，杜絕圍標情況，大廈維修價應該會比較合理：「用市建局招標妥唔會有圍標啦！要市建局審批，跟返市價，翠林邨果單無用就出事」，但其實心水清地睇返翠林邨事件，每戶要負擔嘅維修費都並非太高：「有34年歷史的將軍澳翠林邨，2019年被納入政府強制驗樓計劃。近月業主立案法團終於決定進行大維修，估計涉款達到1.7億元，每戶要攤分約1.7萬元至2.2萬元不等……翠林連3萬都唔洗 （使）」、「即係圍埋標都唔係連登仔吹到咁X大，單支樓另計啦，本身單支樓咩都貴過人架（㗎）啦！」、「伙數多用招標妥可能更平」，不過買得舊樓，點都要有心理同實際準備，預定一筆錢做大廈大維修：「如果座大廈真係圍標，你避到今次，10年後都避唔到，當然你可以話買新樓，不過新樓管理費收得貴，即係幫你收定30年後大維修條數」。

網民舉出早前將軍澳翠林邨進行大維修，原來每戶只需付不足三萬元。

網民話如果用大廈維修選用市建局嘅招標妥，就可以杜絕圍標情況，維修價應該會比較合理。

text/Joyce
photo/HKET圖片庫

=======
同場加映：
【蝸居睇樓團】鰂魚涌風水屋靚裝大變身 遷就床頭方位三房變四房、超強儲物衣帽間