網民熱議：首次置業，沙田第一城買唔買得過？ 夏天多小強？漏水情況嚴重？
去年下半年樓價下挫，有傳聞今年樓價會陸續回升，所以唔少有意入市人士想盡快把握機會上尾班車，有網民就喺連登討論區發文，話有意於沙田第一城首置，希望網民畀吓意見，點知有唔少網民話第一城嘅衛生同樓宇保養都唔係咁理想，最重要係究竟係咪值得入市買40年樓齡嘅屋苑……大家又有乜嘢意見？
樓主詳細介紹咗自己嘅背景同條件：「背景：自住，一個灣仔番（返）工，一個觀塘番（返）工，冇小朋友，筆直大約450萬，之前冇住過沙田區，睇中第一城交通，有商鋪食肆，靜中帶旺，心儀284/304呎單位，Concern位係大廈維修費/漏水問題，咁多位有無意見/貼士畀畀小弟，應該買邊個座向/有冇裝修/點樣查兇宅/車位是否足夠？」
就返工交通問題，有網民覺得應該揀美孚：「一個灣仔一個觀塘買乜沙田？加少少，美孚啦！」，點知有網民反駁：「你一定係唔知第一城搭城巴去灣仔仲快過美孚搭地鐵去」，有網民建議九龍東：「返觀塘，不如住淘大或者麗晶」、「如果灣仔同觀塘返工，第一城應該係全新界最方便。一個搭88R，一個搭61R， 一程過，中間得幾個站，唔太塞除（隨）時半個鐘返到公司」、「點解唔九龍灣？第一城都40年樓」，但亦有網民立刻反駁：「九龍灣近觀塘但過海煩啲，德福、淘大都未必夠買，得寶就垃圾則同管理，生活配套又唔及沙田，唯一好處係位處九龍only」、「九龍灣都係四十年樓」、「但係居住環境差好多，第一城仲有條河望下（吓）行下（吓），九龍灣一落街就吸廢氣」。
樓主兩夫婦分別喺灣仔同觀塘返工，網民話由第一城分別搭88R同61R號巴士，其實好方便。
亦有網民建議樓主考慮九龍灣例如淘大花園，不過跟住有網民就話第一城鄰近城門河，環境好過九龍灣。
第一城啲電梯好廢，夏天勁多小強同老鼠屍！
對於第一城嘅生活配套，網民有讚有彈，不過對於衛生、樓宇嘅保養同電梯經常故障，似乎幾多負評：「第一城個人意見管理處淨係識鎖車，環境衛生真係麻麻地，一到夏天就勁多小強同老鼠！夜晚行行下（吓）有時會見到小強同老鼠屍，不過位置真係好方便」、「第一城D樓好垃圾，部lift都垃圾過人，企4、5人已經爆X晒」、「大廈維修費好金下（吓），屋企人有層放緊租，成日都要課金」、「88R超方便，附近冇乜好食，外賣會送，但漏水幾嚴重，個別高層有𨋢聲，成日vvv，煩過X」、「大廈維修費而家做緊，會修外牆，管理費一個月多100幾十，漏水比較煩，因為入水喉佢係私家喉，如果上手無換，基本上輪住爆，呢到（度）整一整幾萬銀。建議買細數座，因為就黎（嚟）大維修，一係買大數座，因為都等幾年先整」。
有網民話第一城嘅環境衛生欠佳，漏水嚴重，電梯亦有噪音，而且要預大廈大維修費用。
都40年樓，自住都OK，如果第日要甩手就有啲難！
不過網民最熱烈討論嘅，反而係第一城已有約40年樓齡，係咪真係買得過：「都40年樓，真係好咩」、「供多8-9年就50 年，未到退休時，層樓就早退休過自己！如果自住都ok既（嘅），但要甩手就有d難」、「與其買第一城咁舊嘅樓，不如俾貴少少買啲同區新啲嘅樓，舊樓遲早無人買只會一路眨值」、「樓主如果係後生仔，建議就唔好買樓齡已過40年既（嘅）樓，原因係仲後生，自然唔希望自己呢層樓係住一世，有志向當然希望上左（咗）車先，5-8年後再有能力upgrade少少，無論住大D，住新D，住方便D都好，所以要考慮層樓唔好話大升，但至少跟到大市升（當然你買得樓我assume你至少覺得未來樓價會升/平穩，如果你睇跌就無必要買樓）。40年以上既（嘅）樓你住幾年之後就好難賣，到時好大機會要劈價，而且回望過去5-8年，即使樓價有升到，40年以上舊樓d價都無乜點郁，所以對你未來換樓好大障礙，如果你覺得買呢層係準備住一世，無所謂既（嘅），咁可以無視我上面所講」。
亦有比較客觀嘅網民，建議樓主睇吓其他屋苑後再同第一城比較：「其實你可以揾幾個岩價錢既（嘅）屋苑睇咗先，到時你就會知會邊個屋苑岩（啱）自己，因為個個要求/鍾意既（嘅）野（嘢）都唔同，最好自己感受吓」，亦有網民建議樓主不如先租住，親身體驗過再考慮係咪買：「以上全部問題都可以搵個單位租1年試下（吓）先，一黎（嚟）就買我怕你後悔」，
第一城已經約40年樓齡，網民認為樓主將來要甩手會有困難，亦建議樓主不妨先租住再慢慢諗係咪值得買。
text/joyce
photo/HKET圖片庫
========
同場加映：
【蝸居睇樓團】2023兔年家居風水佈局 病位要點化解？文昌位屋企中間擺富貴竹？貼揮春禁忌！
港生活人氣本地熱話
↓【限時搶⚡】Orca Skincare芭絲特貓神魔幻養肌蜜粉↓
↓櫻花粉色增添紅潤血色感｜蜜桃粉橙色提亮膚色↓
【寵主請留步】《社群》送您AQUA PRO+TECH「寵物護理入門套裝」🛁！
