網民熱議：同居情侶係咪都要派利是畀樓下看更？ 應該派幾多錢一封？

樓主話剛剛搬出嚟住，所以對於派利是畀看更，有好多疑問：「新搬出嚟住唔係好識，我同男友新入伙，新年派利是係大家各自派一封，定一個單位派一個代表派一封就得？又冇理由一個人派兩封，始終未結婚。但有時一齊出門口，如果我派過，佢未派又好怪」，點知網民反問：「未結婚派咩利是？」、「未結婚都要派真係搞笑，佢派返俾你就差唔多」、「如果佢都講唔出你姓咩，派黎（嚟）做咩 ？」有網民覺得大家拜個年就可以：「呢個真，見到佢望住你就行埋去講句恭喜發財」、「次次新年，樓下看更眼甘甘望住，直行直過，未結婚毛都唔會派」。

有網民認為看更都未必認得樓主，新年講句恭喜發財拜吓年都夠，唔使派利是。

意義上同開工利是差唔多，如果平時網購嘢多，抵畀啦！
對於未結婚係咪需要派利是畀看更，有網民話其實個意義係同派開工利是相若：「看更個封擺明唔係結唔結婚個種利是，類似開工利是，老闆派比（畀你）咁，唔通見到個師奶同事，生晒仔，老闆就唔洗（使）派咩？有啲派法，係意思意思，大家好黎（嚟）好去咁姐（啫）」、「你有心嘅畀封利是仔，當多謝對方嘅辛苦，但你都有權唔畀嘅，不過對方可能會記得」、「真呀，同老豆老母住就話啫，搬出嚟住都唔爭在嗰一百幾十蚊啦」、「其實係，同開工利是派俾靚（𡃁）咁。是但啦，個20一封，都係派大堂同座頭幾個，平時搵佢地收taobao iherb野（嘢），都唔會踢去d角落位」、「如果平時網購野（嘢）多，封利是都抵俾啦，俾哂見開個堆，都係2舊（嚿）水」。

對於要點派法，有人認為一人一封：「1人派1封$20 咪得」、「一戶 一封咪算」，不過亦有人表示堅持唔畀：「打死都唔俾！平時就系口系面，一到新年又幫你開門又撩你吹水，虛偽至極，此風不可長！」

有網民認為派畀看更嘅利是，意義上同開工利是相若，所以不論未婚或已婚都要派。

亦有網民認為如果經常網購，更加值得要畀利是看更。

有關金額，有網民覺得20蚊一封已經可以。

text/Joyce
photo/HKET圖片庫

========
同場加映：
【蝸居睇樓團】2023兔年家居風水佈局 病位要點化解？文昌位屋企中間擺富貴竹？貼揮春禁忌！