2023兔年家居風水佈局 龍師傅話你知！ 病位要點化解？文昌位屋企中間擺富貴竹？貼揮春禁忌

預計疫情於5月較穩定
講到病位，大家應該都好關心疫情今年會唔會退卻。而龍師傅表示，疫情會在2、3月出現高峰期，到5月之後會較穩定，直到大約8月後會變得常規化，大家要多加小心。而今年嘅二黑病符位喺東面，要點樣化解呢？龍師傅表示：「只要喺東面掛一串黃繩六帝錢，便可以。」
除咗要留意東面的病符位，龍師傅話西北面的五黃位都需要特別小心：「西北面屬於五黃位，而五黃位解作一些災病，是突如其來的那種，可以掛上黃色或紅色繩的銅鈴。記得，需要是銅造的。」五黃位以外，原來仲有呢三個方位要留意。「如果今年動土的話，除了屋企裝修之外，如果撞正屋企出外，東面、西面及西北面有修路工程的話，都要多加小心及注意。」

今年嘅病符位就喺東方，可掛一串黃繩六帝錢來化解。

而災病、意外位，就位於西北方，可掛紅或黃色繩銅鈴化解。



文昌位落中宮  屋中間要擺富貴竹？！
健康以外，相信家長們都好關心子女嘅學業。今年嘅文昌位又喺邊度呢？「今年嘅四綠文昌位就喺中宮，即係屋企嘅中心點，最好就擺 4 枝富貴竹啦！但喺屋企中間擺富貴竹其實都係怪怪哋，如果可以的話，可以用一張緣色地毯代替。」

講到富貴竹，坊間有直身以及彎曲種類，究竟買邊種好呢？「揀直身嘅富貴竹會比較好，好多時擺風水陣，都係意頭上嘅嘢，直身富貴竹，有節節上升嘅好意頭，如果彎曲富貴竹的話，會感覺，好似兜路呀 繞圈呀，唔係咁好意頭囉！」

文昌位就喺中宮位置。可擺放 4 枝富貴竹或綠色地毯。



是非嗌交就喺東南方，如果想防小人及是非嘅話，可以貼三張揮春或者掛一個紅色同心結。



至於希望於兔年在工作上多點機遇及生氣嘅話，可以喺西南方擺放一盆水種植物。



家居風水佈局小教室
上集小教室就講咗量度風水陣方位、幾時應該擺風水陣以及農曆新年期間要注意啲乜。今次龍師傅就會講下，究竟上年嘅風水物可唔可以重用？幾時要移除上年嘅風水物，同埋貼揮春有乜禁忌。



上年嘅風水物應該重用嗎？
如果地毯、同心結及揮春的話，師傅建可以丟掉。但如果銅鈴或銅錢，較為貴重的物品，可以用些元寶及碌柚葉水，抺一抹風水物，再過一過火，便可以。畢竟風水物掛了一整年，會附帶一些負能量。



幾時移除上年風水物
其實最好喺立春之前移除上年嘅風水物，不過今年係過咗農曆新年先立春，所以可以喺農曆新年前嘅年尾，大掃除嘅時候移除就可以。



貼揮春禁忌
揮春嚟講，今年盡量避免喺東面及西北面貼揮春，因為二黑五黃嘅關係，不宜貼一啲紅色嘢。仲有，貼揮春，都要避免貼該年生肖嘅圖案揮春。就如今年係兔年，市面有好多好靚嘅兔仔圖案揮春，等於自製犯太歲。



【info】
Facebook：羅雲龍玄學工作室

text /Theo、Yuen
photo/Ricky