記者搶購成功！熱話$12日本指甲油 試整賀年新春甲 高質易用？小工具畫出花款

行咗幾間舖終於見到佢哋真面目喇！每枝只係12港元，CP值真係好高，今次因為整新春甲，入手嘅色系都係紅、白、金、銀等新年嘅顏色，唔知佢哋質素如何呢？

如果你本身已經有Gel甲，第一步就要先卸甲。12蚊店中有Gel甲卸甲錫紙可購買，先用指甲挫磨走部分Gel甲表層，再用卸Gel甲嘅卸甲水滴濕中間嘅化妝綿。以錫紙包實手指等待15分鐘。最後用木棒刮走Gel甲，呢個卸甲方法比較不傷指甲。

Gel甲上顏色前，要先搽一層底油保護指甲，然後放入紫外燈機內照幾秒。要留意12蚊店中並沒有紫外光燈機購買，有售的只係吹風機嚟咋！

而指甲裝飾品同工具都可以喺12蚊店內買到。指甲裝飾品款式、種類都好多，如有閃片碎石、玻璃紙、貼紙、金屬飾物、金箔錫紙等；反而工具就比較少，如卸Gel甲嘅卸甲水、畫甲筆、紫外光燈、Gel甲專用膠水等都未能找到。

我哋買到嘅工具鉗及矽膠指甲掃都幾好用，用嚟黐金屬飾物、碎石、玻璃紙一流！記得要買Gel甲專用膠水，再加照紫外燈先可以將啲飾物黐實㗎！

購買嘅指甲貼就啱晒新手，一撕一貼，修剪後再加面油照燈就Gel好，超方便！

鏡面指甲粉就係油完底色後再上粉，佢會令到指甲無咁單調。不過我哋一致唔太推薦銀色指甲粉。

最後當然要加返一啲新年元素，利用畫筆可以畫出唔同公仔圖案。例如桃花、兔仔、麻將入面嘅「紅中」同「發財」等應節圖案，等新年行大運！

最後嘅成品圖，以第一次自己Gel甲嚟講算不錯啦！新手想試用Gel甲貼都好快搞掂，一齊嚟享受Gel甲嘅樂趣啦！

【INFO】
「指甲油」、「各式指甲裝飾物」、「木棒」、「化妝綿」、「Gel甲缷甲錫紙」
購買點：全香港DAISO門市
價錢：12港元/件

text/serena
photo/kuen