日本DAISO人氣no.1商品選舉2022 近16萬人投票！前8位公開

第8名：排水口隔頭髮神器  總票數：6,331票
擁有秀逸長髮嘅咁多位女士都應該知道沖完涼排水口畀頭髮塞住有幾難清理（亦唔想用手觸摸到）。這個產品可根據屋企嘅排水口修剪調整「隔髮神器」嘅大細，再直接放入排水口就得喇，自此清理頭髮就簡單好多喇！

第7名：可堆疊儲物盒（底深型） 總票數：6,496票
屋企地方細、雜物多，一個好用嘅儲物盒非常幫到手。半透明儲物盒，高身底深，放到好多嘢。只係100日圓一個，買多幾個堆疊起嚟都唔肉赤，非常抵買！

第6名：簡易封口機  總票數：7,083票
呢部封口機用法非常簡單，喺袋口邊一夾再拉，利用熱力瞬間可以將口袋完美密封，完全隔絕空氣，效果好掂啊！用嚟將食淨一半嘅零食封口就啱晒。

第5名：洗面奶起泡器  總票數：7,229票
洗面專用嘅起泡器用法簡單，加入少量水同洗面奶，再不停按壓，大量嘅泡泡就出嚟喇。泡泡質感仲要超綿密輕柔，咁樣洗面清潔就更徹底。

第4名：微波爐煮食器（意粉用）  總票數：7,752票
呢個絕對係懶人煮食必備！只要加入水和乾意粉，放入微波爐加熱至指定時間。唔洗幾耐就煮好意粉，然後倒入意粉醬就可以開餐，煮食方法變得簡單之餘，仲唔洗洗鑊，仲唔係懶人恩物？

第3名：迷你多功能砧板  總票數：8,526票
佢被稱為「主婦的好朋友」。呢塊迷你砧板上榜原因，第一因為佢夠細，煮食時夠慳位，又可以掛起；第二，砧板邊仲要設計咗隔水器畀你瀝乾多餘水份；第三，清洗容易，用洗碗機、熱水清毒或漂白水都可以。唔怪得係「主婦的朋友」啦！

第2名：紙巾 150張  總票數：9,428票
估唔到呢包紙巾喺日本DAISO眾多產品之中銷售額最高嘅產品，成功獲得最高人氣no.2殊榮。網民話佢一包有好多張，係CP值最強嘅產品！

第1名：溏心蛋神器  總票數：11,198票
恭喜「溏心蛋神器」以壓倒嘅票數獲得人氣王no.1！呢件產品絕對係DAISO商品中討論度最高，我諗好多香港人都已經買咗，利用這神器可以縮短整溏心蛋嘅時間，仲可減少所需嘅調味料份量，作為真實用家嘅小編我超級推薦，真心好值得入手！

text/serena
source/DAISO@official
========
同場加映：
【蝸居睇樓團】太古40年舊樓變身美式復古屋 打卡藍精靈畫牆、花磚Ｘ棋盤格添活力感