網民熱議：大圍、奧運私樓有咩好選擇？柏傲莊？名城？溱岸8號？帝峰皇殿？一號銀海？

買樓應有新買新？新樓唔實用管理費又貴？
樓主表示有1100萬預算想買大圍或奧運嘅私樓，因而就問到一眾網民嘅意見：「見大家成日講柏傲莊，其實大圍其他樓值唔值得揀，例如名城、湊岸，奧運就睇緊浪澄灣，想要嗰啲樓齡20年以下」。對於置業，有網民就認為其實應該買新樓會較好：「有新買新，依家堆中產區廿幾年樓仲貴過新樓根本唔值」、「有新買新，舊樓好難轉手架(㗎)」，不過有網民就指新樓唔夠實用，應買有十數年樓齡嘅樓就最好：「知唔知新樓實用率低好多，管理費又貴好多，15-20年樓齡最好」

有網民認為置業買樓時應買愈新愈好，因舊樓會難以轉售。

亦有網民認為新樓實用率低之餘管理費亦昂貴，購買樓齡介乎15至20年的私樓才是最好。

大圍應揀名城/柏傲莊？名城感覺舊手工又差？
有網民就建議樓主買大圍嘅名城或者柏傲莊：「大圍只揀名城/柏傲莊，11m一係名城，一係柏傲莊2房」、「名城東南3房好住」，不過有不少網民就認為名城雖然只有十幾年樓齡，但睇落都較舊，而且手工又差：「名城雖然得十幾年樓，但唔知點解裡裡外外都舊舊地，啲牆身無油(髹)過，啲地磚無換過」、「名城堅cheap，手工又差」，更有網民指名城已經變為留學生嘅劏房：「有新買新啦，名城盛世一早淪為大陸留學生湯(劏)房戶」

有網民認為大圍的柏傲莊以及名城為區內較好的私人屋苑。

有網民則指名城感覺殘舊以及手工差，更被不少內地留學生當作劏房租住。

溱岸8號又靜又舒服？但唔值呢個價錢？
而亦有網民向樓主推薦鄰近大圍並位於車公廟站嘅溱岸8號：「溱岸(8號)真係唔錯，但要簡(揀)河景個(嗰)邊，又靜又舒服，一落去就係馬鐵，名城就唔好喇」，不過有網民就認為溱岸8號景觀一般，交便亦唔算特別方便，而且鄰近嘅配套不足，並不值現時嘅價格：「溱8(溱岸8號)睇過一次，講真唔明點解值呢個價，果(嗰)區真係無配套，車位又貴，普遍景算開揚都又唔係特別靚唔覺得值」、「其實溱岸(8號)點解值呢口價？之前啲兩房要過千萬，雖然話係地鐵上蓋，但個站好細，入面乜都冇，又唔係轉車站，搭巴士又唔係特別方便多車，又唔係連住大商場，冷氣都無，屋苑規模又唔係好大，又開始有返少少樓齡，兩房單位仲要望公屋望廟」

有網民推薦溱岸8號，並指溱岸8號又靜又舒服，而且非常鄰近港鐵站。

亦有網民認為溱岸8號的配套不足，樓齡亦不算少，並不值現時的市價，

帝峰皇殿又新又方便？一號銀海有一流海景？
至於奧運嘅私人屋苑，有網民就推薦帝峰皇殿以及一號銀海，並指帝峰皇殿又新又方便，而一號銀海就有靚海景：「帝峰皇殿=最方便，又最新，奧海城三期樓上，落商場去二期就到地鐵，一號銀海個海景最正，行去奧海城一期再去地鐵，唔近，但都唔算遠」，而有網民就問到鄰近嘅利奧坊如何，有網民就認為利奧坊較差，因其兩房單位太細：「垃圾，兩房細到咁」

有網民指帝峰皇殿又方便又新，並位於大型商場上，非常鄰近港鐵奧運站。

網民亦指一號銀海擁有一流的海景，離港鐵站亦不算遠。

有網民則認為利奧坊的兩房單位太細，並不是一個好選擇。

text/Jonathan
photo/HKET圖片庫

========
同場加映：
【蝸居睇樓團】開箱實試！灣仔新開酒店式服務住宅 雙面櫃間隔夠實用 300呎間到房、廳、梗廚