抽濕機抽出嚟嘅水用唔用得？ 家務清潔導師：抽濕機儲水箱比馬桶更汚糟！

抽濕機抽出嘅水有好多細菌？用嚟拖地分分鐘得不償失？
樓主表示媽媽用上抽濕機抽出嚟嘅水拖地，並大指呢啲水其實有好多細菌，只會愈拖愈污糟：「最近發現阿媽竟然會將抽濕機抽出嚟嘅水儲起嚟拖地！佢話咁樣就唔洗(使)用咁多水，可以慳水。但係其實抽濕機抽出嚟果(嗰)啲水睇落好乾淨，實際上都有好多細菌。用咁多細菌嘅水拖地，咁咪愈拖愈污糟」。對於樓主媽媽嘅做法，一眾網民亦討論起抽濕機所抽出嘅水究竟用唔用得，有網民就認同樓主嘅睇法，認為抽濕機抽出嘅水含有不少細菌，用作拖地以慳水隨時得不償失：「好多細菌喎，玩野(嘢)咩？」、「抽濕機嘅水，有機會有好多菌，攞嚟拖地，都唔知慳唔慳到幾個仙，隨時得不償失」。

有網民指抽濕機抽出的水有不少細菌，為了節省用水而作拖地用隨時得不償失。

落漂白水再用於拖地冇問題？同水喉水分別唔大？
不過有網民就認為用抽濕機抽出嚟嘅水拖地並冇問題，只要加入漂白水就可以殺滅水中嘅細菌：「煮嘢就梗係唔好，拖地有咩問題？，拖地都會加清潔消毒劑或漂白水，咁都殺咗水𥚃面嘅細菌，而且抽濕機𥚃面d(啲)水係空氣中抽出來，又唔會話放咗好耐至用，好正常」、「加漂水應該無問題」，更有網民認為由抽濕機所抽出嘅水同水喉水其實冇太大分別：「其實水喉水與抽濕機中的水分別不大，水喉水過濾後經過大水管大廈水箱到家的水喉，你只要在大廈清洗水缸後第一個開水喉你就會知道水箱幾乾淨！」

有網民認為於抽濕機抽出的水中加入漂白水，可殺滅當中的細菌，再將水用於拖地並無問題。

有網民則指水喉水與抽濕機抽出的水並無太大分別。

只啱當廁所水或淋花用？任何用途都唔適宜？
另外有網民就指由抽濕機所抽出嘅水只適宜作廁所水或淋花用：「只可以要嚟當廁所水用或者淋花用」，不過亦有網民指出抽濕機會不斷吸收空氣中嘅細菌，而抽濕機嘅盛水器亦有利於細菌繁殖，若將抽濕機抽出嘅水作淋花用，會令人體吸收返當中嘅細菌：「抽濕機不停吸收空氣中的細菌，而抽濕機，尤其盛水器，最宜細菌繁殖，用抽濕機除了勤倒水之外，仲要成日清潔消毒，抽濕機抽到的水要倒哂去，連淋花都不宜，盛水器的水好多細菌，將呢D(啲)細菌倒去花盆，D(啲)細菌就會擴散番(返)去D(啲)空氣度，住客呼吸時會吸入呢D(啲)細菌」。

有網民指抽濕機抽出的水只宜作廁所水或淋花用。

亦有網民指使用抽濕機抽出的水淋花會將細菌散播，更會被人體吸入，抽濕機抽出的水其實不宜用於任何用途上。

家務清潔導師：抽濕機儲水箱仲汚糟過馬桶！
家務清潔導師Miss Cheung指出，空氣中含有大量細菌，而大多人會將抽濕機抽出嘅水儲存於儲水箱內一段時間，呢個過程會令細菌滋生得更快，如果平常於倒水時並冇清潔儲水箱的話，抽濕機儲水箱會比馬桶更為汚糟。至於將抽濕機抽出嘅水加入漂白水再用於拖地可唔可行，Miss Cheung亦唔建議大家咁做，並指漂白水雖然可殺菌，但一般使用漂白水嘅份量未必足以殺滅所有存在於污水嘅細菌。


家務清潔導師Miss Cheung指抽濕機儲水箱會比馬桶更汚糟，不建議將抽濕機抽出的水重用。

text/Jonathan
photo/HKET圖片庫

========
同場加映：
【蝸居睇樓團】開箱實試！灣仔新開酒店式服務住宅 雙面櫃間隔夠實用 300呎間到房、廳、梗廚