網民熱議：廚房鋅盤有淤塞去水慢可以點解決？ 家務清潔導師：可用3樣家居產品再加熱水！

用氫氧化鈉（俗稱：哥士的）就即刻通返？
帖主向群組內嘅網民求救，問可以點樣解決廚房鋅盤淤塞問題：「想問下(吓)厨(廚)房洗碗盤去水超慢勁塞，有咩方法可以通下(吓)佢？之前搵過師傅整過都唔太得，好煩」，一眾網民就紛紛提出唔同嘅意見，有網民就指使用俗稱為「哥士的」嘅氫氧化鈉加熱水可解決鋅盤淤塞問題：「去五金舖買啲一樽樽嘅哥士的粒粒，倒晒落去，開熱水即刻沖，即刻通返，幾蚊一樽好平」、「去深水埗買氫氧化鈉擺落(去水)口度煲熱水沖落去」。

有網民指使用氫氧化鈉(哥士的)加熱水可令淤塞的鋅盤喉管馬上暢通。

用梳打粉、洗衣粉、剪碎嘅柑皮煲熱水都得？
有唔少網民就同樣指出於清潔時會用到嘅梳打粉，都有助解決淤塞情況：「我用梳打粉加白醋，再倒滾水，好有效」、「用梳打粉加白醋，倒熱水，再用一個廁所泵(買個新的)壓幾下好快就通到！」、「梳打粉溝70度熱水，一大盤水到(倒)入去啦」，除咗梳打粉加白醋以及熱水外，有網民亦指用洗衣粉加熱水都得：「洗衣粉倒先後加熱水，唔得就用手揼(泵)」，更有網民指用剪碎咗嘅柑皮煲熱水都可以通渠：「可以試吓用柑皮剪碎㷛(煲)滾水倒落去，曾經見過好多啫哩(喱)狀物體冲出嚟，係平時煮食時嘅油份(分)積埋令喉管收窄」。

網民指倒梳打粉加白醋後再倒熱水可有效解決鋅盤淤塞的情況。

網民亦指洗衣粉加熱水都有通渠效果。

有網民則指將柑皮剪碎後用於煲水，再將熱水倒於鋅盤內可解決淤塞問題。

拆開喉管同隔氣作清潔？用抽拉式手泵泵出淤塞物？
而有網民就提出以較直接嘅方式解決，拆開鋅盤嘅喉管同隔氣以清潔入面嘅淤塞物：「我也試過，最後拆開條喉，一節一節咁拆咁睇，拆到最後條橫喉入面，(有好多好多淤泥塞住)最後用衣架夠硬又夠長清理，現在去水正常了」、「扭個隔氣出嚟刷乾淨會好好多」，亦有網民建議可使用抽拉式手泵將淤塞物泵出：「先用物理產品，有種抽拉式手泵，極力推薦，之後才用化學品」

有網民表示可將連接鋅盤的喉管及隔氣拆開以清走淤塞物。

亦有網民推薦使用抽拉式手泵以泵出喉管內的淤塞物。

未必一定可自行處理？戒倒廚餘先係治本？
不過有網民亦都指出鋅盤淤塞或會因某一啲原因而令自己無法自行處理，要根治問題都係需要靠通渠師傅嘅協助：「你要揾用熱水槍通溝(渠)的通溝(渠)佬才能徹底通水管的油脂膏」、「可能外牆打橫果(嗰)條塞咗，自己攪(搞)唔到的」、「可能是室外通去主渠段塞咗。根治要揾師父(傅)」，亦有網民認為除治標外其實更應治本，應戒掉將廚餘倒落鋅盤嘅習慣及加裝過濾網以避免鋅盤淤塞：「首先戒厨(廚)餘由洗碗盆沖走！」、「平時煮食後油膩既(嘅)野(嘢)擦走再洗碗，冇咁易塞，另外再套個過濾網」、「平日要避免將油膩的水倒落去」。

有網民認為若淤塞位置是位於室外的渠管則無法自行解決，需透過通渠師傅的協助以根治問題。

有網民則認為要避免將廚餘及油膩污水倒於鋅盤內，並加裝過濾網以免發生淤塞的情況。

家務清潔導師：用梳打粉、洗衣粉、白醋再加熱水
家務清潔導師Miss Cheung建議，若洗碗盤有淤塞問題，可將梳打粉、洗衣粉及白醋倒於洗碗盤，並於5分鐘後再倒熱水以改善情況。Miss Cheung解釋由於洗衣粉混合過碳酸納，係固體形態嘅雙氧水，有去油脂和殺菌作用，更係對生態環境有益嘅環保清潔劑，而另外日常亦應定期以手泵清理洗碗盤淤塞物，及拆開洗碗盤嘅氣格作清潔，同樣可以改善淤塞情況。至於網民提及用碎柑皮熱水嘅方法，Miss Cheung則指柑皮雖然可去除油脂，但柑皮殘渣有機會使喉管淤塞，並不建議大家使用呢個方法。

家務清潔導師Miss Cheung指將梳打粉、洗衣粉、白醋以及熱水倒進鋅盤可有效改善淤塞情況。

text/Jonathan
photo/HKET圖片庫

========
同場加映：
【蝸居睇樓團】沙田半山夫婦+500多啦A夢甜蜜愛巢！山景閱讀區+鳥居型框架增展示空間