日本收納達人教你8個屋企偷位放雜物貼士 雪櫃儲物格自製兩層空間、紙巾盒點樣固定喺餐枱底？

貼士1：廚櫃、儲物櫃入面加建「閣樓」
廚櫃或者儲物櫃入面，其實放置雜物後，仲可以善用空間向高空發展。

可以去家品店買伸縮棒、鐵絲網及黏貼式電線帶，以呢個方法連結埋一齊。

鐵絲網兩邊都用伸縮棒，固定在櫃內。

以廚房嚟講，呢個位置可以放煲蓋或隔濾網等薄身嘅雜物，唔使掛出嚟，咁廚房望上去就會更企理。

貼士2：雪櫃自製兩層置物空間
其實雪櫃嘅置物格，放咗食物後，上方仍然有好多空間剩。

七尾亞紀子就建議大家去家品店買類似嘅透明膠橋型架及可以放喺下面嘅窄長身儲物盒。

咁樣就可以將雪櫃儲物格變兩層置物空間，放多好多嘢。

貼士3：多士焗爐上面加掛籃放廚房紙
廚房其實仲有好多「儲物死位」，七尾亞紀子就指例如多士焗爐與廚櫃底之間嘅空間，好多人都無善用。

七尾亞紀子建議大家去家品店搵類似嘅掛鈎架，可以放保鮮紙及廚房紙等雜物。

貼士4：衣櫃膠箱旁攝位放衫
好多人喺衣櫃入面，都會用儲物膠箱整齊地收納衣物，但膠箱旁邊其實仲有窄窄嘅鬼祟隙縫位。

七尾亞紀子建議大家搵啲扁身嘅不織布袋收納好衣物，攝埋呢個邊位，用盡衣櫃空間。

貼士5：餐枱底自製雜誌架
如果客廳平時會散落放置雜誌或者紙張類雜物嘅話，可以考慮買個鐵絲網及黏貼式電線帶，喺枱底「做手腳」。

用電線帶將鐵絲網固定喺枱腳位。

就可以自製一個儲物架，放置雜誌及紙張雜物。

貼士 6：餐枱底增設紙巾夾
另一個善用餐枱底嘅方法，係可以去家品店買類似嘅黏貼式夾。

可以將整盒紙巾夾住，方便用餐時取用，又唔使佔用枱面空間。

貼士 7：善用衣櫃門掛皮帶帽子
好多人都為點樣放置如皮帶同帽呢類衣物配飾而煩惱，其實只要利用衣櫃門，加上黏貼型掛鈎及格仔網。

再加上掛鈎，就可以妥善處理皮帶及帽呢類配飾。

貼士 8：浴室鏡櫃門後加掛鈎放置髮飾小物
浴室鏡櫃門後面，可以加上類似嘅黏貼掛鈎。

就可以好慳位咁放置如髮夾或橡筋圈等髮飾小物。

text/Joyce

============
同場加映：
【蝸居睇樓團】新手上車必知！專家教買一、二手樓步驟！買樓花有著數？高成數按揭點計？幾時同業主講價？