家居收納成為近年潮流，好多人都上網睇埋好多收納法，跟住好開心咁去家品店買好多收納用品……但日本嘅收納師七尾亞紀子，上門幫過好多家庭執屋，發現好多人都犯咗以下呢10個收納嘅錯誤：見有空隙縫就塞嘢入去，以為咁就係「善用空間」、或者成屋都係買完嘢唔捨得丟棄嘅盒……究竟，閣下犯咗幾多個錯誤？七尾亞紀子又提出乜嘢解決方法呢？
錯誤1：見有任何空位 就塞啲雜物入去
好多人都以為，只要見到有空位，就塞啲嘢入去填滿位置，就叫做「善用空間」！但七尾亞紀子就話咁樣做嘅後果，除咗家居睇起上嚟亂糟糟之外，喺你搵要用嘅嘢嘅時候，好大機會搵唔到！
解決方法：七尾亞紀子就叫大家要做一個家居收納plan，決定邊個櫃或邊一格係邊個家庭成員嘅物品，或者以用途分類，決定咗之後就唔好再塞其他唔同類嘅嘢入去。同時屋企亦應預留空間，畀一啲未能分類，或只屬暫時存放性嘅消費品。
錯誤2：有朋友到訪 將客廳雜物塞入睇唔到嘅地方
當有朋友到訪，好多人就會將廳入面嘅雜物塞入房嘅角落位擺放，但七尾亞紀子就話咁樣做唔單位日後會搵唔返要用嘅嘢，而且房間角落位愈嚟愈亂！
解決方法：七尾亞紀子叫大家唔好懶，有朋友到訪，真係要執屋，唔好只係收埋啲雜物當睇唔到就算。
錯誤3：買完嘢啲包裝盒唔肯丟？！
七尾亞紀子話佢去過好多人屋企，發現好多人買完嘢後嘅包裝盒都唔肯丟，令佢相當大惑不解：啲盒賣又唔值錢，而且相當嘥空位。
解決方法：七尾亞紀子建議如果有產品盒要保留嘅話，最好將盒摺埋，攝入書架。
錯誤4：隱藏式收納法只啱「收納達人」？！
好多人上網學完收納法，就去買咗一大堆「密封式」嘅收納盒裝雜物，雖然屋企睇起上嚟好整齊企理，但原來屋主本身並非「收納達人」，結果之後唔知道所需物品收埋喺邊，更「誇張」嘅，係反而要問返幫手執屋嘅七尾亞紀子，所需物品究竟收埋咗喺邊度！
解決方法：七尾亞紀子就建議自問並非收納達人或者有小朋友嘅朋友，唔好用密封式收納盒，最好用啲一望就知入面放咗乜嘢嘅收納用品。
錯誤5：買得太多收納箱 反而成為最嘥位嘅罪魁禍首？！
以衣物收納為例，好多人買多咗衫，就會跟住買更多收納箱嚟裝衫，結果久而久之，呢一大堆收納箱，反而成為屋企入面最佔位嘅物品。
解決方法：七尾亞紀子就建議大家買咗衫，先諗吓點樣用現有嘅櫃或者收納箱嚟放置，而喺呢個過程中，通常就會發現有啲唔再着嘅衫，其實可以丟。
錯誤6：想賣舊衫但猶豫不決
唔少人都有打算將舊衫攞去flea market或放上網賣，但遲遲唔行動，結果儲埋一大堆舊衫放在家。
解決方法：七尾亞紀子就建議大家要坐起行，趁衣物未太舊仲有市場價值時，盡快賣咗佢。
錯誤7：收納盒唔啱大細兼無一致性
好多人好鍾意買收納箱，但七尾亞紀子就指見過有人買咗收納箱返屋企，先發現太大放唔入櫃內，又或者個個收納盒都唔同設計，視覺上不單無整齊感，仲覺得好亂！
解決方法：七尾亞紀子建議大家買收納箱之前，不妨度清楚要擺放空間嘅大細，再research一下邊款收納箱啱用。而其實紙袋都係好好用嘅收納用品，可以唔使嘥錢買咁多收納盒。
錯誤8：信件唔分類亂塞一通
七尾亞紀子見過好多人將收到嘅信件唔拆開，就咁同啲宣傳單張之類放埋一齊，或者就咁塞咗喺信件袋入面，好耐都唔理。
解決方法：七尾亞紀子認為信件係要收到即時拆開處理，無用嘅信件及信封可以丟棄，有用嘅信件用file保存好，或者用手機影低soft copy存底。
錯誤9：唔諗清楚有無位放就買大堆嘢
好多人去超市見用品減價，無考慮到屋企有無位放，就買咗先算！
解決方法：七尾亞紀子認為慳嘅錢可能都只係小數目，買嘢嘅時候，先諗諗屋企係咪夠位放先，先決定買嘅數量。
錯誤10：抽屜型收納箱放太高攞唔到
好多人都會用抽屜型收納箱，但好多時就放得太高，要攞嘢時好辛苦，結果：係唔會放常用嘅嘢入去，浪費咗收納箱。
解決方法：七尾亞紀子建議如果用抽屜型收納箱嘅話，最好放喺腰以下位置，方便攞嘢！同時常用物品亦最好放喺無蓋嘅收納盒，方便攞嘢！
text/Joyce
============
同場加映：
【蝸居睇樓團】型男Catry 500呎 獅子山靚景新屋實錄 ! 網紅酒店雲石廁所+吧台
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
《社群狂歡大激賞》！送hellolulu最新系列袋款🎁！
