COLLAR兩位成員Marf、Winka同日推單飛新歌 派台《*~Silencio…Shh》、《一手造成》
女團COLLAR成員Marf（邱彥筒）與Winka（陳泳伽），於今日（10日）分別推出首支個人派台單曲《*~Silencio…Shh》及《一手造成》。由於二人同屬雙子座，而且又同日出歌，難怪她們自稱為Gemini Twins，實行雙子座兩面一剛一柔，為COLLAR「單飛」打響頭炮。
二人日前分別為「單飛」新歌拍攝MV，Marf為了跳唱快歌《*~Silencio…Shh》突破衣着界限，多個性感造型示人，騷腿露腰，盡顯「狂野」一面；Winka則以鄰家女孩造型演繹愛情歌曲《一手造成》。
Marf在《*~Silencio…Shh》的MV中又跳又唱，換上六款不同造型，騷腿露腰性感誘人，Marf表示：「今次造型上好大突破，因為會露肉，係一個好嘅嘗試，事前我專登曬黑膚色，覺得黑啲撞落呢啲衫度會好睇啲；同埋我好少着低腰褲露肚，仲要着好高高踭鞋、短裙同貼身衫，所有嘢對我嚟講都好新奇。」
提到推出首支個人單曲，Marf直言心情緊張，感激公司及經理人給予她很大自由度，讓她參與新歌構思，她說：「首歌嘅主題係講煩擾都巿人嘅訊息，點解我會有咁構思，源自有次『碌』電話，見到我有好多email未讀，問一問身邊人，原來好多人都係咁，於是我覺得呢個課題幾有趣；而為了方便大家明白我諗咩，事前我仲砌定一個PowerPoint，而家喺MV度逐一呈現我之前腦海諗嘅嘢，感覺好有趣。」對Marf來說，《*~Silencio…Shh》另一有意義的地方，是她邀請了一班好友為她伴舞，而這班好友，正是《全民造星IV》決賽時為她伴舞的戰友。
至於Winka首支單曲《一手造成》就以情歌為主題，想帶出「懂得去愛另一半嗎？」這訊息，Winka表示：「歌曲內容好多來自自己嘅愛情故事，拍拖時會嫌棄對方呢樣嗰樣、覺得對方錯，但回頭諗一諗其實係自己問題，所以分手結局都係自己一手造成，想透過自身愛情經歷跟大家分享與反省。」Winka更邀請了《全民造星V》的參賽者Nathan 魏念恩擔任MV男主角，二人不乏小情侶親暱場面，Winka笑謂：「我怕醜，但唔尷尬，我係面皮好厚，況且歌曲內容係自己嘅故事，所以好快投入狀態。」自言是慢熱之人的Nathan坦言被Winka的開朗性格所掀動，很快便融入拍攝氣氛。
此外，Marf與Winka同日推出「單飛」新歌可會擔心有比較？Marf笑言：「我哋一齊籌備自己嘅Solo歌，好Sweet，我哋可以一齊做宣傳、又可以一次過帶兩首歌畀大家聽，好划算。」Winka認為兩歌的整體曲風、內容完全不一樣，就算比較都並非作品核心：「大家同日出歌，可以多啲互動，佢嘅粉絲可以聽我歌，我嘅粉絲又可以聽佢歌，非常不錯。」
港生活人氣本地熱話
【免費送Rollink旅遊系列✈️🌍】
↓ 帶走人氣摺疊旅行喼 x Mini Bag！↓
↓【限時搶⚡】Orca Skincare芭絲特貓神魔幻養肌蜜粉↓
↓櫻花粉色增添紅潤血色感｜蜜桃粉橙色提亮膚色↓
