網民熱議： 男朋友畀首期買樓但唔寫自己名 日後應唔應該同佢一齊供樓？

未結婚同冇名唔應該幫手供？萬一分手隨時拎唔返啲錢？
樓主表示同男朋友打算結婚，而男朋友最近亦諗住買樓，並會負責畀首期，但層樓就唔打算寫自己名之餘，亦叫自己之後一齊供樓，因而就令自己感到非常困惑：「佢話我都冇份畀首期，點解要寫我個名，但係唔係講好左(咗)以後一齊供咩？寫我個名又有咩問題？如果層樓冇我名，我以後點解仲要咁辛苦同佢一齊做樓奴啵」。對於樓主嘅情況，有網民就認為當單位並冇自己嘅業權，以及大家又未結婚時，係唔應該一齊供樓：「未結婚點解要幫手供？」、「冇你名係唔應該供的」、「樓主唔好咁儍(傻)同佢一齊供樓，你諗下(吓)有朝一日真係要分手，你估你男友會唔會比(畀)番(返)d(啲)錢你，男朋友咋 ，唔係老公 ，唔好咁儍(傻)豬」。

有網民指當男女雙方未結婚，或自己對物業並無業權的情況下，不應一起供樓。

有網民擔心若雙方日後分手，女方會因無單位的業權而盡失以往的供款。

男方畀首期寫男方名好正常？但不應要求女方幫手供樓？
而有網民就認為首期係男方支付的話，單位淨係寫男方名屬正常，但供樓方面亦都唔應該要求並冇業權嘅女朋友幫手供：「公道啲，你冇份比(畀)首期，層樓冇寫你名都正常，同樣地層樓冇你名，做乜你要供樓呢」、「男女朋友，未結婚，首期又男方比(畀)晒，寫你個名都唔合理，但男友沒理由叫你幫手供就真」、「佢父母同佢俾首期，寫佢名好正常，但要你一齊供，就唔多正常，你應該拒絕佢，層樓係佢既(嘅)，佢應該自己供，叫你幫手供但唔寫你個名，根本就搵你笨」。

有網民指男方負責支付買樓首期，因此業權全屬男方是合理的事，但男方卻不應要求並無業權的女朋友一起供樓。

結婚後女方都會有業權？為保留女方的首次置業優惠？
不過有網民就指其實雙方結婚後，都會佔有單位的一半業權，而若將來夫婦二人再購入另一個單位時，女方更可享有首次置業嘅優惠，所以現階段單位唔寫女朋友名並無問題：「你地(哋)結左(咗)婚層樓你自然有一半，點解要寫你個名？多個名以後可以首置買多層有咩唔好？」、「佢為你好你又唔知，落你名第二日買多層要比(畀)雙倍印花稅，冇名離婚一樣可以分身家」、「放心啦，我層樓，兩公婆一齊供，但係得我一個名，目的係，買第二層果(嗰)陣，老婆仲係首置！」

有網民指男方的做法並無問題，因女方於結婚後其實亦等於擁有物業的業權，而此做法更可保留女方的首次置業優惠。

男方認為層樓更重要？女方可夾首期以換取業權？
另外有網民就認為樓主男朋友呢個舉動，証明佢並唔夠愛樓主，認為物業會比起樓主更加重要，建議應同男方分手：「証明你男友覺得層樓緊要過你，分手喇」、「講道理，你無份夾又真係唔需要寫你名係岩(啱)wo(喎)；但講情，佢嘅行動就知佢有幾愛你」，亦有網民建議女方若想擁有單位嘅業權，可以同男朋友一齊夾錢畀首期：「樓主可以夾返啲首期，但前題係要寫埋你個名，咁對你有保障」。

有網民指男方的行為代表視物業比伴侶更為重要，建議應與男方分手。

有網民則建議樓主可提出與男友一起分擔首期，但前提為自己需佔有單位的業權。

text/Jonathan
photo/HKET圖片庫
========
同場加映：
【家居達人】10個快速乾衣貼士 提高抽濕機效能、晾衫小妙招