近年大家都好鍾意逛家品店，購買各式各樣設計新穎嘅收納用品，但有無發現有時買咗呢啲收納用品返屋企，先發現「好睇唔好用」，或者根據自己嘅收納習慣，根本就唔會用，結果呢啲收納用品反成「垃圾」呢？日本嘅youtube頻道「samia片付け収納チャンネル」，就分享咗5 個購買收納用品時常中嘅陷阱，大家真係要睇吓自己有無犯過呢啲錯誤！
陷阱1：買咗啲看似有心思，其實係令你更麻煩嘅收納品
版主以呢個喺日本網絡上相當人氣嘅手帕架為例，話逐條手巾仔攝入去每一格時，其實係相當嘥時間，久而久之就無再用，都係用返一個普通盒嚟放手巾仔。
又好似呢個看似會令分類更整齊嘅食品收納架，將盒裝或者袋裝食物逐一攝入去，又係好嘥時間。
結果版主又係用咗一陣，轉返用呢類普通收納盒。
版主又認為呢種話可以幫已開封包裝食物封口嘅用具，其實用起上嚟都嘥時間。
結果版主又係用咗幾次就放棄咗，用返一個大夾反而更好用有效率。
陷阱2：諗清楚收納用品係咪真係用得着先買！
呢個其實係大部分鍾意買嘢嘅人常犯嘅毛病：就係諗住呢啲收納用品，買咗返屋企，點都會有用嘅，買咗先啦！結果……反變成垃圾！版主建議大家下次買收納用品前，要冷靜諗清楚呢件用品，可以點樣用？放喺屋企邊個位？如果無答案，不如唔好買。
陷阱3：量度清楚放置地方嘅呎吋
版主建議喺買收納用品前，要量度清楚放置地方嘅呎吋，以免買錯根本放唔入櫃嘅收納品，甚至可以令櫃內空間更用到盡。
版主特別指出：好多人都忽略咗儲物櫃門鉸位，其實都相當佔位，有機會會阻礙收納用品嘅出入。
陷阱4：懶人唔好買密封式收納箱
日本雜誌或者收納達人，好多時都推介呢類密封式收納箱，原因係可以令家居感覺更整齊，但若果屋企有小朋友、或者收納懶人等嚟講，因為睇唔到每個箱入面放咗乜嘢，每次都要搵，其實好嘥時間。
版主就建議最好用呢類半開放式，透明或者半透明嘅收納箱，一睇就知入面放咗乜嘢，會方便好多。
陷阱5：收納用品放錯地方
用唔同物料造嘅收納用品，應該放乜嘢地方，原來都有學問。
例如放喺廚房或廁所呢啲濕氣重嘅地方，當然唔好用紙製品，但其實木製品或藤籃等，亦容易會發霉，不妨用金屬器皿，或者用容易清潔嘅塑膠製品。
text/Joyce
========
同場加映：
【家居達人】10個快速乾衣貼士 提高抽濕機效能、晾衫小妙招
」，
App內睇文同睇片可隨時捕捉U Fun彩蛋，
換領現金券及禮品！
【登記送🎁】L'OCCITANE 3款臻緻節日倒數日曆🎄！
↓一次帶走24件護膚、身體／頭髮護理及香水產品↓
↓【限時搶⚡】白燕NESTURE 必白美肌X烏黑生髮食療！↓
↓ 輕鬆回復素顏肌 / 同時減少白髮 ↓
