想屋企整整齊齊、睇落乾淨唔一定要買好多功能嘅收納盒或收納小物，好似有超過 50 萬人訂閱嘅韓國家庭主婦 Joy 就善用 3 項平價法寶：橡筋、伸縮棍、書立，將原本用緊嘅工具升級，簡單輕鬆！
1. 橡筋固定法
相信每位貪靚人士都會有以下煩惱，即使將護膚品、化妝品整齊放喺盒入面，都難以避免瓶瓶樽樽東歪西倒嘅情況出現。
只要按自己需要，將橡筋箍喺盒上面，就做到間隔，比起市面上有分格嘅收納盒更好用！因為可以因應自己嘅護膚品、化妝品大細而定，唔使因間隔而浪費空間。
橡筋分間空間之後，仲可以幫忙固定瓶瓶樽樽。即使拎起任何一樣物品，都唔怕整跌其他，出現骨牌效應。
買護膚品、化妝品好常都收到試用品，只要橡筋之間間距細些少，就可以收納埋喇！同樣方法都可以套落面膜產品上！
2. 橡筋＋伸縮棍分類好風筒、捲髮器
大家點樣儲放屋企嘅風筒、捲髮器呢？呢類家電電綫都較長，放埋一齊好易出現電綫打交，或要拎嚟拎去，用起上來唔太方便。
Joy 就教大家先喺平時常用嘅地方，度一度需要用到幾長嘅電綫，並將用唔到、多出來嘅部分用橡筋箍起。
箍起用唔到嘅部分後，將其他電綫打圈繞住風筒、捲髮器把手部分。
只要用伸縮棍加入用開嘅盒或籃內，風筒、捲髮器就可以輕鬆立起來，用時就清楚明暸得多。
3. 伸縮棍簡單分層
買親新鞋返到屋企都會覺得鞋櫃唔夠位，其實係未識得點樣將鞋櫃空間用到盡啫！市面上都有唔少鞋架，幫大家將一對鞋上下疊放，利用高度倍大化空間，但「蜈蚣」有咁多對鞋，冇理由買幾十個鞋架㗎嘛 ？
有時候鞋櫃薄身都未必放得到大碼數嘅鞋㗎！
只要用 2 枝伸縮棍幫鞋櫃簡單分層，就可以輕鬆將鞋上下疊放！
伸縮棍比起鞋架收納空間彈性更高，成本仲低好多！
4. 書立防衣服倒塌
衣服收納第一步相信就係從摺衫做起，櫃桶打爆晒時一定齊齊整整，但只要拎起一兩件就會前傾後傾，久而久之，櫃桶就唔整齊，漸漸就放棄。
Joy 就教大家用書立固定衣物，只要攝喺第一件衫，或者喺前部分最後嗰一件度，就可以持櫃桶整齊企理嘅面貌，唔怕前功盡廢。
text/Priscilla
========
同場加映：
【家居達人】10個快速乾衣貼士 提高抽濕機效能、晾衫小妙招
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】The Big Bounce 電子門票！↓
↓ 全球最大充氣城堡/ Sport Slam體育狂熱/黑夜彈跳派對↓
↓ 【毛孩請試用】Royal-Pets蘆薈溫和修護沐浴露！↓
↓去除身體污垢，成分溫和無添加！↓
