網民熱議：選用仿雲石地磚有咩要注意？仿雲石地磚易清潔？唔適合有寵物嘅屋企？

廳細用雲石地磚唔靚？會影響空間感？
樓主表示屋企裝修想採用仿雲石地磚，但卻搵唔到參考，所以就問到仿雲石地磚其實係咪已經冇人用：「屋企就來裝修，要決定配色揀物料。睇左(咗)好多網站的相都係用木紋磚，我想用大大塊600x1200的仿雲石地磚舖(鋪)地台，考慮緊暖色/白色/淺灰色。但搵唔到室內設計成品相參考個配搭。其實係唔係已經無人舖(鋪)仿雲石地板？」，對於樓主打算選用仿雲石地磚，有網民就直言若客廳細的話，採用仿雲石地磚並唔好睇，亦會令空間感顯細：「如果廳細夾硬用雲石，幾塊磚已經睇到曬(晒)，會顯得成個空間感更加細」、「你個廳細，舖(鋪)呢啲花巧石唔會好睇，會不倫不類」

有網民指客廳面積細小而採用雲石地磚的話會影響空間感，而且並不會美觀。

大單位先會用雲石地磚？仲要配合全屋裝修同傢俬先靚？
亦有網民指多數面積大嘅單位或單位有面積大嘅客廳先至會採用仿雲石地磚，從而突顯空間感及氣派：「你想行咩路線先屋企，通常啲大單位行高級設計風格先會雲石地，重要係大塊正方形先會靚」、「除非你個廳有成300呎到，或者成間屋個設計好配合到，如果唔係夾硬用雲石地磚會好x，你見靚嘅設計，多數個廳都真係好大，先至有空間感同有氣派」，更有網民指除咗空間要大之餘，單位全屋裝修以及傢俬亦要為雲石地磚作配合先會好睇：「大得黎(嚟)，仲要裝修要靚，加好多鎂光燈冷光燈先有氣勢，否則格格不入，不倫不類」、「用緊仿雲石磚，要襯全屋裝修同傢私(俬)先好睇」

有網民指會採用仿雲石地磚的通常是面積大的單位或面積大的客廳。

亦有網民指屋內所有裝修及傢俬需配襯到仿雲石地磚才會美觀。

仿雲石地磚方便清潔？好跣腳對寵物唔適合？
另外網民亦討論到使用仿雲石地磚嘅好處及壞處，有網民就認為用雲石地磚感覺老土，甚至直言會似靈堂嘅感覺：「而家睇返啲十年前裝修，花碌碌雲石個(嗰)啲，已經好老土」、「雲石地板好靈堂feel」，而有網民就指仿雲石地磚易於清潔及打理：「仿雲石地板打理上方便好多」、「好處係易清潔」，不過壞處卻是於冬天會感覺較凍以及當潮濕會非常跣腳：「春天洗(跣)到癲同冬天凍到地獄咁」、「屋企潮濕就要留意，有水真係好跣」，更有網民指仿雲石地磚會對寵物的腿部造成傷害：「有養寵物就要小心，尤其狗，長期飄移好傷腳」

有網民指使用雲石地磚感覺老土，更有靈堂的感覺。

有網民則指使用仿雲石地磚更有便於清潔及打理。

有網民則指仿雲石地磚不適合有寵物的家庭使用，因會對寵物的腳部造成傷害。

text/Jonathan
photo/HKET圖片庫
========
同場加映：
【蝸居睇樓團】鴨脷洲37年舊樓變身玩味彩色屋+西班牙風花磚襯湖水綠色、chill爆全白天台