講到家居收納，與其要去家品店購入一堆收納用品，不如好好活用日常生活中不停重複出現嘅食物包裝盒，學韓國家庭主婦Hejdoo 點樣零成本DIY 8款收納盒！屋企整齊企理之外，仲夠晒環保㖭！
===========
同場加映：
【家居達人】專家教營造日系簡約風家居 重視平靜 大地色/小盆栽/地燈
===========
1. 零食紙盒
零食紙盒可以話係充斥住我哋嘅日常生活，買一盒餅乾、粟米片都必定有個紙製包裝盒，取材絕不成問題！
A. 毛巾收納盒
廚房經常用到毛巾，想容易搵得到一定係直立式收納方法，但布料軟身難以豎立，呢個時候扁身紙盒就幫到手！
統一成直立式收納方法，打開櫃桶就一目了然，唔需要再左搵右搵。
先量度所需要嘅高度，可以依照所放入嘅櫃桶高度或毛巾大細而定。
裁剪好之後，可以將同樣大細嘅紙盒用膠紙固定。
想更加整齊，可以放入一個更大嘅紙盒，剩餘空間亦可放置其他小物。
B. 長形膠袋抽盒
只要利用紙巾盒原理，就可以輕鬆儲放食物保鮮袋、垃圾袋等同類物品。
依照上文收納盒量度高度嘅做法，裁剪好大細後，只需要加一塊相同闊度嘅紙皮，放喺對摺保鮮袋嘅中間，咁就可以好輕鬆抽取保鮮袋喇！
對於較大嘅食物袋或垃圾袋，就需要用到較大嘅紙皮，以便固定膠袋對摺後多出嚟頭尾兩端部分。
C. 圓筒形膠袋抽盒
至於圓筒形嘅食物袋，就可以用抽屜式紙盒，例如電話或其他小家電嘅包裝盒。
將圓柱體食物袋放入內盒，然後喺外盒嘅正中間位置𠝹出開口。
D. 水樽固定法
至於水樽收納就更加簡單，只要用返原本包裝盒，就可以方便放入儲物櫃，唔怕佢哋四圍碌。同類型包裝盒都可以用嚟擺放軟身嘅毛巾。
2. 牛奶／果汁膠樽
零食紙盒外，牛奶或果汁膠樽都好常會用到，而呢啲膠樽都係Upcycle成收納盒嘅好幫手！
E. 透明開放式收納盒
呢類型膠樽都會有把手位置，只要沿住樽身嘅橫綫𠝹開就會得到一個乳白透明膠盒。
呢類膠盒嘅大細好啱擺放女士常用嘅化粧棉或衛生巾等用品。
如需要蓋子，只要𠝹出另一個膠樽嘅底部部分，當然都可以因應個人需要而定高度喇～
F. 手挽收納盒
除咗方型開蓋之外，都可以活用購物袋嘅手抽，將方型蓋變成手挽開蓋。
G. 迷你垃圾桶
女孩子都會添置迷桌上垃圾桶，方便丟用過嘅化粧棉、棉花棒等用品，只要加包裝濕紙巾嘅開蓋，透明收納盒就可以變身垃圾桶。
先喺收納盒蓋上面𠝹出開口，記得要比包裝濕紙巾開蓋細，咁用先可以用熱熔膠癡喺上面固定。
就咁睇完全唔覺得係一個廢物再造嘅垃圾桶！
H. 手抽收納盒
如要放入收納櫃上方位置，最好使用手抽盒，方便日常拎放。
只要喺膠樽樽身側邊癡上樽蓋，就秒速化身成手抽盒。
樽蓋上面寫成盒內內容物，唔怕搵唔到。
活用日常小物，就可以減少購買收納盒嘅數量。
text/Priscilla
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】美獅鋒味搖滾美食節2024雙人電子門票！↓
↓ 呈獻超過20款特色環球創意料理 / 匯聚多位亞洲人氣歌手！↓
↓【限時搶⚡】卡樂B Jagabee茄汁味波浪薯條！↓
↓ 酸酸甜甜，香脆可口！↓
