網民熱議：雨淋式花灑好唔好用？ 可令全身感覺一致嘅溫度？會沖得唔夠乾淨？

============

同場加映：

【蝸居睇樓團】屯門315呎一房單位變私人GYM房！特色牆Ｘ迷你戲院/廚櫃連高身吧台夠慳位

============

可將沖涼體驗提升？沖涼可用更少時間？
有網民於連登討論區上以「雨淋花曬(灑)好無(冇)用？」為題發文尋求意見，而一眾網民對雨淋式花灑嘅意見兩極，有網民認為雨淋式花灑可同時將水淋勻全身，並可使整個身體感受到一致嘅溫度，更大幅提升了沖涼嘅體驗：「淋曬(晒)全身，溫度一致，唔會個身一邊凍一邊暖，沖身淨係個人自轉，唔洗(使)就花灑水柱好爽，冬天感覺更加一流」、「最正係佢完全提升左(咗)個沖涼體驗，你唔會覺得剩係過水抹身，而係好似淋雨咁好有Feel」，更有網民指用雨淋式花灑沖涼會比起以往沖得更快：「好(用)，我覺得沖涼快左(咗)，唔使渣(揸)住舊(嚿)野(嘢)沐下沐下(淋吓淋吓)，濕全身+全身查(搽)野(嘢)+沐(淋)全身，5分鐘完成」

有網民指以雨淋式花灑淋浴有令全身可感一致溫度的效果，亦令洗澡的體驗提升不少。

有網民表示用雨淋式花灑洗澡方便，可節省不少時間。

會有水力不足嘅問題？會沖得唔乾淨？
亦有網民認為雨淋式花灑並唔好用，並指其於使用上唔夠方便：「唔覺好用，花灑插係(喺)個架到(度)隊高啲就得，照頭淋我睇唔到電話」、「但慣咗洗頭還洗頭，沖涼還沖涼，沖身想沖耐啲，用呢款要一直濕頭」，而有網民就指若屋企水壓不足，使用雨淋式花灑會有水力弱嘅問題：「家中水壓唔夠，淋落黎(嚟)既(嘅)水無力唔爽」、「之前用過水壓唔夠，D(啲)水好似流出黎(嚟)咁個感覺唔係咁好」，更有網民表示用雨淋式花灑難以沖乾淨身體某些部位：「個人唔太中意，主要係水力唔夠強，尤其女人需要活動式花灑頭清洗私密部位，自己唔會裝喺屋企」、「D(啲)屎忽呀、腳呀，你都係要手拎花灑去沖，感覺上唔容易靠上面既(嘅)水洗得乾淨，最後都係用返普通花灑」

當使用雨淋式花灑時無法使用電話及無法選擇要沖洗的地方是網民認為的缺點。

有網民表示若家中供水的水壓不足，會導致雨淋式花灑出現水力弱的問題。

有網民則指雨淋式花灑難以沖洗乾淨一些私密部位以及腳部等。

網民推薦：Hansgrohe、GROHE、TOTO、KOHLER等品牌
另外有網民就問到有冇雨淋式花灑嘅品牌推介：「咩牌子好？」，Hansgrohe、Grohe、TOTO及KOHLER等品牌就被網民們推薦：「Hansgrohe/Grohe」、「一定係買大牌(子)，toto、kohler、hansgrohe個(嗰)啲」，而亦有網民強調千祈唔好選購來自內地嘅品牌，並指內地品牌嘅雨淋式花灑會有出水量不足嘅問題：「千其(祈)咪x買大陸野(嘢)，佢地(哋)全部花灑都剩係出細水，拆埋隔塵都係細水，同佢地(哋)慳水習慣有關，要買就買Hansgrohe呢啲牌子，包你一用愛上淋雨式，最好一邊聽吓啲落雨歌一邊淋，爽呀喂」

品牌Hansgrohe、Grohe、TOTO及KOHLER出產的雨淋式花灑獲一眾網民推薦。

有網民建議不要選購屬內地品牌的雨淋式花灑，因花灑的出水量會不足。

text/Jonathan
photo/HKET圖片庫、Grohe