網民熱議：邊個品牌嘅變頻窗口式冷氣機好用？ 樂聲牌夠晒寧靜？格力又平又好用？

同場加映【家居達人】旅行移民留學注意！專家教揀喼10個必知 
如何防止海關爆鎖、清潔要靠2個法寶、旅行爛喼賠償有秘訣！

============

樂聲牌最好最正？靜到似未開機咁？
有網民於Facebook群組「家居維修交流平台」發文表示自己屋企唔適合安裝分體式冷氣機，並問到邊一個品牌嘅窗口變頻式冷氣機夠靜之餘又會夠凍：「請問谷友，因家居硬件問題，不適宜裝分體冷氣（機），現時窗口式變頻冷氣機，那個牌子夠靜及夠凍，多謝分享」

對於邊一個品牌嘅窗口變頻式冷氣機較好，有網民就推薦選購樂聲牌嘅冷氣機，並指其相當寧靜：「我屋企3間房，四部冷氣，全部唔同牌子，所以知道一分錢一分貨，有比較，Panasonic最好最正」、「Panasonic夠靜，屋企3部都係」、「Panasonic靜到我以為未開機，師傅裝完都話估唔到咁靜，最好選有nanoex嗰啲，可以只係開這功能」，不過亦有網民指樂聲牌冷氣機所發出嘅噪音音量與其他品牌嘅冷氣機並無太大分別：「舊年裝兩部panasonic變頻一匹窗口機，噪音同普通機差唔多，仲要同行搶返嚟，菲律賓廠啲QC麻麻地(哋)……」

有網民指樂聲牌的窗口變頻式冷氣機非常寧靜，其寧靜程度就似並沒有開機一樣。

格力又平又好？自家工廠製造值得信賴？
亦有不少網民推薦格力出品嘅窗口變頻式冷氣機：「格力啦！又平又靚！」、「首選格力」，更有網民指格力設有自家工廠製造冷氣機並有為其他品牌嘅窗口冷氣機負責代工生產，值得信賴：「其實格力唔差架(㗎)起碼佢哋有自己廠制做(製造)，而且已經有多年歷吏(史)，仲係獨孤(沽)一味做冷氣(機)可信賴」、「窗口機好多都係格力代工，有平買平」

有網民指品牌格力的窗口變頻式冷氣機價錢平之餘又好用，品牌更設有自家工廠製造冷氣機並為多款其他品牌冷氣機負責代工生產，因而值得信賴。

珍寶、三菱、大松都好用？於窗框攝紙同貼膠布可減少噪音？
亦有網民推薦珍寶、三菱、大松等多款品牌嘅冷氣機，唯並無列明原因：「珍寶，都不錯」、「三菱」、「大松」、「美的或開利都可以」，不過有網民就唔建議選購美的嘅冷氣機，並指美的嘅冷氣機係代工生產，質素並無保證：「美的就樣樣都有，唔夠專科，而且美的全部都係用代工廠，質量無乜保証」

不過有網民就指窗口式冷氣機難以避免會產生噪音：「裝窗口機點會靜呢？裝係(喺)窗邊，機器摩打運轉震動時同個窗框有共嗚，裝機師傅手勢緊要過部機」，有網民則建議可於窗框攝上紙張或於窗框邊貼上膠布以減少冷氣機所造成嘅震動：「可以在窗框攝纸、或直接痴(黐)的(啲)bandaid膠布在窗框邊，減少vibration(震動)」

珍寶、三菱、大松、美的及開利等多個品牌的變頻窗口式冷氣機亦有獲網民們的推薦。

有網民建議可於窗框邊貼上膠布及於窗框攝上纸張以降低窗口式冷氣機所造成的噪音。

消委會：樂聲牌、樂信牌、LG送風量最好 格力、日立牌、大松最寧靜
據消委會上月發佈13款「1匹半」淨冷型窗口冷氣機的測試結果，測試之中於送風量表現較佳的變頻窗口式冷氣機為樂聲牌 CW-HU120ZA、樂信牌 RC-HU120Z及LG W3NQ12LNNP1；而綜合各款冷氣機於最高及最低風速檔的表現下，格力 GWF12DB、日立牌 RAW-VJ13SCASK以及大松 W12V4A於室內環境的表現最為寧靜，於5分為滿分之中均獲4分。

消委會的測試結果顯示樂聲牌 CW-HU120ZA、樂信牌 RC-HU120Z以及LG W3NQ12LNNP1這三款變頻窗口式冷氣機的送風量表現良好。

而格力 GWF12DB、日立牌 RAW-VJ13SCASK及大松 W12V4A則為消委會的測試之中，於室內環境表現最為寧靜的變頻窗口式冷氣機。

text/Jonathan
photo/HKET圖片庫