網民熱議：開放式廚房設計究竟好唔好？ 煮食時會令全屋充滿油煙？可令單位有更多空間？
近年有唔少新樓盤都會採用開放式廚房設計，而對比起傳統梗廚嘅設計，開放式廚房又到底好唔好用呢？最近有網民就喺香港討論區上發文，指開放式廚房除咗美觀之外就並無其他可取之處，於煮食時更會有油煙，而呢一番言論就引起一眾網民熱烈討論開放式廚房到底係好定係唔好！
============
同場加映：
【家居達人】記者實測！8款中伏家居小工具 微波意粉盒有驚喜、嘥錢磨蒜器、雪糕專用匙好掂
============
開放式廚房得個靚字？
該位網民以「開放式廚房都係自欺欺人？」為題發文，指自己上司與其老婆爭論究竟應唔應該將屋企廚房改為開放式廚房，並問到自己嘅意見，而自己則認為開放式廚房除咗靚之外就冇其他優點：「上司屋企裝修，佢老婆打算將個廚房改做開放式廚房，佢老婆話咁樣睇落間屋大啲，但係上司就話咁樣同自欺欺人有咩分別？佢同老婆為咗個廚房嘈咗幾日叫我哋畀啲意見，我就唔明開放式廚房除咗靚之外有咩好，煮飯又有油煙，租屋都未必會揀開放式廚房啦」
有網民發文指開放式廚房除了較為美觀外，並無其他優點。
會令全屋充滿油煙？更會有安全問題？
有網民就認同樓主嘅睇法，認為於開放式廚房煮食會令全屋都充滿油煙味，於清潔上亦更為麻煩，唔會考慮廚房以開放式作設計：「一定成間屋都係油煙」、「其實香港嘅屋普遍得三幾百呎不適宜開放式廚房，煎條魚(就算)有抽氣都好成屋都係味」、「明顯佢老婆唔係煮飯婆，正常煮飯果(嗰)個人都知有油煙，仲要搞到個廳都油立立(油𣲷𣲷)，清潔就煩，唔會要開放式囉」
亦有網民指開放式廚房只適合甚少下廚嘅人使用：「開放式廚房係俾d(啲)好少煮飯嘅人(最多煮個麵)咁間屋睇落確實係大d(啲)，日日煮飯起壇作法，抽油煙機再勁都冇用，有排佢抹～仲有陣味」，而有網民就更指開放式廚房有著安全問題：「如果屋內多人，尤其有小朋友，千萬要小心，因為人會走來走去，我上次拿著菜刀煮飯，就差點一刀拖落背後突然出現的家人條頸，這是開放廚房最大問題」
有網民指使用開放式廚房煮食會令全屋充滿著油煙味，只對很少會於家中煮食的人適合。
有網民分享自己曾於開放式廚房煮食時差一點釀成意外，認為開放式廚房存在著安全問題。
油煙問題未必一定有？單位望落同實際上都會更大？
對於使用開放式廚房煮食會令全屋充滿油煙呢個問題，有網民就反駁指其實並不一定：「開放式唔一定有油煙，尤其是本來是梗廚有窗那些單位，有抽氣扇，有抽油煙機，空氣由廳既(嘅)窗入，在廚房抽出，點會有油煙呀」、「正正係開放廚房，用咗十年用得好開心，其實呢，正常家庭呢，有幾何大火炒嘢炸嘢吖，煎吓扒炒個菜有幾多油煙？都唔講而家有焗爐有空氣炸機有剩」，亦有網民指用上質素好嘅抽氣扇及抽油煙機即可解決問題：「買個勁啲嘅抽氣扇同抽油煙機(係pro嗰種)就無問題啦」
另外有網民認為廚房採用開放式設計可使單位有更多可用嘅空間：「多咗牆的空間，除了視覺上大咗，真係大咗dd(啲啲)喎」、「開放式廚房，睇落去係大啲嘅，而且，少咗啲間格牆，實際可用空間都多啲」
有網民認為於家中煮食很少會以大火炒、炸食物，加上能配以抽氣扇、抽油煙機及窗戶將油煙抽走，因此開放式廚房並不一定會令全屋充滿油煙。
能令單位增加空間感及可用空間則為網民認為開放式廚房另有的好處之一。
廚房改用玻璃門/牆則可兩全其美？
另外有網民則建議可將廚房嘅門/牆改用玻璃設計，半開放式嘅設計既可增加單位空間感亦同時可避免令全屋充滿油煙：「有一個方法係將廚房門加大變玻璃門，視覺上間屋會大咗，又有玻璃門防止煮飯時油煙漏出大廳！」、「改用玻璃墻(牆)囉，有空間感又唔會走晒D(啲)油煙出嚟」
有網民建議廚房採用半開放式的設計則可同時增加單位的空間感及防止煮食時油煙會四散。
text/Jonathan
photo/HKET圖片庫
港生活人氣本地熱話
【寵主專享🐾】請您試用AQUA PRO+TECH「PET PET護理套裝」！
【旅途無蝨】請您用AQUA PRO+TECH「驅蚊大師」滅菌驅蚊液 ！
