租客留意！ 租金扣稅懶人包 邊類人合資格？合租單位點計？補打釐印有乜隱憂？

============
同場加映：
【家居達人】$12店煮食小幫手　超慳時間＋一物多用！

============

租金扣稅有乜嘢資格？
1.申請人要以薪俸稅及個人入息課稅報稅
2.申請人及其配偶並無持有任何住宅物業
3.申請人並非租住公屋
4.申請人同業主，並非直系親屬關係（如配偶、父母、兄弟姐妹等）
5.有關嘅租住單位係申請人嘅主要居所
6..租約必需已經打釐印 

申請人所租住嘅單位，業主唔可以係直系親屬。

如果租約期唔夠一年，或者曾經轉租，又點樣計扣稅？
今次嘅稅務減免嘅時效會以2022年4月1日開始計算。若果喺報稅期（4月1日至翌年3月31日）內，租約期唔夠一年，租金需要按月份比例減少扣除上限。即若喺呢個時期內只租咗單位10個月，最高扣稅額就係100,000元除以12再乘以10，即港幣83,333元。

如果期間有轉租過單位，當中有時間重疊，點計？
如果一年內曾經轉租，而租住居所嘅兩份租約時間上有重叠，申請者就要喺兩者中選擇其一，視乎邊個單位是主要居所。

如果租約期唔夠一年，扣稅額要以月份比例扣減。

點樣可以用盡扣稅額？
只需要將該課税年度金額，扣除該年租賃繳付嘅租金或租金上限，以金額較少為準。每個課稅年度嘅租金扣稅上限為10萬元，即每月繳付租金超過8,333元就可以用盡10萬扣稅額。

合租單位點計？
以同單位計算，不論租金繳付比例如何，租金扣稅額則以合租租客人數平均分配。例如係二人合租，就將每人嘅扣稅上限就係100,000元除以二，即每人最多只可扣50,000元，若4人分租，即每人扣稅上限為25,000元。

如果合租單位，就要將扣稅上限除以人數平分。

如果租約無打釐印，即刻補返得唔得？
若業主及租客喺簽定租約時無打釐印，租客係可以補打釐印而計算免稅額。但正常情況下，需在簽署租約後嘅30日內打釐印，業主及租客有機會因為逾期打釐印，而遭受2-10倍稅項罰款。

申請資格必須係租約已打釐印，雖然可以補打，業主及租客有機會因為逾期打釐印，而遭受2-10倍稅項罰款。

text/Joyce
photo/HKET圖片庫