全城熱話：日出康城單位裝修拆咗主力牆 點避免同類「裝修失誤」？業主有機會被判監？即睇專業人士同設計師分析！
呢幾日全港嘅家居熱話，一定係爆出將軍澳日出康城有單位改裝時，設計師疑將接近三分之一面積嘅主力牆「開窿」做房門，令居民擔心係咪會影響到全座大廈嘅結構同安全，連電視節目《東張西望》亦有跟進！港鐵就表示日出康城首都嘅客務處，未曾收到有關單位改動結構嘅申請！究竟一個單位，邊啲牆拆得？邊啲牆唔拆得？作為屋主，裝修開始前可以做啲乜嘢，避免同類型事件發生呢？
============
同場加映：
【家居達人】$12店煮食小幫手 超慳時間＋一物多用！
============
根據香港工程公正行檢測主任林建輝所講，一般裝修， 有兩類牆唔可以拆，就係「結構牆」及「主力牆」。「結構牆」就例如大廈外圍嘅牆身，或廳與露台之間嘅牆，即使有時並非「主力牆」，但唔可以拆。而呢兩類牆， 又並非完全唔可以拆，但一定需要由結構工程師加簽，檢驗過改裝之後無影響到整體結構安全，但通常都要同時進行加固工程，再畫圖則向屋宇署申請，林建輝表示整個過程至少要預多三至四個月，甚至半年，無論所需嘅金錢或時間都大增！但林Sir就話睇現時嘅報導，單位似乎未有加上工字鐵去加固旁邊牆身……
將軍澳日出康城有單位改裝時，設計師疑將接近三分之一面積嘅主力牆「開窿」做房門，令居民擔心會影響到全座大廈嘅結構同安全，成為近日全城熱話。
設計師就係將客廳同睡房之間嘅主力牆（粗線部分）「開窿」做房門。
並將兩間睡房打通變成大主人房。
香港工程公正行檢測主任林建輝表示，如果改裝工程涉及「結構牆」及「主力牆」，就必須要由結構工程師加簽，同時進行加固工程，再畫圖則向屋宇署申請。
拆主力牆裝修失誤，責任誰負？
講到今次「意外」嘅責任問題，會唔會係設計師「唔清楚邊幅係主力牆」呢？Deco Farmer Studio 嘅設計師Heiman Chan表示其實喺地產網搵到嘅平面圖，都會有牆身厚度，已經可以推斷到該幅牆身係咪可以拆！如果尚有懷疑嘅地方，亦可以去屋宇署搵圖。而即使設計師「唔小心」，裝修師傅亦有責任要提醒，因此責任無從推卸！而所有落手進行裝修工程嘅承辦商，一定要有「小型工程牌照」，要有負責人去check所有工程步驟是否合法。同時如果係主力牆，電鑽鑽落牆身嘅聲音已經跟普通牆身不同，比較難開鑿兼九成機會會見到鋼筋。所以即使市民係直接搵裝修公司進行涉及拆牆嘅裝修，有「小型工程牌照」嘅公司，係有責任話畀客人知邊啲牆唔拆得。即使業主「只係」直接同設計師簽合約，但其實當中已經包括裝修工程，亦即使工程係外判，負責裝修工桯嘅公司如發現要拆主力牆，都有責任話畀業主知並且暫停工程。
設計師Heiman Chan表示其實地產網搵到嘅平面圖，都會有牆身厚度，作為有經驗嘅設計師，已經可以推斷到該幅牆身係咪可以拆！
林sir表示落手進行裝修工程嘅承辦商，一定要有「小型工程牌照」，要有負責人去check所有工程步驟是否合法，如發現要拆主力牆，都有責任話畀業主知並且暫停工程。
市民裝修前，宜先搞清楚邊幅係主力牆
其實市民又可唔可以知裝修要拆嘅牆，係咪主力牆呢？林Sir話可以睇單位平面圖（以屋宇署或樓契為準）嘅粗幼線，入面某啲牆身嘅線條，明顯加粗，即代表單呢啲牆身係「唔拆得嘅牆」。一般室內可以拆嘅牆身，厚度大約3吋半，若厚過呢3吋半，好大機會係唔可以拆嘅主力牆，雖有少量居屋有可拆牆身，可能會能砌兩行沙磚變成沙磚變成7吋厚，但屬少量特殊例子。此外亦可以敲打牆身，用磚砌嘅牆嘅敲打聲，聲音多數比較空洞，像有回音嘅感覺，但主力牆係無嘅。當然如果真係有懷疑，就最好搵專業工程人士查詢。Heiman Chan亦表示工程開始前，業主不妨搵返樓宇嘅售樓書或屋宇署等資料，check返單位嘅主力牆位置，亦不妨睇返設計師有無更改單位間隔嘅經驗。
林Sir表示業主除咗工程前要check 平面圖，亦可以試吓敲牆身，都有機會分辨到牆身係咪主力牆。
事到如今，可以點補救？
林Sir話可以搵結構工程師去現場，分析可以點樣去加固，例如用拍幾行實心沙磚，中間加插鋼筋支撐；如果已「開窿」嘅面積太大，就可能要倒石屎落鋼筋，重新再造一幅主力牆。
萬一拆咗主力牆而影響到全座樓嘅結構，業主同有關人士要負上乜嘢責任嗎？
林Sir話錯誤拆除主力牆後果相當嚴重，包括影響樓上其他單位結構及他人安全，相關裝修及設計公司應負上責任，涉事單位應交由專業人士了解點樣修復，包括要重新接駁鋼筋。
根據《建築物條例》嘅規定，任何涉及私人樓宇嘅建築工程（包括加建及改建），除非符合《建築物條例》 第41(3)條有關豁免審批工程的規定，或屬於可透過 「小型工程監管制度」的簡化規定而進行嘅小型工程，否則有關人士應根據《建築物條例》第14條的規定，委任認可人士向屋宇署呈交圖則，圖則獲批准及得到同意展開工程後，方可進行有關工程。未經批准而進行建築工程屬嚴重罪行，最高刑罰為監禁兩年及罰款40萬元。如果有關工程進行的方式導致或相當可能導致任何人受傷或任何財產損毀的危險，即屬犯罪，一經定罪，可判監禁3年及罰款100萬元。如建築工程在沒有取得屋宇署批准及同意的情況下進行，屋宇署亦可根據《建築物條例》向業主發出法定命令，飭令業主清拆有關僭建物或糾正違規情況。任何人無合理辯解而沒有遵從該署發出的清拆令，一經定罪，可判監禁1年及罰款20萬元，以及可就罪行持續的每一天，另處罰款2萬元。
林Sir表示設計及裝修公司為主要責任方。如果有充足證據證明業主係唔知情。其實業主可以免卻責任。當然如果業主於知情情況下指示把結構牆清拆， 雙方均有不同程度之責任。
根據《建築物條例》嘅規定，如果有關工程進行的方式導致或相當可能導致任何人受傷或任何財產損毀的危險，即屬犯罪，一經定罪，可判監禁3年及罰款100萬元。
text/Joyce
photo/HKET圖片庫、《東張西望》畫面截圖
港生活人氣本地熱話
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
