馬鞍山自置公屋離奇斷水11年 伯伯被逼公廁拎水度日、無良鄰居拒絕幫忙

============
同場加映：
【家居達人】$12店煮食小幫手　超慳時間＋一物多用！

============
居住於馬鞍山耀安邨耀和樓一個租置公屋的業主葉伯伯每隔兩、三日就會拖住車仔、揸住柺杖穿梭於附近公廁，街坊以為佢係露宿者，原來佢係有樓住、有錢交水費但無水用嘅街坊。

葉伯伯約於 12 年前買入單位，當初仲覺得執到寶，點知住了一年後已經出現漏水問題，諗住搵師傅修理先發現原來因為單位奇怪間隔導致水管要經隔離單位先到自己屋企。

專業驗樓師賴達明實地勘察後表示呢款超小型公屋單位為 1988 年落成時的原有建築設計，房署將一個大單位一開為二，葉伯伯所住單位呈曲尺形，不但間隔唔見駛，最麻煩係水管唔係直接入屋。當初葉伯伯曾向鄰居要求搵師傅修理水管，被拒絕後亦向區議員及房署求助，豈料獲通知因是自置單位所以問題要自己解決。 ​

葉伯伯的水錶多年來被人關掉，伯伯又唔敢自己打開，加上隔鄰單位已易手，令問題更加難以解決，從此展開 11 年無水用的悲慘生活。

由於家中無水，伯伯又因膝蓋軟骨有磨損問題不能每天拎水，所以每次拎完都要慳住用，平時只能用水抹身或到公共浴室沖涼、唔夠水用就會收集鹹水洗腳、餐餐外賣、廁所廚房污垢幾呎厚...呢啲都唔係最誇張，最難以置信嘅竟然係要屙屎落膠袋，令人嘩然！

直到今日因葉伯伯侄女葉女士向 TVB 節目「東張西望」求助事件先曝光。葉女士指伯伯多年來謝絕她上門探訪，見面都係約去飲茶，直到最近因為返鄉有手信先有機會送到大伯父屋企，揭發多年問題。

「東張西望」拍攝期間遭涉事隔鄰單位住戶出言阻止，又找保安驅趕攝製隊，氣氛一度僵持。葉女士見鄰居阻撓直斥對方出爾反爾，令問題未能解決︰「因為之前（你邊位呀？）我係佢侄女，約好咗、應承咗 5 月 5 號嚟整（維修），後尾你打開門話可以睇，唔俾師傅嚟整。你之前 5月 5 號你應承咗我，我（維修）師傅都請埋喇，點知你又反悔，你反悔我就 Call《東張西望》喇！」。鄰居表示：「我唔需要同你有任何對話，非住客嘅唔該你離開。」之後還報警處理。

葉女士堅持為大伯討回公道，多番嘗試下終經管理公司成功爭取入鄰居屋為修理漏水問題，而「東張西望」亦為伯伯尋得義工團隊協助翻新全屋，想知後事如何，記得留意下集！

Text/Circle
Photo/TVB 東張西望