18/6巴士加價喇！8個全港巴士慳錢優惠懶人包 連轉乘小巴電車都有得平
唉！點解呢個6月，會成為加價月？！本來諗住港鐵加價，都可以揀平少少嘅巴士搭，點知連九巴、新巴城巴等5間巴士公司，都要喺6月18日起加價，雖然政府話理論上所有乘客每程要多付嘅車費不足一蚊，但細心發掘一下，其實各巴士公司都有一啲優惠，如月票及各種轉乘優惠等，雖然成日搭巴士都未必有留意㗎！以前唔知唔緊要，而家開始留意返，希望可以盡量慳得一蚊得一蚊啦！
============
同場加映：
【家居達人】$12店煮食小幫手 超慳時間＋一物多用！
============
1.九巴月票 $780每日10程任坐 新界北區來回港島路線最抵
「九巴月票」係一張電子月票，附載喺八達通卡及相關產品內，適用於全港逾450條九巴及龍運路線，包括常規路線，連聯營過海線九巴班次、通宵線及馬場專線、B1口岸線以及假日特別線（K12、K14、K17、K18、P960及P968路線除外），以及由龍運營運的E 線、N 線、S 線 、R 線 及X 線巴士路線等都適用。乘客只須以 $780，便可於30日內，每日任搭十程九巴龍運及兩程B1線。
如果閣下住新界大西北或北區，會搭巴士到港島區返工嘅話，呢款月票其實真係可以幫你慳到錢。假設閣周一至五搭968X由元朗往返鰂魚涌返工，單程車費$24.7，假如每個月返工22日，咁一個月返工車費就係$1,086.8，若使用「九巴月票」（$780），每月便可慳到$306.8車費。
九巴月票可以喺30日內，每日任搭10程九巴路線，如果住新界北區但要日日搭巴士過港島返工，一個月真係慳到幾百蚊車費㗎！
用兩大信用卡買仲有優惠？
原來憑兩款信用卡，一次過買兩張九巴月票（即$1,560），仲可以再有優惠！例如 Citibank嘅「Citi 八達通白金卡」，即會提供15%金額回贈，再加上「公共交通費用補貼計劃」嘅25%津貼，令兩張月票價錢僅$1,036，即每張$518，較原價慳$262。如果用「工銀亞洲的 ICBC•KMB 銀聯雙幣卡」，將此卡同個人八達通卡綁定後，一次過購買兩張九巴月票，即提供20%金額回贈，再加上「公共交通費用補貼計劃」的25%津貼，使兩張月票價錢僅$958，每張$479，較原價慳$301。
用部分信用卡一次過買兩張九巴月票，有金額回贈，可以再慳啲！
購買方法：
「App1933」應用程式及超過100個九巴月票售賣點
查詢網址：https://www.kmb.hk/monthlypass.html
2.九巴優惠站 先拍後搭平多一至四蚊
九巴現有兩類九巴優惠站，一類為「大專優惠站」，另一類為「九巴優惠站」，所有使用成人和學生八達通卡嘅乘客均適用。
A.大專優惠站
乘搭第一程九巴後，只需於同一個工作天內（計算時間為每日凌晨4時45分至翌日凌晨4時44分59秒），到「優惠站」拍卡及以該卡乘搭第二程九巴，便可獲 $4車費優惠。即乘客每日拍卡的次數不限，惟須以「先乘搭，後拍卡，再乘搭」嘅方式，先可享受$4車費優惠。如果乘客於「優惠站」拍卡後，先至喺同一個工作天以該卡乘搭任何九巴路線，則可獲 $2車費優惠。有關大專優惠站地點，請參閱https://www.kmb.hk/fs_location.html 嘅公布。
在香港各大專院校共有二十多個「大專優惠站」，乘客於同一天內，以「先乘搭，後拍卡，再乘搭」嘅方式，先可享受$4車費優惠。
B.九巴優惠站
使用成人和學生八達通卡嘅乘客，只需於同一個工作天內（計算時間同上），先到「優惠站」拍卡，再以該卡乘搭九巴，便可獲最多$2車費優惠。
九巴優惠站所在嘅8個地點。（九巴網頁截圖）
有關優惠
查詢網址：https://www.kmb.hk/faresaver.html
3.學生長途路線即日回程半價
有唔少學生可能住新界北區，但要長途跋涉搭巴士往九龍或港島區返學，如果你都係咁樣，而係年齡介乎12至25歲，並正就讀全日制課程的學生嘅話，只要持有「學生身份」個人八達通，使用同一張八達通卡，即日來回乘搭九巴指定同一路線組合，回程可享半價優惠，至於係邊嘅路線組合，請瀏覽以下網址：https://www.kmb.hk/scheme_studentreturn.html
12至25歲嘅全日制學生，持學生八達通即日乘搭某啲巴士路線組合，回程可享半價優惠。
4.皇后山邨出發轉乘港鐵優惠
以成人八達通卡乘搭路線78A（皇后山 – 粉嶺站(循環線)），於90分鐘內喺粉嶺港鐵站入閘，或在粉嶺港鐵站出閘後嘅90分鐘內，轉乘78A線，可享每程$1轉乘優惠。
乘搭78A巴士喺粉嶺港鐵站轉乘港鐵，每程有$1優惠。
5.指定路線九巴過海隧巴X電車轉乘優惠 成人慳$3
原來乘搭指定嘅34條九巴獨營過海路線，轉乘電車，或乘電車轉乘指定九巴，可獲扣減一程電車車資，即成人可扣減 $3，小童可扣減 $1.5，路線包括108（啟業 ⇋ 寶馬山）、373（上水 ⇋ 中環（香港站））、960（建生 ⇋ 會展站）等。所有參與優惠計劃嘅指定九巴獨營過海路線，請參閱：https://www.kmb.hk/scheme_tram.html
乘指定嘅34條九巴過海路線，轉乘電車，成人可獲$3優惠。
6.即日回程計劃
如果閣下需要來往元朗、青衣、大埔、沙田及北區嘅話，乘搭指定嘅去程及回程路線組合，只要於同日內以同一張八達通卡或同一電子支付方式乘搭，就可享轉乘優惠。例如想由太和去長沙灣，於是乘搭往啟業邨方向嘅74A，單程車費係$11.1，當去到廣福邨轉乘72，原來單程車費係$10.2，但只要喺150分鐘內轉乘，就可享$10.2轉乘優惠。詳細路線組合，請參閱：https://www.kmb.hk/scheme_samedayreturn.html
如果閣下經常來回如果閣下需要來往元朗、青衣、大埔、沙田及北區嘅話，乘搭指定嘅去程及回程路線組合，就可享轉乘優惠。
7.小巴轉乘優惠
九巴原來同不同小巴公司都有合作轉乘優惠計劃，成人可享$1、小童可享$0.5轉乘優惠，主要覆蓋元朗、天水圍、洪水橋、沙田、將軍澳、大埔、青衣及港島等，有關嘅九巴及小巴路線，請參閱：https://www.kmb.hk/scheme_greenminibus.html
九巴亦跟唔同小巴公司有合作轉乘優惠計劃，大家不妨睇吓所覆蓋路線，會唔會係你常到嘅地區。
8.城巴/新巴轉乘計劃
城巴/新巴亦有多個巴士轉乘優惠計劃，如「青嶼幹線巴士轉乘站轉乘優惠計劃」及「城巴機場快線巴士轉乘計劃」就係指定巴士路線轉車組合，次程可獲免費，詳情可參閱：https://www.citybus.com.hk/concession/tc/scheme
城巴/新巴亦有多個巴士轉乘優惠，提供次程免費，不妨前往網頁睇吓會唔會搭到呢啲路線。
text/Joyce
photo/HKET
港生活人氣本地熱話
【請您去旅行✈️🌎】
↓登記領取HK$1,500 旅遊資助金💰！↓
【寵主請留步】《社群》送您AQUA PRO+TECH「寵物護理入門套裝」🛁！
