距離上次居屋攪珠已約一年，盛傳2023年嘅居屋即將於年中開售，預計今年第四季攪珠，明年初揀樓。而暫時消息指房委會擬推出6個屋苑，分別係單位數目最多嘅元朗朗天苑，另有啟德啟悅苑、屯門兆翠苑、觀塘安達臣道嘅安楹苑、安樺苑、安麗苑，合共9,154個單位。如果以居屋白表申請人可以最高九成按揭計算，首期最低約14.9萬元就可以上車；若以綠表申請人最高可獲九成半按揭計算，更可以低至約7.45萬元就可以上車。而且更有傳今次房委會考慮到本港整體樓價下調，會將白表申請人嘅入息及資產限額要求下調，想買居屋，真係要密切留意。
============
同場加映：
【家居達人】家居植物盆栽推介 新手種咩好？專家教防蚊方法、種植4大要點
============
今期居屋最吸引嘅地方之一，係當中約8成單位均位於市區，屬近年少見。而呢6個屋苑嘅預計關鍵日期為2025年4月底至2026年3月底，即居屋2023年嘅6個屋苑，樓花期最長約3 年。而除咗以上6個新屋苑，房委會亦會同時重售39個因取消買賣協議而收回嘅單位，包括居屋2022嘅東涌裕雅苑及沙田愉德苑，以及居屋2020嘅沙田錦駿苑及黃大仙啟翔苑，合共9,193個單位。
而今次居屋將以市價六二折發售，折扣率較居屋2022時嘅五一折為低，售價由149萬元至494萬元，平均呎價由6,280港元至9,390港元不等，當中售價最高為啟德的啟悅苑，平均呎價為9,390港元，最平為元朗朗天苑，平均呎價為6,280港元。
元朗朗天苑提供3,080個單位，平均呎價為6,280港元，係今次提供最多單位兼售價最平嘅屋苑。
觀塘安達臣道會有安楹苑、安樺苑及安麗苑3個屋苑，而今期居屋有約8 成單位位於市區，屬近年少見。
居屋2023 6 大屋苑資料
| 屋苑 | 單位數目 | 實用面積 | 售價 | 平均呎價 | 關鍵日期 |
| 觀塘安楹苑 | 1,140 | 282-478平方呎 | 171-394萬港元 | $7,370 | 2025年7月31日 |
| 觀塘安樺苑 | 990 | 296-495平方呎 | 181-377萬港元 | $7,030 | 2025年8月31日 |
| 觀塘安麗苑 | 1,380 | 278-497平方呎 | 169-376萬港元 | $7,260 | 2025年8月31日 |
| 元朗朗天苑 | 3,080 | 280-454平方呎 | 149-318萬 港元 | $6,280 | 2026年3月31日 |
| 啟德啟悅苑 | 2,046 | 278-475平方呎 | 223-494萬港元 | $9,390 | 2025年10月31日 |
| 屯門兆翠苑 | 518 | 281-518平方呎 | 179-372萬港元 | $6,800 | 2025年4月30日 |
白表申請人入息及資產限制下調 綠表申請人24個月不能擁有物業
今期居屋2023另一個矚目點，就係白表申請人嘅入息及資產限制要求下調！1人申請者嘅入息限額，由之前嘅33,000港元降低$2,000至31,000港元，資產限額則降低19萬港元至73.5萬港元；而2人或以上家庭則由66,000港元至62,000港元，資產限額則由185萬港元降至147萬港元。
今次白表及綠表申請人，無論係入息及資產限額均放寬咗，更多人有望符合申請資格。
至於綠表申請居屋雖無入息限額，但居屋2023起對綠表申請人嘅資產要求收緊，申請資格新增一項條件，就係申請人及申請表上嘅家庭成員，喺遞交申請截止日期前嘅24個月起計，直至購買單位時，均不得於香港擁有任何物業或於物業有任何權益。
居屋2023 要求綠表申請人及申請表上嘅家庭成員，喺遞交申請截止日期前嘅24個月起計，直至購買單位時，均不得於香港擁有任何物業或於物業有任何權益。
居屋白表及綠表申請者資格
白表
1.私營房屋住戶
2.房委會轄下公屋、房協轄下出租屋邨或任何資助房屋計劃單位住戶的家庭成員
3.透過房委會轄下「租置計劃」購得單位不足10年內的業主，及其戶籍內的所有認可家庭成員
綠表
1.房委會轄下公屋住戶
2.房協轄下甲類出租屋邨住戶
3.房委會轄下中轉房屋認可居民
4.持有由房委會或市區重建局發出有效《綠表資格證明書 ─ 衹適用於居屋第二市場計劃》
5.房委會「長者租金津貼計劃」受惠者
6.持有由房委會發出有效《保證書》的房屋署屋宇事務助理職系人員
另一項有關綠表申請者資格嘅改動，係房委會嘅定期暫准居住證持有人，將不再符合資格以綠表申請者身分購買資助出售單位。
居屋申請方法及費用
申請居屋，可透過網上、親身遞交表格及郵寄表格，居屋2023嘅申請費用為270元，白居二申請費用尚未公布，網上申請人可透過
VISA、MasterCard、JCB或UnionPay銀聯信用卡繳交費用，郵寄或親身交表人士則可以用劃線支票或銀行本票繳交費用，抬頭寫「香港房屋委員會」，背面則要寫上申請人香港身份證號碼及聯絡電話。
房委會居屋銷售小組辦事處地址：
九龍橫頭磡南道3號香港房屋委員會客務中心第一層平台（近港鐵樂富站 A 出口）
辦公時間： 周一至五， 8: 45am至6 pm
申請人只可選擇網上或紙本申請（白表或綠表其中一份），否則會被視作重複申請，夫婦分開2份申請表申請，亦作重複申請論。重複申請一律作廢，不會退還申請費。
申請人可網上或親身遞交申請，惟只可以交一次申請，若果夫婦申請亦只須交一份申請表，否則當重複申請處理。
居屋2023揀樓配額及揀樓次序
新一期居屋綠、白表比例維持在40:60，當局會預留900個單位，即大約新一期居屋10%單位，作為單身申請人士配額，即綠表單身人士會有約360個配額，白表單身人士則有約540個配額。至於「家有長者優先選樓計劃」嘅核心家庭申請者方面，當局會預留約2,700個單位。
綠表買家揀樓次序
1.受房委會已公布公屋或中轉屋清拆計劃影響的家庭申請者
2.參加「家有長者優先選樓計劃」的家庭申請者
3.其他家庭申請者
4.受房委會已公布公屋或中轉屋清拆計劃影響的一人申請者
5.其他一人申請者
白表買家揀樓次序
1.參加「家有長者優先選樓計劃」的核心家庭申請者
2.其他核心家庭申請者
3.非核心家庭申請者
4.一人申請
不論以綠表及白表申請，符合「家有長者優先選樓計劃」的申請者均可優先揀樓。即綠表二人或以上家庭，或白表核心家庭其中成員有一名年滿60歲的親人，而為購買單位的其中一名聯名業主，如果已婚，配偶均需列於申請表中。而申請者（如非該名60歲或以上人士）及申請表上嘅家庭成員，須承諾願意與呢名長者一齊喺所購買嘅單位居住。如參加「家有長者優先選樓計劃」嘅家庭申請者未能取得呢個計劃嘅配額，他們仍有機會嘅「其他家庭」類別下購買單位，即有兩次揀樓機會。
「家有長者優先選樓計劃」嘅家庭申請者，有優先揀樓資格。
居屋2023轉售限制 唔同屋苑有唔同規定？
有關今次居屋2023嘅單位轉售限制，由於由不同年期嘅居屋單位，所以規定亦有所不同。
如屬居屋2023發售嘅新建居屋單位，以及喺居屋2022下首次推售並因買賣協議撤銷而收回嘅裕雅苑和愉德苑居屋單位，如為未補地價單位，業主唔能夠以高於原價喺第二市場轉售單位嘅年期，將由現時嘅2年延長至5年，即首5年只可最高用原價售出。第6年開始先可以喺第二市場（即白居二）自行議價將單位轉售。至於已補地價居屋及綠置居單位，只可於購入單位15年後才可於公開市場售出。
但今次發售中包括嘅錦駿苑及啟翔苑重售單位，則不受影響，因為呢兩個屋苑，仍然係根據房委會2018年規定，維持業主於購買單位後2年，可用不高於原價喺第二市場轉售單位，第3年就可以喺第二市場（即白居二）自行議價將單位轉售，而購買單位10年後，就可以補地價於公開市場自由買賣。
新落成居屋單位，喺首五年只可以用原價出售，至第六年可以喺第二市場自行議價將單位轉售。
text/Joyce
photo/HKET圖片庫
」，
App內睇文同睇片可隨時捕捉U Fun彩蛋，
換領現金券及禮品！
↓ 《社群狂歡大激賞》玩盡2024！↓
↓送主題樂園丶室內遊樂場門票及人氣系列袋款等！↓
《社群狂歡大激賞》！送hellolulu最新系列袋款🎁！
